Revelation 13

Guarani 2015 (Ñanderuete Ñe’ẽ Porã 2015)

← Chapter 12 Jump to: Chapter 14 →

1Ha che, Juan, añembo’ývo pe yguasu rembe’ýpe ahecha peteĩ mymba ñarõ ojupíva yguasúgui, oguerekóva 7 akã ha 10 hatĩ, umi 10 hatĩ ári oĩ 10 akã jeguaka (coróna), ha peteĩteĩ hatĩ jeguaka rehe ojehai peteĩ téra ivaietéva, oñe’ẽvaíva Ñanderuete rehe.

2Ha pe mymba che ahecháva ojogua peteĩ jaguarete hũme, ipo ha ipykuéra ojogua óso pykuérape, ijuru ojogua leõ jurúpe. Ha pe tejujaguaguasu (Satana) ome’ẽ ko mymba kóvape ipu’aka ha iguapyha oisãmbyhy hag̃ua.

3Upéi ahecha pe mymba akã peteĩva ojekutu vai omano hag̃uáicha, ha’e okuera jevy katu, upévare tetãyguakuéra ohecharamóva omoirũ pe mymbápe (pe anticrístope).

4Umi tetãyguakuéra omomba’eguasu pe tejujaguápe ome’ẽ haguére ko mymbápe pu’aka ha omomba’eguasu hikuái avei ko mymba kóvape ha he’i hikuái: Mávapa ojogua ko mymba kóvape, ha mávapa ikatu oñorãirõ hendive.

5Ha oñeme’ẽ ichupe peteĩ juru oñe’ẽ hag̃ua mba’e ndetuicháva ha oñe’ẽ vaiete hag̃ua Ñanderuete rehe, ha oñeme’ẽ ichupe avei pu’aka oiko vai hag̃ua 42 jasy pukukue (1260 día).

6Ha pe mymba omaldeci Ñanderuetépe, heraguasuetéva ha umi yvágape oikóvape.

7Ha oñeme’ẽ ichupe pu’aka oñorãirõ ha ombopoguy hag̃ua umi heko potĩvape, ha oiko hag̃ua mburuvichaguasu ramo, oisãmbyhývo opaite tetãyguakuéra, ñe’ẽnguéra, tribukuéra ha tetãnguérape.

8Ha opaite yvyarigua oikóva guive yvy apére, ha héra ndojehaíriva pe Ovechara’y kuatiañe’ẽ tekove reheguápe, omomba’eguasúta upe mymba upévape. Ha péva ojehaipáma voi ko kuatiañe’ẽ kóvape, ko yvy tuichakue ojejapo mboyve guive.

9Pe ijapysáva tohendu.

10Upe oporomoingéva cárcelpe, oikeva’erã avei cárcelpe, ha upe oporojukáva, ojejukava’erã avei. Upejave umi heko potĩva oikotevẽ paciéncia ha jerovia mbarete rehe.

11Ha ahecha ambue mymba ojupíva yvýgui, hatĩ mokõiva Ovechara’y ratĩcha, ha oñe’ẽ tejujaguaguasúicha.

12Ko mymba kóva oiporu pe mymba tenondegua pu’aka hesa renondépe ha oñeha’ãmba opaite tetãyguakuéra omomba’eguasu hag̃ua pe mymba tenondeguápe, upe oguerekova’ekue hetére pe jekutu vai omano hag̃uáicha, ha okuera jevyva’ekue.

13Ha ha’e ojapokuaa mba’e techapyrãva (milagrokuéra), oity tata jepe áragui yvýpe, yvyariguakuéra renondépe

14ombotavy hag̃ua ichupekuéra umi mba’e techapyrã rupi, oñeme’ẽgui ichupe pu’aka ojapo hag̃ua ko’ã mba’e techapyrãva pe mymba tenondegua resa renondépe, oguerekova’ekue pe jekutu vai kyse pukuetégui ha oikove jevy, upévare upe mymba mokõiha ojapouka peteĩ ta’ãnga tuicháva upe mymba tenondeguápe g̃uarã.

15Ha oñeme’ẽ ichupe pu’aka omombytu hag̃ua upe mymba ra’ãngápe, kóva oñe’ẽ ha ojukauka hag̃ua opaite yvyariguápe omomba’eguasu’ỹva upe mymba tenondeguávape.

16Ha opaite tetãyguakuérape ipo térã isyváre omoĩuka peteĩ márca, taha’e michĩva térã tuicháva, mba’eita rerekoha térã mboriahu, tembiguái térã tembiguai’ỹva.

17Ha avave ndaikatúi ojogua térã ohepyme’ẽ (ovende) ndoguerekói ramo upe mymba márca, térã upe mymba réra térã inúmero, inúmero ojekuaáta héra letrakuéra rupi.

18Ojekuaa hag̃ua upe mba’e upéva oñekotevẽ arandu rehe. Upe iñakã porãva toheka ko mymba número héra letrakuéra rupi, ko mymba kóva número ningo 666.

← Chapter 12 Jump to: Chapter 14 →