1 Chronicles 29

Guarani 2015 (Ñanderuete Ñe’ẽ Porã 2015)

← Chapter 28 Jump to:

1Upéi tetã ruvicha David he’i opaite ijatývape: Ñanderuete oiporavóma che ra’y Salomónpe, ha’e ningo imitã ha ikyrỹi gueteri, ha hembiaporã ituichaiterei; pe óga ndaha’éigui yvy arigua rogarã, Ñanderuete rogarãnte uvei.

2Che añeha’ãmba ambosako’i hag̃ua Ñanderuete rógape g̃uarã: Óro, pláta, hiérro, brónce ha yvyrakuéra ojejapokuaa hag̃ua opaite mba’e Ñanderuete he’iva’ekue, upéi ambyaty avei ita vera, oníce, ita vera hũ, ita vera ipara hetáva, opaichagua ambue ita hepýva ha hetaiterei ita mármol (ita morotĩ).

3Upéi ame’ẽse avei Ñanderuete rogaguasúpe g̃uarã, ahayhúgui ichupe, opaite óro ha pláta che mba’eteéva, ambyatyva’ekue che rekove pukukuépe:

4Oĩ 100.500 kílo óro, Ofir peguare, ha 234.500 kílo pláta oñemopotĩpyréva, oñeñuã hag̃ua Ñanderuete rogaguasu tapiakuéra,

5ha opaichagua ambue tembiapópe g̃uarã oñekotevẽtava guive óro ha pláta. Ha mávapa ome’ẽse avei ime’ẽmby, kuave’ẽmby ramo, Ñanderuetépe g̃uarã.

6Upéramo umi Israel rogaguasu ruvichakuéra, umi Israel tríbu ruvicha, mburuvicha 1.000 ha 100 arigua, umi tetã ruvicha rembiguaiguasu ome’ẽ joa avei ime’ẽmby, kuave’ẽmby ramo.

7Ha ome’ẽ hikuái ojeporu hag̃ua Ñanderuete rógape g̃uarã 167.500 kílo óro ha 10.000 drácma óro (monéda Persiaygua, 10.000 drácma = 83,6 kílo óro), ha 335.000 kílo pláta, ha 603.000 kílo brónce ha 3.350.000 kílo hiérro.

8Ha mayma oguerekóva guive ita vera hepýva ome’ẽ Ñanderuete rogaguasúpe g̃uarã, ha omoĩmba hikuái Jehiel, Gersongua pópe, (oñangareko hag̃ua).

9Ha Israelguakuéra ovy’aitereígui, ome’ẽ ko’ã mba’e ipy’a mbytete guive Ñanderuetépe g̃uarã.

10Upérõ tetã ruvicha David omomba’eguasu Ñanderuetépe opaite Israelgua ijatýva renondépe, ha he’i: Toñemomba’eguasu Ñanderuetépe, Israel Jára, ára atyguasu guive ára aty guasukuérape g̃uarã.

11Nde ningo, ore Ruete, pe ituichavéva, ipu’akapáva, ojajaipáva ha herakuã guasuvéva; umi mba’e oĩva guive yvagakuéra ha yvýpe ne mba’e memete voi. Nde reisãmbyhypa ha remoakã porãmba.

12Nde reme’ẽ mba’erepyeta ha verapy, Nde reisãmbyhy opaite mba’e; Nde pópe oĩ mbarete ha pu’akapa, ha Nde rembotuicha ha remombarete yvyariguakuéra ndéve iñe’ẽ rendúvape.

13Ko’ág̃a, ore Jaratee, ore rombotuicha ha roguerohory nde réra jajaipáva.

14Máva piko che, ha máva piko ko che retã, ikatu hag̃uáicha roikuave’ẽ ndéve mba’eita ha opaite mba’e oĩva guive ne mba’énte voi, ha nde póguinte rohupitypa umi mba’e rome’ẽmava’ekue ndéve.

15Ore ningo ne renondépe mbohupa ha tetã ambueyguáva, oremboriahuete ore rukuéraicha; ha ore arakuéra ko yvy apére pya’eiterei ohasa ku kuarahy’ãicha.

16Ore Ruete, ore Jaratee, ko’ã mba’eita rombosako’íma romopu’ã hag̃ua nde rérape g̃uarã peteĩ ogaguasu, nde po peguare ha ne mba’e meme voi.

17Che aikuaa, che Jaratee, Nde rehechapaha opavave py’apýpe, ha py’a potĩ nembovy’aha; upévagui py’a potĩpópe aikuave’ẽ ndéve ko’ã mba’e, ha ahecha avei torýpe, ne retãyguakuéra oñembyaty ome’ẽ hag̃ua avei kyre’ỹpópe.

18Ore Ruete, Abraham, Isaac ha Israel, ore rukuéra Jára, ejoko ne retãyguakuéra py’a oguata hag̃ua kyre’ỹpópe ha py’a potĩme nde rapépe.

19Eme’ẽ avei che ra’y Salomónpe py’apy ñe’ẽ potĩ ojapo hag̃ua hekoitépe ne ñe’ẽ ha ne rembiapoukapy, toñeha’ãmba omopu’ã hag̃ua pe ogaguasu ambosako’iva’ekue.

20Upéi David he’i opaite hetãyguakuérape: Pemomba’eguasu ko’ág̃a Ñanderuete, pende Járape. Upéramo opaite ijatýva guive omomba’eguasu Ñanderuetépe, ituvakuéra Járape, ha oñesũ ha oñembo’e hikuái Ñanderuetépe, tetã ruvicha renondépe.

21Ha ambue ko’ẽme oikuave’ẽ hikuái Ñanderuetépe g̃uarã kuave’ẽmby ojehapypáva: 1.000 tóro ra’yrusu, 1.000 kavara, 1.000 ovechara’y víno reheve, ha heta kuave’ẽmby opaite Israelguakuérape g̃uarã.

22Ha okaru ha omboy’u hikuái pe árape Ñanderuete renondépe; ha omohenda pyahu jevy Salomon, David ra’ýpe tetã ruvicha ramo, omonávo hese acéitepe, ha Sadoc rehe, pa’iguasu ramo.

23Ha Salomon oguapy Ñanderuete guapyhaguasúpe Israel ruvicha ramo, itúva David rendaguépe, ha oñemoakã rapu’ã, ha mayma Israelgua iñe’ẽrendu ichupe.

24Ha opaite mburuvichakuéra, poguasukuéra, umi soldádo ipy’aguasuvéva, opaite tetã ruvicha ha David ra’ykuéra oñemomirĩ tetã ruvicha Salomon renondépe.

25Ha Ñanderuete ombotuichaite Salomónpe opaite Israelguakuéra resa renondépe, ha’eichagua tetã ruvicha ndaipóri araka’eve Israel retãme.

26Péicha David, Isai ra’y, oisãmbyhyva’ekue opaite Israel tribukuérape.

27Ha’e oisãmbyhy 40 áño, Israel retãme. Hebrónpe oisãmbyhy 7 áño ha Jerusalénpe 33 áño.

28Ha omano itujaite rire ha henyhẽ hi’ára hetágui, ha henyhẽ mba’erepyeta ha verapýgui, ha Salomon oisãmbyhy hendaguépe.

29Ha tetã ruvicha David rembiapo ñepyrũ ha ipaha pegua ojehai Samuel, pe proféta, kuatiañe’ẽme; ha pe proféta Natan kuatiañe’ẽme, ha Gad proféta kuatiañe’ẽme.

30Upépe ojehaipa mba’éichapa ha’e oisãmbyhy Israélpe, ha mba’éichapa ombopoguy ambue tetãnguérape.

← Chapter 28 Jump to: