1 Chronicles 19

Guarani 2015 (Ñanderuete Ñe’ẽ Porã 2015)

← Chapter 18 Jump to: Chapter 20 →

1Ojehu ko’ã mba’e rire omano Nahas, Amon ñemoñarenguéra retã ruvicha, ha hendaguépe oisãmbyhy ita’ýra Hanun.

2Ha David he’i: Aiporiahuverekóta Hanun, Nahas ra’ýpe, itúva avei cheporiahuverekógui. Upévare David omondo ñe’ẽrerahahára omoangapyhy hag̃ua ichupe itúva manóre. Ha David rembiguaikuéra og̃uahẽvo Amon ñemoñarenguéra retãme, Hanun rendápe, omoangapyhy hag̃ua ichupe,

3Amon mburuvichakuéra katu he’i Hanúnpe: Oĩ porã piko ndéve, David omomba’eguasuseha nde rúpe, ha upévare ombou gua’u ne rendápe nemoangapyhy hag̃ua. Ndoúipa hembiguaikuéra ne rendápe omaña ha oikuaa porãve hag̃ua ne retãpy kangyha mba’ére.

4Upéramo Hanun ojapyhy David rembiguaikuérape ha omoperõ ichupekuéra, ha oikytĩ ijaokuéra, hevi ro’o peve, ha omondo jevy.

5Ha péicha oho hikuái, ha David ohendupávo umi mba’e ojehuva’ekue hembiguaikuéra rehe, ha’e omondo ambue hembiguaikuéra hendápe otĩetereígui hikuái. Upévare tetã ruvicha he’iuka ichupekuéra: Pepyta Jericópe, ipuku jevy peve pene rendyva, ha uperire peju jevy che rendápe.

6Ha Amon ñemoñarenguéra ohechávo David ndaija’eveimaha hesekuéra, Hanun ha Amon ñemoñarengúera oguerahauka 33.500 kílo pláta (óro morotĩ) oiporuka hag̃ua cárro ha kavaju árigua Mesopotámiagui, Síriagui, Maacágui ha Sobágui.

7Ha pe pirapire repy rupi oñemondo hendápe 32.000 cárro, ha ou avei Maaca retã ruvicha isoldádo aty reheve, oñorãirõ hag̃ua.

8David ohendúvo péva, omondo Joábpe opaite isoldádo aty ipy’aguasuvéva reheve.

9Ha Amon ñemoñarenguéra osẽ itávagui ha oñemoĩ itáva rokẽ ypýpe; ha umi ambue tetã ruvichakuéra ouva’ekue oñembyaty ambue henda gotýo, pe ñúme.

10Ha ohechávo Joab oñorãirõtaha henondéguio ha hapykuéguio, oiporavo umi ikatupyryvéva Israel apytégui, ha oñemoĩ orãirõ hag̃uáicha Siriayguakuérape.

11Ha umi soldádo aty hembýva omoĩ ityvýra Abisai poguýpe, ojeity hag̃ua Amonguakuéra ári.

12Ha he’i ichupe: Siriayguakuéra imbareteve ramo chehegui, nde chepytyvõta; ha Amonguakuéra imbareteve ramo ndehegui che roipytyvõta.

13Eñemombaretéke ha ñañeha’ãke ñane retã rehe ha Ñanderuete tavakuéra rehe; ha Ñanderuete tojapo ichupe iporãve háicha.

14Ha oñemoag̃uívo Joab ha hetãyguakuéra ojeity Siriayguakuéra ári, ha’ekuéra katu okañy henonderãgui.

15Ha Amonguakuéra ohechávo Siriayguakuéra oñanipamaha, okañy avei hikuái ityvýra Abisai renonderãgui, ha oikepa hikuái itavakuérape. Upéramo Joab ou jevy Jerusalénpe.

16Siriayguakuéra ohechávo ho’a hague Israel renondépe, omondo ñe’ẽ rerahahára ogueru hag̃ua Siriaygua soldadokuéra oikóva Éufrates mboypýri, ha imburuvicha Sofac, Hadad-ézer soldádo aty ruvicha.

17Ha David ohechakuaáma ramo ombyatyukapa jevy Israelguápe, ohasa pe Jordan, ha oñemoĩ ojeity hag̃uáicha hi’ári. Ha David omohendapáma ramo isoldádo aty, ondyry Siriayguakuérare.

18Ha Siriayguakuéra okañy Israel renonderãgui ha David ojuka Siriayguakuéragui 7.000 kuimba’e cárro pegua, ha 40.000 yvy rupigua; ojuka avei Sofácpe, isoldádo aty ruvicha.

19Ha umi Hadad-ézer rembiguaikuéra ohechávo Israel ipu’aka hague hesekuéra, oñemoĩ hikuái peteĩ ñe’ẽme, ha oiko hikuái Israel rembiguái ramo; ha Siriayguakuéra araka’eve noipytyvõvéi Amon ñemoñarenguérape.

← Chapter 18 Jump to: Chapter 20 →