1 Chronicles 23

Guarani 2015 (Ñanderuete Ñe’ẽ Porã 2015)

← Chapter 22 Jump to: Chapter 24 →

1David ituja rire, henyhẽma ára hetágui, ha omoĩ ita’ýra Salomónpe Israel retã ruvicha ramo.

2Ha ombyaty opaite Israel ancianokuérape, pa’ikuéra ha Leviguakuérape.

3Ha umi Levigua ojepapa ombotýva guive 30 áño yvatévo, ha ojepapa rire peteĩteĩme ojejohu 38.000 kuimba’e.

4Ko’ãvagui 24.000 omba’apóva Ñanderuete rogaguasu rembiapópe, 6.000 oñemoĩ sãmbyhyhára ha mbojovakehára ramo,

5ha 4.000 Ñanderuete róga rokẽ ñangarekohára ramo, ha 4.000 omomba’eguasu hag̃ua Ñanderuetépe ipurahéi ha imba’epukuéra rupi, David he’iuka haguéicha.

6Ha David omboja’o Levi ra’ykuéra itúva rogaguasukuéra rupi: Gerson, Coat ha Merari ñemoñarenguéra.

7Gerson, ra’ykuéra: Laadan ha Simei.

8Laadan ra’ykuéra mbohapy: Jehiel, péva ijypykue, upéi Zetam ha Joel.

9Simei ra’ykuéra, mbohapy: Selomit, Haziel ha Haran. Ko’ãva oiko mburuvicha ramo Laadan ñemoñarenguéra apytépe.

10Ha Simei ra’ykuéra: Jáhat, Zina, Jeus ha Bería. Ko’ã irundy Simei ra’y.

11Jáhat ijypykue; Zina mokõiha; Jeus ha Bería ndaita’ýra hetái, upévagui ojepapánte peteĩ ogaguasúicha.

12Coat ra’ykuéra: Amram, Izhar, Hebron ha Uziel, oĩ hikuái irundy.

13Amram ra’ykuéra: Aaron ha Moises. Ha Aaron ojeporavo oiko hag̃ua Ñanderuete rogaguasu rembiapópe, ha’e ha ita’yrakuéra opaite árape ohapy hag̃ua mba’e ryakuã porã Ñanderuete renondépe, ha ohovasa hag̃ua Ñanderuete rérape hetãyguakuérape opaite árape.

14Ha Moises, Ñanderuete rembiguái tee, ha ita’yrakuéra katu ojepapa Levi ñemoñarenguéra apytépe.

15Moises ra’ykuéra: Gerson ha Eliezer.

16Gerson ra’y Sebuel, peteĩ mburuvicha.

17Ha Eliezer ra’y Rehabías, peteĩ mburuvicha. Ha Eliezer ndaita’ýrai ambue; ha Rehabías ita’ýra heta.

18Izhar ra’y Selomit, peteĩ mburuvicha.

19Hebron ra’ykuéra: Jerías, peteĩ mburuvicha, Amarías pe mokõiha, Jahaziel pe mbohapyha ha Jecaman pe irundyha.

20Uziel ra’ykuéra: Mica, peteĩ mburuvicha, ha Isías pe mokõiha.

21Merari ra’ykuéra: Mahli ha Musi. Mahli ra’ykuéra: Eleazar ha Cis.

22Ha omano Eleazar ita’ýra ỹrehe, ha’e itajýrante; ha Cis ra’ykuéra, ipehẽngue reheguáva, oñemohembireko hesekuéra.

23Musi ra’ykuéra: Mahli, Éder ha Jeremot, oĩ mbohapy.

24Ko’ãva hína Levi ñemoñarenguéra, hogaguasukuéra rupi, mburuvichakuéra ojepapa haguéicha (cénso), upéicha ojehai peteĩteĩva herakuéra rupi 20 áño ombotýva guive yvatévo, ha’ekuéra omba’apo hag̃ua Ñanderuete rogaguasu rembiapópe.

25David he’ígui péicha: Ñanderuete, Israel Jára, omombytu’u Israel retãme ha oikova’erã Jerusalénpe opaite árape.

26Upéicha Leviguakuéra natekotevẽvéi ogueroja pe óga jojohuha ni hembiporu oñemboykéva ha ojeporúva pe tembiapo pévape.

27Kóva David rembiapoukapy paha, he’ívo ojepapa hag̃ua Levi ñemoñarenguéra ombotýva guive 20 áño yvatévo.

28Umía oĩ Aaron ra’ykuéra poguýpe ojapo hag̃ua pe tembiapo Ñanderuete rogaguasúpe, ijerekuévo, ikorapykuéra ha ikotykuérape, omopotĩ hag̃ua opaite mba’épe oñemboykéva guive Ñanderuetépe ha ambue tembiapo ojejapova’erãva Ñanderuete rogaguasúpe.

29Omoĩ hag̃ua avei umi pan pe mesápe Ñanderuete róga kotyguasúpe oñemboykéva pa’ikuérape g̃uarã, ha pe trígo ku’i iporãva ojeporúva kuave’ẽmby tembi’u reheguávape g̃uarã, ha umi mbeju (pan dulce) ojejapóva levadura’ỹre ha oñangareko hag̃ua opaichagua medída rehe oha’ã hag̃ua hekoitépe ipohyikue ha ituichakue.

30Oĩ hag̃ua ko’ẽ ko’ẽ rehe umi omomba’eguasúva Ñanderuetépe ipurahéi rupi, ha upéicha avei ka’arukuépe.

31Oipytyvõva’erã oñekuave’ẽ ramo kuave’ẽmby ojehapypáva Ñanderuetépe g̃uarã opaite pytu’uha árape, jasy ra’y ha areteguasukuérape, peteĩteĩ omba’apo hag̃ua ijaty atyteépe ohupity háicha.

32Ha’ekuéra oipytyvõ avei oñangareko hag̃ua pe óga jojohuha renda rehe, opytáva ipehẽnguekuéra Aaron ra’ykuéra ha iñemoñarenguéra poguýpe, ha’ekuéra omoakãmbágui opaite Ñanderuete rogaguasu rembiapo.

← Chapter 22 Jump to: Chapter 24 →