Revelation 18

Guarani 2015 (Ñanderuete Ñe’ẽ Porã 2015)

← Chapter 17 Jump to: Chapter 19 →

1Ko’ã mba’e rire ahecha ambue yvága rembiguái oguejýva yvágagui tuicha pu’aka reheve ha pe yvy ohesapepa imimbi rendýpe.

2Ha’e osapukái ñe’ẽpu mbaretépe, he’ívo: Ho’áma, ho’áma Babilónia, pe tavaguasuete, ko’ág̃a oiko ichugui añanguéra róga, ha opaichagua pytu vai renda ha opaichagua guyra ky’a ha ojepota’ỹva raity.

3Opaite tetãnguéra oka’upa ivíno oporomboheko ky’ávape, tetã ruvichakuéra oiko upe kuña reko vai ndive, ha ñemuhára yvy pegua oñembopirapire heta hendive.

4Ha ahendu ambue ñe’ẽpu yvágaguio he’íva: Pesẽ ichugui, peẽ che retãyguakuéra, ani hag̃ua peẽ peñemoangaipa avei hendive ha ani hag̃ua pehupity avei ijehavira.

5Hi’angaipakuéra oñembyatýma (cérroicha) yvága peve, ha Ñanderuete imandu’a hembiapo vai rehe.

6Pemyengovia ichupe, ha’e ome’ẽ haguéicha peẽme, pejapovai jo’a hese, pe váso ha’e ho’uka haguéicha ambuekuérape pe’uka jo’áke avei ichupe.

7Ha’e oñembotuicha ha ha’enteséva, peichaite pembohasa asy ha peipy’apy ichupe, he’ígui ha’e ipy’apýpe: Che aiko’aína tetã ruvicha ramo, ha ndaikomo’ãi kuña imenave’ỹvaicha (viúdaicha) ha jahe’o nog̃uahẽmo’ãi che rendápe.

8Upévare og̃uahẽva’erã hendápe peteĩ ára ijehavirarã (icastigorã): Ñemano, jahe’o, ñembyahýi ha ipahápe ojehapýta ichupe, ipu’aka hese pe yvága Jára imbareteitéva, Ñanderuete voi ombojovakéta ichupe.

9Ha umi tetã ruvicha, oikova’ekue pe kuña reko vai ndive ha okaru porãseva’ekue, hasẽta ha ojahe’o soróta hese, ohecha ramo hatatĩ rendy.

10Oñemomombyry hikuái ichugui okyhyjégui ijehavirágui ohupitýrõ g̃uarã avei ichupekuéra, ha he’i joa: Angái, angái, pe tavaguasuete, pe Babilónia tuichaitéva, peteĩ hórape reñehundi.

11Ha umi ñemuhára yvy pegua hasẽ ha ojahe’o soróta hese, avave ndojoguasevéigui imba’erepykuéra:

12Óro, pláta, ita vera, ambue ita hepýva (pérla), aorã linoguiguáva, séda, aorã pytã asýva, yvyra hyakuã porãva, opaichagua tembiporu ojejapova’ekue elefánte ratĩnguégui ha yvyra hepyetévagui, brónce, hiérro ha itatĩ (mármol),

13canéla, mba’e ryakuã porãva, inciénso, mírra, perfúme, víno, acéite, trígo ha trígo ku’i porã, torora’yrusu, ovecha, kavaju, cárro porãitéva, tembiguaikuéra (esclávo),

14ha umi yva, tetãygua ánga oipotaitereíva (ho’useitereíva), ohopa ndehegui, ha opaichagua ambue mba’e ojepotaitéva nog̃uahẽmo’ãvéi ha ndojejohumo’ãvéi ne rendápe.

15Umi ñemuhára oñemomba’eitava’ekue pe tavaguasu rupi, oñemomombyry ichugui okyhyjégui ijehavirágui, tasẽ ha jahe’o sorópe he’i hikuái:

16Angái, angái, pe tavaguasu oñemondémiva ao hepývape, ao pytã ha pytã asývape, ha ojeguáva ningo óro, ita vera ha ambue jeguaka hepývape.

17Peteĩ árape ningo oñehundipáta opaichagua imba’erepy reheve. Ha opaite umi omboguatáva umi barco guasu yguasu rupi ha yguasu rembe’y rehe hembiguaikuéra ndive oñembo’y mombyry pe tavaguasúgui,

18ha ohechávo pe tatatĩ ojupi ohóvo pe távagui he’i joa: Mba’eichagua táva piko ojoguára’e ko tavaguasu kóvape.

19Ha oity yvy timbo iñakãnguéra ári, ha osapukái tasẽ ha jahe’o sorópe, he’ívo: Angái, angái, pe tavaguasu, ne mba’erepy rupi opaite barco guasu jára oguatáva yguasúre oñembopirapire hetava’ekue.

20Pevy’áke, peẽ yvagakuéra, peẽ heko potĩva, peẽ apostolkuéra, peẽ proféta, Ñanderuete ombojovake haguére ko táva kóvape.

21Ha peteĩ yvága rembiguái mbarete ohupi peteĩ itaguasu, ita molíno reheguávaicha, ha oity yguasúpe, he’ívo: Peichaite, mbaretepópe, oñemombóta Babilónia, pe tavaguasuete, ha mamove ndojejohumo’ãvéima.

22Noñehendumo’ãvéi ndepype hárpa, purahéi, mimby ni turupu; ha opaite umi ikatupyrýva omba’apóva opaichagua tembiporu rehe, ndaiporimo’ãvéi ndepype, ni pe angu’a (molíno) ryapu noñehendumo’ãvéi ndepype,

23tataindynguéra ndohesapemo’ãvéi ndepype, pe vy’aguasu mendahápe noñehendumo’ãvéi ndepype, ne ñemuharakuéra oiko karaiguasu ramo ha nde paje rupi rembotavy opaite tetãnguérape.

24Ndepype ojejohu proféta ha heko potĩva ruguykue ha opaite umi ojejukava’ekue yvy ári.

← Chapter 17 Jump to: Chapter 19 →