Revelation 1

Guarani 2015 (Ñanderuete Ñe’ẽ Porã 2015)

Jump to: Chapter 2 →

1Ko’ã mba’e Ñanderuete ohechaukava’ekue Hesu Crístope, Ha’e ombohasa hag̃ua umi mba’e pya’e oikova’erãva hembiguaikuérape; Hesu Crísto oikuaauka ko’ã mba’e yvága rembiguái rupi Juánpe, Hesu Crísto rembiguái.

2Ha Juan ningo oikuaaukava’ekue ko Ñanderuete ñe’ẽ (iglesiayguakuérape), ha’e omombe’u opaite mba’e Hesu Crísto ohechaukava’ekue ichupe.

3Ovy’aite upe omoñe’ẽva ha umi ohendúva ko Hesu Crísto ñe’ẽ kóva, ha oñongatúva ipy’apýpe opaite ñe’ẽ oĩva guive ko kuatiañe’ẽ kóvape, upe ára upéva hi’ag̃uímagui.

4Che, Juan, amomaitei umi 7 iglésia oĩva Ásiape: Ñanderuete tapenderovasa ha tome’ẽ peẽme pe py’aguapy oúva pe Oikovévagui, pe Oikovemívagui ha pe Ouva’erãvagui, ha umi 7 Pytu Porãgui iguapyhaguasu renondépe,

5ha Hesu Crístogui, pe techahare heko peguáva ha pe oiko jey tenonde omanóva apytégui ha pe oikóva yvy ruvichaitevéva ramo tetã ruvichakuéra apytépe. Ha’e voi ningo ñanderayhuvahína ha ñandejoheiva’ekue ñane angaipágui huguytee rupi.

6Ha’e ojapo ñandehegui mburuvichakuéra ha pa’ikuéra ñamba’apo hag̃ua Ñandejára Ñanderuetépe g̃uarã. Ñemomba’eguasu ha pu’aka topyta ichupe g̃uarãnte ára atyguasukuéra guive umi ára atyguasurã meve, taupéicha (amen).

7Peikuaa porãke Hesu Crísto ou jeyva’erã arai reheve, ha opaite umi oikutuva’ekue ichupe ohecha jevyva’erã ichupe ha opaite tetã yvy arigua ojahe’o soróta ohecha vove ichupe. Taupéicha.

8Che ningo pe “ a” ha pe “ zéta” he’iséva iñepyrũmby ha ipaha, he’i Ñanderuete pe yvága Jára, pe Oikovahína, pe Oikova’ekue ha pe Ouva’erãva, pe Ipu’akapáva.

9Che, Juan, che avei pene hermáno ha pene irũ umi jepy’ara’ã jahasáva Hesu Crísto ha hetãguasu rehehápe. Ko’ág̃a che aĩ préso pe ypaũ (ísla) Pátmospe, yguasu pa’ũme, ajeroviágui Hesu Crístore ha amyasãi haguére Hesu Crísto evangélio.

10Hesu Crísto árape (domíngo) ahendu che rapykuépe peteĩ oñe’ẽ hatãva ku turu puguasúicha,

11he’íva: Che ha’e pe “ a ” ha pe “ zéta ”, he’iséva pe ñepyrũ ha pe paha, opaite mba’e rehecháva guive ehai peteĩ kuatiañe’ẽme ha eguerahauka umi 7 iglésiape, oĩva Efésope, Esmírnape, Pérgamope, Tiatírape, Sárdespe, Filadélfiape ha Laodicéape.

12Ha ajerévo ahecha pe oñe’ẽva chendive, ha ahecha 7 tataindyenda oroguiguáva.

13Ha umi tataindyenda mbytépe ahecha peteĩ ojoguáva yvyarigua Ra’ýpe, oñemondéva póncho pukúpe ipy peve ha peteĩ ku’a jokuaha oroguiguápe.

14Iñakã ha hi’áva morotĩmba, ovecha rague morotĩ sakãicha, térã yro’y rypy’áicha (niéve) ha hesa tata rendýicha.

15Ipy ojogua brónce porãme, oñembohykuva’ekue tatakuápe, ha iñe’ẽ katu ipu hatã ku yguasu ryapúicha.

16Ipo akatúape oguereko 7 jasytata, ha ijurúgui osẽ peteĩ kyse akua pukuete hãimbe jováiva, ha hova ojajái ku kuarahy asajerõguáicha.

17Ha ahechávo ichupe, ha’a ipy renondépe amanorõguáicha, upéi Ha’e omoĩ ipo akatúa che’ári ha he’i: Ani rekyhyje, Che ha’e pe ñepyrũmby ha pe paha,

18pe aikovéva, ajejukava’ekue ha péina aikove ára atyguasukuéra guive umi ára atyguasurãnguéra peve ha Che poguýpe oĩ pe ñemano ha pe añaretã rokẽ lláve.

19Ehaipa rehecháva guive, umi mba’e oikóva ha ojehútava uperire.

20Kóva ningo pe mba’e ñemimby umi 7 jasytata rehecháva Che po akatúape ha umi 7 tataindyenda oroguiguáva: Umi 7 jasytata he’ise 7 iglésia rembijokuái (karai anciáno) ha umi 7 tataindyenda he’ise 7 iglésia.

Jump to: Chapter 2 →