1 Chronicles 14

Guarani 2015 (Ñanderuete Ñe’ẽ Porã 2015)

← Chapter 13 Jump to: Chapter 15 →

1Hiram, Tíro retã ruvicha, omondo David rendápe ñe’ẽ rerahahára, cédro, carpintéro ha albañilkuéra ndive omopu’ã hag̃ua hogaguasurã.

2Ha David ohechakuaa Ñanderuete omoingo hague ichupe Israel retã ruvicha ramo ha ombotuichaseha Israel retã rerakuã porã.

3Upéramo David omenda Jerusalenguakuéra rehe; ha David ita’ýra ha itajyrave jevy.

4Ko’ã ita’ýra réra onace va’ekue ichupe g̃uarã Jerusalénpe: Samúa, Sobad, Natan, Salomon,

5Ibhar, Elisúa, Elpélet,

6Noga, Néfeg, Jafía,

7Elisama, Beeliada ha Elifélet.

8Filisteayguakuéra ohendúvo oñemoĩ hague Davídpe Israel retã ruvicha ramo, oñombyaty opaite Filisteayguakuéra ojeity hag̃ua David ári. Ha David ohendúvo péva osẽ oñorãirõ hag̃ua hendivekuéra.

9Ha Filisteayguakuéra ou ha oñemyasãi Refain ñuguasúpe.

10Upéramo David omba’eporandu Ñanderuetépe, he’ívo: Ahátapa Filisteayguakuéra oĩháme. Remoĩtapa ichupekuéra che pópe. Ha Ñanderuete he’i ichupe: Tereho, Che voi amoĩta ichupekuéra nde pópe.

11Ha oho hikuái Baal-perazímpe, ha upépe David ombopoguy ichupekuéra. Upéi David he’i: Ñanderuete ojoka umi cherehe ija’e’ỹvape che po rupi, ku ojeka háicha peteĩ kambuchi y pegua. Upévagui oñembohéra pe yvy Baal-perazim.

12Filisteayguakuéra okañývo opoipa upépe ijarakuéragui, ha David ohapyukapa.

13Ha Filisteayguakuéra oñemyasãi jevývo pe ñu rehe.

14David omba’eporandu jevy Ñanderuetépe, ha Ñanderuete he’i ichupe: Ani rehótei hapykuerikuéra, ejerénte hesekuéra rejeity hag̃ua hi’arikuéra pe yvyra ñemohyakuãha rováiguio.

15Ha rehendúvo ouha tyapu sununu pe yvyra ñemohyakuãha ru’ã rehe, ejeity hi’arikuéra, pende Ruete voi osẽta pene renonderãme ha ombopoguýta Filisteaygua soldádo atyguasúpe.

16Ha David ojapo Ñanderuete he’i haguéicha ichupe, ha ombopoguy jevy Filisteaygua soldádo atýpe, Gabaon guive Gézer peve.

17Ha David rerakuã porã oñemyasãi opaite umi tetã rupi; ha Ñanderuete voi omongyhyje opaite ambue tetãnguérape David rerakuã porãgui.

← Chapter 13 Jump to: Chapter 15 →