Revelation 14

Guarani 2015 (Ñanderuete Ñe’ẽ Porã 2015)

← Chapter 13 Jump to: Chapter 15 →

1Ha ama’ẽvo, péina ahecha pe Ovechara’y oñembo’ýva cérro Sion ári ha hendive oĩ 144.000 yvyarigua oguerekóva pe Ovechara’y ha Ñanderuete réra isyva rehe.

2Ha ahendu ñe’ẽpu yvágaguio, yguasu pochy térã arasunu ryapúicha, ha pe ñe’ẽpu, che, Juan, ahendúva ha’ete ku h arpaita púicha.

3Ha opurahéi hikuái peteĩ purahéi pyahu pe guapyhaguasu renondépe ha umi irundy tekove ha umi karai ancianokuéra renondépe, ha avave ambuekuéra apytégui ndaikatúi oikuaa ko purahéi kóva, umi 144.000 mante, ha’ekuéra ojejoguava’ekue tetãyguakuéra apytégui.

4Ko’ãva noñemongy’aiva’ekue ambue jára (gua’u) (kuña reko vai) ndive ha araka’eve ndopoíri ijeroviágui, ojerovia porã uvei Ñanderuete rehe. Ko’ãva oho pe Ovechara’y rapykuéri Ha’e ohohápe, ko’ãva ningo ojejogua tenondeva’ekue tetãyguakuéra apytégui Ñanderuete ha Ovechara’ýpe g̃uarã.

5Ha ijurukuérape ndojejohúi japu, heko potĩgui hikuái.

6Upéi ahecha ambue yvága rembiguái ovevéva ára rehe omyasãivo peteĩ ñe’ẽ porãite (evangélio) osalvakuaáva tetã ruvichakuéra ha yvyariguakuérape, tribukuéra ha tetãnguérape,

7hatã oñe’ẽ ha he’i: Pekyhyje Ñanderuetégui ha pemomba’eguasu ichupe, Ha’e voi ningo ojapova’ekue pe ára ha yvy, yvukuéra ha yguasu.

8Ha ambue yvága rembiguái mokõiha og̃uahẽvo he’i: Ho’áma, ho’áma Babilónia ndetuicháva, omonga’uva’ekue opaite tetãnguérape ivíno heko pochy reheguápe.

9Upéi og̃uahẽ ambue yvága rembiguái, pe mbohapyha, ha he’i ñe’ẽ hatãme: Oimeraẽ tetãygua ohejáva oñemoĩ isyva térã ipóre pe mymba márca ha omomba’eguasu ichupe térã ha’ãngápe,

10upéva ho’uva’erã avei Ñanderuete váso pochy rehegua víno iróva reheve, ha ojehe’a’ỹva mba’eve reheve, ombohasa asyete hag̃ua tata ha azúfrepe, umi yvága rembiguái heko porãva ha Ovechara’y renondépe.

11Ha pe jehasa asyguasu ratatĩ ojupiva’erã ára atyguasu guive umi ára atyguasurãme ha umi omomba’eguasúva pe mymba ha ha’ãngápe ha opaite oguerekóva pe mymba réra márca ndopytu’umo’ãvéi ára ni pyharépe.

12Upévare umi ojeroviáva Hesu Crístore oha’ãrõva’erã paciéncia reheve, iñe’ẽrenduva’erã ha ojapova’erã Ñanderuete rembiapoukapy.

13Ha ahendu ñe’ẽpu yvágaguio, he’íva: Ehai, ovy’aite umi tetãyguakuéra omanótava águi rire, ha omoĩma hekove Ñanderuete pópe oikove aja, pe Pytu Porãmbáva he’ígui: Opytu’uva’erã hikuái hembiapokuéragui, hembiapokuéra omoirũgui ichupekuéra.

14Ama’ẽ ha ahecha peteĩ arai morotĩ, ha hi’ári oguapy peteĩ ojoguáva yvyarigua Ra’ýpe oguerekóva iñakãre peteĩ akã jeguaka oroguiguáva ha ipópe peteĩ kyse ty’ãi (foice’i, hoz) hãimbéva.

15Upérõ ambue yvága rembiguái osẽ pe Ñanderuete rogaguasúgui, ha osapukái ñe’ẽpuguasúpe pe oguapývape arai ári ha he’i: Eju nde kyse ty’ãi reheve ha emono’õ pe kóga yvy pegua, hi’ajupaitémagui.

16Ha upe oguapýva pe arai ári oity ikyse ty’ãi yvy ári ha oikytĩ pe kóga yvy arigua.

17Upéi ambue yvága rembiguái osẽ Ñanderuete rogaguasu yvága peguágui ha ipópe oĩ avei peteĩ kyse puku hãimbéva.

18Ha ambue yvága rembiguái osẽ pe kuave’ẽmby renda ypýgui, oñangarekóva tata rehe, ha osapukái pe oguerekóvape pe kyse puku hãimbéva ipópe ha he’i ichupe: Eikytĩ ha emono’õ parral’akuéra oĩva yvy apére, hi’ajupáma ningo.

19Ha pe yvága rembiguái oity ikyse hãimbéva yvýpe ha omono’õmba rire pe parral’ a oity Ñanderuete jehykue’o rendápe, upéva ningo Ñanderuete pochy rendy rendag̃ua.

20Ha mombyrymi pe tavaguasúgui opyrũ hikuái pe parral’ a rehe, ko jehykue’o rendágui osẽ tuguy ohupitýva kavaju juru fréno peve, ha ipuku 307 kilómetro (61,4 légua).

← Chapter 13 Jump to: Chapter 15 →