Revelation 16

Guarani 2015 (Ñanderuete Ñe’ẽ Porã 2015)

← Chapter 15 Jump to: Chapter 17 →

1Ha ahendu ñe’ẽpuguasu osẽva Ñanderuete rogaguasúgui oñe’ẽva umi 7 yvága rembiguáipe ha he’i: Tapeho ha peñohẽ yvy ári umi 7 ña’ẽmbe henyhẽva Ñanderuete pochýgui.

2Ha oho pe yvága rembiguái peteĩha ha oñohẽvo iña’ẽmbégui yvy ári, (opaite tetãyguakuéra ári) oguerekóva guive pe mymba márca térã omomba’éva ha’ãngápe, osẽ hetére peteĩ ai vaiete ha hasyetéva.

3Ha pe yvága rembiguái mokõiha oñohẽvo iña’ẽmbégui yguasúpe oiko ichugui omanóva ruguykuéicha ha omanomba mayma oikóva guive yguasúpe.

4Ha pe yvága rembiguái mbohapyha oñohẽvo iña’ẽmbégui ysyry ha yvukuérape oiko avei ichugui tuguy.

5Ha ahendu pe yvága rembiguái opytáva y rerekua ramo he’i: Nendivémante oĩ ñembojovake hekópe, Nde ningo, heko porãitéva, Nde reikovevareína, Nde rembojovake hekoitépe ichupekuéra.

6Ha’ekuéra oñohẽ haguére tekove potĩva ha proféta ruguy, Nde avei re’uka ichupekuéra tuguy. Nde remyengovia hekópe hembiapo vaikuérakue.

7Ha che, Juan, ahendu pe kuave’ẽmby renda he’i: Néi, Nde ore Jára, ore Ruete, rembojovake hekópe ha añetehápe.

8Ha pe yvága rembiguái irundyha oñohẽvo iña’ẽmbe kuarahy ári, pe kuarahy rata ohapy tetãyguakuérape.

9Ha ha’ekuéra okái ramojepe noñembyasýi oiko vai haguére, ha nomomba’eguasuséi Ñanderuetépe, oja’o ha oñe’ẽvai uvei Ñanderuete rehe, oguerekóva pu’aka ko’ã plága rehe.

10Ha pe yvága rembiguái 5-ha oñohẽvo iña’ẽmbe upe mymba guapyhaguasu ári inypytũmba ha’e oisãmbyhyha rupi, ha umi yvyarigua oisu’upa ikũnguéra jepe,

11ijai vaiete hasyetereígui ichupekuéra, noñembyasýi katu oiko vai haguére ha ndopoíri hembiapo vaígui oñe’ẽvai uvei Ñanderuete rehe.

12Ha pe yvága rembiguái 6-ha oñohẽvo iña’ẽmbe ysyry Éufratespe hi’y hypa, upéicha oñembosako’ipa pe tape umi kuarahyresẽguiogua tetã ruvichakuérape g̃uarã.

13Ha che, Juan, ahecha osẽha tejujagua jurúgui, upe mymba jurúgui ha upe mymba proféta jurúgui mbohapy pytu vai, ojoguáva kururúpe.

14Ko’ãva ningo mba’epochy pytukuéra, ojapóva mba’e techapyrã ndetuicháva opaite tetã ruvichakuéra renondépe ombyatypa oñorãirõ hag̃ua Ñanderuete ndive, pe Ipu’akapáva árape.

15Cháke, Che (Hesu) ajúta mondaháicha, ovy’ava’erã upe chera’ãrõva ha oñangarekóva ijao rehe, ani hag̃ua oiko opívo, ha ojehechávo otĩetetaha.

16Ha pe mymba ombyatýta tetã ruvichakuérape peteĩ hendápe oñembohérava Israelgua ñe’ẽme Armagedon.

17Ha pe yvága rembiguái 7-ha oñohẽvo iña’ẽmbe yvytu rehe osẽ ñe’ẽpu Ñanderuete rogaguasu guapyhaguasúgui he’íva: Oikopáma.

18Ha oiko aratiri, ñe’ẽ pueta, arasunu ha yvyryrýi ndetuichaitéva, ndoikoiva’ekue gueteri kuimba’ekuéra ha kuñakuéra oiko guive yvy ape ári.

19Ha pe tavaguasu (Jerusalen) ningo oñemboja’o mbohapy hendápe ha tetãnguéra tavakuéra ho’apa. Ha Ñanderuete imandu’a Babilónia, pe tavaguasuete rehe ho’uka hag̃ua ichupe iváso pochy reheguáva.

20Upérõ opaite ísla (ypa’ũ) yguasu mbytépe oĩva guive okañy ha umi cérro ndojejohuvéi.

21Ha amandauguasu ipohýiva 40 kílo rupi ho’a áragui tetãyguakuéra ári. Upeichavéramo jepe ha’ekuéra oñe’ẽvai Ñanderuete rehe, Ha’e ombou haguére ko plága ndetuichaitéva yvy ape ári.

← Chapter 15 Jump to: Chapter 17 →