Revelation 21

Guarani 2015 (Ñanderuete Ñe’ẽ Porã 2015)

← Chapter 20 Jump to: Chapter 22 →

1Ha che, Juan, ahecha ára (yvága) pyahu ha yvy pyahu; pe ára tenondeguare ha pe yvy tenondeguare ndaiporivéima, ha umi yguasukuéra (oceanokuéra) ndaiporivéima avei.

2Ha pe táva Ñanderuete omboykéva, pe Jerusalen pyahu, ahecha oguejy yvágagui, oñembosako’íva tembirekorã ojeguávaicha imenarãme g̃uarãicha.

3Ha ahendu ñe’ẽ puguasu pe guapyhaguasúgui he’íva: Péina ko’ág̃a pe óga jojohuha (tabernáculo) oĩ tetãyguakuéra apytépe. Ñanderuete voi oikóta ijapytépe, Ituvatee ramo, ha tetãyguakuéra oikóta hetãtee ramo.

4Ñanderuete voi omokãta tetãyguakuéra resay. Ha pe ñemano ndaiporimo’ãvéi, pe jejahe’o soro omanóva rehe ha mba’asykuéra opava’erã; umi mba’e tenondeguare ndaiporivéima, (ohasapáguima).

5Ha Ñanderuete he’i: Pema’ẽ porãke: Che ambopyahu opaite mba’e. Ehai ko’ã mba’e, oikopava’erã Che ha’éva guive, ipype oĩgui añetegua ha pu’aka tapia g̃uarãva.

6Ha he’ive chéve: Oikopáma, Che ningo ha’e pe “ a ” ha pe “ zéta ” pe ñepyrũ ha pe paha. Che amboy’úta pe ijy’uhéivape pe y yvuguigua oikovévagui, ha reiete Che ame’ẽta ko y kóva.

7Upe ipu’akávape oñeme’ẽta opaite ko’ã mba’e, ha Che ha’éta Ituvatee, ha ha’ekuéra chera’y ha cherajy.

8Umi ipy’amirĩva, umi opiáva pende Ruete rapégui, umi heko ky’áva, umi oporojukáva, umi oikóva oñondive omenda’ỹre (heko ky’áva), umi paje apoha, umi omomba’eguasúva ambue jára ra’ãngápe ha opaite ijapúvape oñemombova’erã upe lágo tataguiguápe, hendyhápe avei azúfre, kóva ningo pe ñemano mokõiha.

9Ha ou che rendápe peteĩ yvága rembiguái umi 7 ángel apytégui, ipopekuéra oĩva’ekue umi 7 ña’ẽmbe henyhẽva umi 7 plága pahaguiguáva ha he’i chéve: Eju ahechaukáta ndéve pe tembirekorã, pe Ovechara’y rembireko.

10Ha pe yvága rembiguái chérupi che pytúpe peteĩ cerro guasu ijyvatéva ári ohechauka hag̃ua chéve pe tavaguasu Jerusalen, oguejýva yvágagui ha Ñanderuete omboykémava heko potĩvape g̃uarã.

11Ipype oĩ Ñanderuete reko jajaipa, hesape ojogua ita hepývape, ita vera sakã hovy kangývape, hesakãva vídrio hepyetévape.

12Pe Jerusalen pyahu jerekuévo oĩ peteĩ tápia ijyvatéva oguerekóva 12 okẽguasu ha peteĩteĩ okẽguasúpe oĩ peteĩ yvága rembiguái ha peteĩteĩ okẽguasu ári ojehai peteĩ Israel tríbu réra.

13Kuarahyresẽ gotýo oĩ mbohapy okẽguasu, yvate gotýo oĩ mbohapy okẽguasu, yvy gotýo oĩ mbohapy okẽguasu ha kuarahyreike gotýo oĩ avei mbohapy okẽguasu.

14Pe tavaguasu tápia oguapy 12 itaguasu ári, peteĩteĩ ko’ã itaguasúre ojehai peteĩ apóstol réra.

15Ha pe yvága rembiguái oñe’ẽva chendive oguereko ipópe peteĩ takuára oroguiguáva, oha’ã hag̃ua pe táva tápia ha hokẽguasukuéra.

16Pe tavaguasu oguereko irundy akua (esquína) ipukukue ha ipekue peteĩcha. Ha pe yvága rembiguái oha’ã pe tavaguasu pe takuára oroguiguávape ha ojohu 2.160 kilómetro ipuku; ipukukue, ipekue ha ijyvatekue peteĩcha.

17Upéi oha’ã pe tavaguasu tápia, ha ojohu 67,70 métro (ijyvate), pe medída yvyariguakuéra oiporúva, péva pe yvága rembiguái oiporu avei.

18Pe tavaguasu tápia ningo ojejapo ita vera sakã hovy kangyývape (jáspe), ha pe tavaguasu ojejapo órogui, ojogua vídrio hepyetévape (cristálpe).

19Pe tavaguasu tápia oguapy 12 itaguasu ári, ha pévape g̃uarã ojeporu opaichagua ita vera: Pe itaguasu peteĩha, peteĩ ita vera sakã hovy kangy (jáspe), pe mokõiha peteĩ ita vera hovyũ (zafíro), pe mbohapyha peteĩ ita vera sakã para (calcedónia), pe irundyha peteĩ ita vera hovy (esmerálda),

20pe 5-ha peteĩ ita vera pytã (sardónica), pe 6-ha peteĩ ita vera pytaũ ha morotĩ (sárdio), pe 7-ha peteĩ ita vera hovy sa’yju (crisolíto), pe 8-ha peteĩ ita vera hovy kangy (berílio), pe 9-ha peteĩ ita vera sa’yju (topácio), pe 10-ha peteĩ ita vera sa’yjuvy ha hovy kangy (crisopráso), pe 11-ha peteĩ ita vera sa’yjuvy (jacínto), pe 12-ha peteĩ ita vera sakã pytãu (amatísta).

21Ha umi 12 táva rokẽguasu ojejapo ita vera hepyetévagui (itakytãtĩ, pérla), peteĩteĩ okẽguasu ogueraha peteĩ ita vera hepyetéva. Ha pe tavaguasu cálle ojejapo órogui, vídrio hepyete resakãicha.

22Ha pe tavaguasu ryepýpe ndahechái Ñanderuete rogaguasu, Ñanderuete, pe Ipu’akapáva voi ha pe Ovechara’y oikógui ipype, ha opyta pe táva Ñanderuete rogaguasu ramo.

23Ha pe tavaguasu noikotevẽi kuarahy térã jasy rehe ohesape hag̃ua ipype, Ñanderuete reko jajaipa, ohesape ipype, ha péva ningo pe Ovecha Ra’y voihína.

24Ha ipype umi tetãnguéra oguatáta hesapépe ha tetãnguéra ruvichakuéra ogueruva’erã upépe imba’e repyeta ha ipu’aka.

25Umi táva rokẽguasukuéra noñembotymo’ãi arakuépe, ha pyhare ndaiporimo’ãvéima.

26Ha tetãnguéra oguerúta ipype imimbikue ha imba’erepyeta.

27Ha ndoikemo’ãi ipype mba’eve iky’áva, hembiapo vaíva térã ijapúva, umi héra ojehaívante pe Ovechara’y tekovete rehegua kuatiañe’ẽmente oikéta ipype.

← Chapter 20 Jump to: Chapter 22 →