1 Chronicles 17

Guarani 2015 (Ñanderuete Ñe’ẽ Porã 2015)

← Chapter 16 Jump to: Chapter 18 →

1Ha David oiko aja hogaguasúpe, he’i proféta Natánpe: Péina ápe, che aiko peteĩ ogaguasúpe, ojejapova’ekue cédrogui, ha Ñanderuete karameg̃ua oñemohenda aosãingo kupépe.

2Ha Natan he’i Davídpe: Ejapo opaite mba’e nde py’apýpe oĩva guive, Ñanderuete voi oĩ nendive.

3Upe pyharépe katu Ñanderuete ñe’ẽ ou Natánpe, ha he’i ichupe:

4Tereho ha ere che rembiguái Davídpe: Péicha he’i pende Ruete: Nde neremopu’ãmo’ãi chéve peteĩ óga.

5Ndaikói mba’eveichagua ógape, anohẽha ára guive Israélpe Egíptogui, ko ára kóva peve; aikónte peteĩ óga rymba pirekueguiguápe ha peteĩ karameg̃ua rendápe tapia ojeguerováva.

6Mamo aikoha rupi opaite Israelguakuéra ndive, aporandu piko peteĩ Israel sãmbyhyhárape: Mba’érehepa napemopu’ãi chéve peteĩ óga cedroguiguáva.

7Upévare ko’ág̃a eréta che rembiguái Davídpe: Péicha he’i pende Ruete, yvága atykuéra Jára: Che rohenói ovecha aty rapykuérigui, reiko hag̃ua che retã Israel ruvichaguasu ramo;

8ha aiko nendive mamo reikoha rupi, ha ahundipáta ne renonderãgui opaite nderehe ija’e’ỹvape, ha ambotuichavéta nde réra umi tetã ruvichaguasuetevévagui.

9Amoĩma che retã Israel hendag̃uáme, ha añotỹma upépe opyta hag̃ua ha anive hag̃ua oñemongu’e upégui; ha tekove ñaña ñemoñare ndikatumo’ãvéi ojopy vaiete ichupekuéra ymaguaréicha.

10Ha umi ára Che amoĩ ramoguare che retã Israélpe umi mbojovakehára, amotĩ penderehe ija’e’ỹvakuérape. Aikuaauka avei ndéve nde Ruete ningo omopu’ãtaha nde rogarã.

11Ha nde ára og̃uahẽvo reho hag̃ua nde rukuéra ndive, amopu’ãta nde rire nde ra’ykuéra apytégui peteĩme amoĩ hag̃ua ichupe mburuvichaguasu ramo.

12Ha’e omopu’ãta chéve g̃uarã peteĩ ogaguasu, ha Che amoĩ hatãta hetã ruvicha guapyhaguasúpe opaite ára peve.

13Che aikóta Itúva ramo ha ha’e oikóta che ra’y ramo, ha ndahekyimo’ãi ichugui che poriahuvereko, ahekýi haguéicha nde mboyveguarégui.

14Che katu amoĩ hatãta che rógape ha che retãme ára paha peve, ha iguapyhaguasu oĩ hatãta opaite ára peve g̃uarã.

15Ko’ã ñe’ẽ, ha ko’ã techapáy (vision) Natan oñe’ẽ Davídpe.

16Ha tetã ruvicha David oike pe óga jojohuhápe ha oñemoĩ Ñanderuete renondépe, ha he’i: Che Ru yvága pegua, máva piko che, ha máva piko che rogayguakuéra, chegueru hag̃ua ko’ape.

17Ha ko’ã mba’e ñemoĩ michĩrõ guáicha ndéve g̃uarã gueteri, che Jára, Nde reñe’ẽma ne rembiguái róga renonderãre, ha rema’ẽ cherehe ku che karaiguasúrõ guáicha, che Ru yvága pegua ha che Jára.

18Mba’épa che ikatu ambojoapyve che mba’ejerurépe, Nde voi chembotuichaitereíma. Ha nde reikuaapa voi ne rembiguái rekove.

19Che Jára, ne rembiguái rayhupápe ha ndepy’a porãgui rejapo ko’ã mba’e tuichaite, ojehechakuaa hag̃ua ne rembiapo tuichaitéva.

20Che Ru, ndaipóri ndeichagua, ha ndaipóri ambue Jára, Ndémante, ore rohendu haguéicha ore apysa rupi.

21Ha moõpa oĩ tetã ko yvy apére, ne retãicha, Israel. Ijára voi oho oguenohẽ ijupe g̃uarã ko tetã kóvape Egíptogui, oñemoherakuã hag̃ua ipu’akapa ha hembiapo techapyrãva (milágro) ha remosẽ tetãnguérape ne retã Israel renonderãgui.

22Nde rejapo Israélgui ne retã opaite árape; ha Nde, yvagakuéra Jára, reiko Ijaraite voi.

23Ko’ág̃a ore Ruete, pe ñe’ẽ ereva’ekue ne rembiguái rehe ha hogayguakuéra rehe ejapopa ere haguéicha, ha topyta hatãkena opaite ára peve.

24Topytaitéke nde réra ha toñembotuichave ohóvo opaite ára, ikatu hag̃uáicha oje’e: Ore Ruete, Israel Jára, Ha’e voi ningo Israélpe g̃uarã pe Jára añeteguáva. Ha ne rembiguái David róga topyta tapia ne renondépe.

25Nde ningo che Jára, reikuaauka ne rembiguáipe remopu’ãtaha hogarã; upévare chekyre’ỹ añembo’e hag̃ua ndéve.

26Ko’ág̃a, ore Ruete, nde ningo pe Jára ereva’ekue ne rembiguái rehe ko’ã mba’eporã.

27Ha ko’ág̃a iporã ramo ndéve ehovasa ne rembiguái róga, oiko hag̃ua opaite árape ne renondépe; ha pe tekove ore Ruete ohovasáva, ojehovasáma opaite árape.

← Chapter 16 Jump to: Chapter 18 →