Revelation 6

Guarani 2015 (Ñanderuete Ñe’ẽ Porã 2015)

← Chapter 5 Jump to: Chapter 7 →

1Ha ahecha pe Ovechara’y oñepyrũ ramo oipe’a pe ta’ãnga jopyha peteĩha, ha upevove ahendu peteĩva umi irundy tekove oikovéva apytégui he’írõ arasunu ñe’ẽpúpe: Eju.

2Ha ama’ẽvo ahecha peteĩ kavaju morotĩ, ha pe oguapýva hi’ári oguereko peteĩ guyrapa, ha oñeme’ẽ ichupe peteĩ akã jeguaka (coróna) ha osẽ ombopoguy hag̃ua opaite oñemoĩvape hese.

3Ha Ha’e oipe’ávo pe ta’ãnga jopyha mokõiha, ahendu pe tekove oikovéva mokõiha he’i: Eju.

4Ha osẽ ambue kavaju, peteĩ pytãva, ha upe hi’ári oguapývape oñeme’ẽ pu’aka, oipe’a hag̃ua pe py’aguapy yvy ape árigui, ha tetãyguakuéra ojojuka hag̃ua, ha ichupe oñeme’ẽ peteĩ kyse pukuete.

5Ha Ha’e oipe’ávo pe ta’ãnga jopyha mbohapyha, ahendu pe tekove oikovéva mbohapyha he’i: Eju. Ha ama’ẽvo ahecha peteĩ kavaju hũ, ha pe oguapýva hi’ári oguereko ipópe peteĩ balánza.

6Ha ahendu umi irundy tekove oikovéva apytépe peteĩ ñe’ẽpu he’íva: Peteĩ kílo trígo oñeme’ẽ peteĩ ára rembiapo repy rehe ha mbohapy kílo cebáda peteĩ ára rembiapo repy rehe; ha acéite ha víno repýre anítei rembyai.

7Ha Ha’e oipe’ávo pe ta’ãnga jopyha irundyha ahendu pe tekove oikovéva irundyha he’i: Eju.

8Ha ama’ẽvo ahecha peteĩ kavaju sa’yju, ha pe oguapýva hi’ári oñembohéra ñemano, ha hapykuéri ouhína omanómava retãyguakuéra ha ome’ẽ ichupe pu’aka ojuka hag̃ua kyse pukúpe irundy rundýpe (pe vore cuatrohápe) opaite tetãyguakuéra oĩva guive yvy apére, ñembyahýi rupi, térã mba’asy rupi, térã mymba ñarõ rupi.

9Ha Ha’e oipe’ávo pe ta’ãnga jopyha 5-ha ahecha pe kuave’ẽmby renda guýpe umi ojejukava’ekuépe, omombe’u haguére Ñanderuete ñe’ẽ.

10Ha ãva osapukái ñe’ẽpuguasúpe, ha he’i: Araka’e peve piko Nde, ore Jára heko porã ha añeteguáva reha’ãrõseve rembojovake ha remyengovia hag̃ua ore jukahára rembiapo vai, oikóva gueteri hikuái py’aguapýpe yvy apére.

11Ha oñeme’ẽ ichupekuéra peteĩteĩme ao morotĩ, ha oje’e ichupekuéra opytu’umive hag̃ua mbovy arami oĩmba peve umi ojejukavéta avei ha’ekuéraicha, iñermanokuéra ha iñirũnguéra apytégui.

12Ha ahechávo ojepe’aha pe ta’ãnga jopyha 6-ha oiko peteĩ yvyryrýi ndetuicháva, ha pe kuarahy oñemohũmbaite pyhare pytéicha, ha pe jasy oñemopytã tuguýicha.

13Ha jasy tatakuéra ho’a áragui yvy ape ári, hígo aky okuirõguáicha yvytu hatã oityvyro jave.

14Ha pe ára (ciélo) ojei hendágui ku kuatia oñembyapakua háicha ha opaite cérro ha islakuéra (yguasu mbytépe) oĩva guive yguasúpe omyimba hendágui.

15Ha opaite tetã ruvicha, mburuvichakuéra, umi mba’eita rerekoha, soldádo ruvichakuéra, karaiguasukuéra, opaite tembiguaikuéra ha ndaha’éiva guive tembiguái okañymba cerrokuérape oike hag̃ua itakuaguasúpe térã itaguasu pa’ũme,

16ha he’i hikuái umi cérro ha itaguasúpe: Pe’ána ore’ári ha oreñomi pe Oguapyvahína guapyhaguasu ári rovágui ha pe Ovechara’y pochýgui.

17Og̃uahẽ ningo ipochyha araguasu, ha mávapa ikatúne ogueropu’aka.

← Chapter 5 Jump to: Chapter 7 →