Revelation 7

Guarani 2015 (Ñanderuete Ñe’ẽ Porã 2015)

← Chapter 6 Jump to: Chapter 8 →

1Ko’ã mba’e rire ahecha irundy yvága rembiguái oñembo’yvahína umi irundy yvy apýrape ha ojoko umi irundy yvytu yvy pegua, ani hag̃ua oipeju yvy ári, yguasu térã yvyra rakã ári.

2Ha ahecha ambue yvága rembiguái oúva kuarahyresẽguio, oguerekóva Ñanderuete ta’ãnga jopyha (séllo), ha osapukái hatã umi irundy yvága rembiguáipe, ha umívape oñeme’ẽ pu’aka ojapovai hag̃ua pe yvy ha yguasu rehe,

3ha ha’e he’i ichupekuéra: Anítei pejapovai yvy térã yguasu térã yvyra rakã rehe, ñamota’ãngapa (ñamarca) peve Ñanderuete rembiguaikuéra isyva rehe.

4Ha ahendu oñemota’ãnga 144.000 Israelguakuérape, opaite itríbu apytégui:

5Juda tríbugui 12.000, Ruben tríbugui 12.000, Gad tríbugui 12.000,

6Aser tríbugui 12.000, Neftali tríbugui 12.000, Manases tríbugui 12.000,

7Simeon tríbugui 12.000, Levi tríbugui 12.000, Isacar tríbugui 12.000,

8Zabulon tríbugui 12.000, Jose tríbugui 12.000, Benjamin tríbugui 12.000.

9Ko’ã mba’e rire ama’ẽ ha ahecha peteĩ atyguasu avave ndaikatúiva oipapa, opaichagua ñe’ẽ, tríbu ha tetãgui, oñembo’yvahína pe guapyhaguasu ha pe Ovechara’y renondépe, oñemondéva ao morotĩme ha ipópe ojoko hikuái pindo rogue.

10Ha osapukái hikuái ñe’ẽpuguasúpe, he’ívo: Salvacion ningo ou Ñanderuetégui, Oguapýva pe guapyhaguasúpe, ha Ovechara’ýgui.

11Ha opaite yvága rembiguái, umi karai ancianokuéra ha umi irundy tekove oñembo’yvahína pe guapyhaguasu jerekuévo, ojeity ovapývo pe guapyhaguasu renondépe omomba’eguasu hag̃ua Ñanderuetépe,

12ha he’i hikuái: Amen, ñemomba’eguasu, terakuã porã, arandu, agradecimiénto, ñemboete, pu’aka ha mbarete toñeme’ẽ tapia g̃uarã Ñanderuetépe, Amen.

13Ha peteĩ karai anciáno oporandu chéve ha he’i: Máva piko ha mamóguipa ou ko’ã oñemondéva ao morotĩme.

14Ha che ambohovái ichupe: Che jára, nde ningo reikuaa. Ha ha’e he’i chéve: Ko’ãva ningo umi ouva’ekue upe jehasa asyguasúgui, ha’ekuéra ojohéi ha omomorotĩva’ekue ijaokuéra pe Ovechara’y ruguýpe.

15Upévare ningo oĩ hikuái Ñanderuete guapyhaguasu renondépe, oservi hag̃ua ichupe ára ha pyharépe hogaguasúpe, ha pe Oguapýva guapyhaguasúpe oñangareko hesekuéra.

16Naiñembyahyimo’ãvéima, ndaijy’uheimo’ãvéima, pe kuarahy ndohapymo’ãvéima ichupekuéra ha noñandumo’ãvéima mbyry’ái.

17Pe Ovechara’y oĩva pe guapyhaguasu mbytépe omongaru ha omboy’úgui ichupekuéra pe yvu oporomoingovévagui ha Ñanderuete omokã opaite tesay hesaguikuéra.

← Chapter 6 Jump to: Chapter 8 →