Revelation 19

Guarani 2015 (Ñanderuete Ñe’ẽ Porã 2015)

← Chapter 18 Jump to: Chapter 20 →

1Ko’ã mba’e rire ahendu tetãygua atyguasurõguáicha yvágape he’íva: Alelúia (pemomba’eguasu), pe salvacion reko jajái ha pu’aka oúva Ñanderuetégui.

2Ha’émante ombojovake hekoitépe ha añetehápe. Ha’e voi ombojovakeva’ekue upe kuña reko vaípe, ombyaiva’ekue ko yvy heko ky’a rupi. Ñanderuete omyengovia hembiapo vai, ipo rupi oñohẽva’ekue Ñanderuete rembiguaikuéra ruguy.

3Ha he’i jevy: Alelúia. Ha pe kuña vai ratatĩngue ojupi ára atyguasukuéra guive umi ára atyguasurã meve.

4Upéramo umi 24 karai ancianokuéra ha umi irundy tekove ojeity ovapývo omomba’eguasu hag̃ua Ñanderuetépe, oguapýva iguapyhaguasúpe, ha he’i hikuái: Amen, alelúia.

5Ha pe guapyha guasúguio oñehendu peteĩ ñe’ẽpu he’íva: Pemomba’eguasu Ñanderuetépe, opaite hembiguaikuéra pekyhyjéva guive ichugui, michĩva ha tuicháva.

6Upérõ ahendu tetãygua atyguasu ñe’ẽpúicha, ku yguasu ryapúicha ha arasunu mbarete ryapúicha, he’íva: Alelúia! Oisãmbyhýma Ñandejára, Ñanderuete, pe Ipu’akapáva.

7Javy’a ha ñanderorýke, ñamboete ichupe og̃uahẽháre pe Ovechara’y (Hesu Crísto) omendaha ára, ha hembirekorã (ijiglésia) oñembosako’ipáma.

8Ha ome’ẽ ichupe oñemonde hag̃ua ao líno hepyvévape, imorotĩ asy ha omimbipávape. Pe líno ningo imorotĩ asy, (he’ise) umi heko potĩva justícia.

9Ha pe yvága rembiguái he’i chéve: Ehai: Ovy’aite umi oñehenóiva (oñeconvidáva), pe Ovechara’y menda karuguasúpe (céna del Señor) g̃uarã. Ha ha’e he’ive chéve: Ko’ã Ñanderuete ñe’ẽ ningo añete ha katuete oikopáta.

10Ha che ajeity pe yvága rembiguái renondépe amomba’eguasu hag̃ua ichupe, ha’e katu he’i chéve: Cháke, che ningo tembiguáinte avei, nendive ha ne hermanokuéra ndive, ha opaite umi ambue omyasãi avei Hesu Crístope (ijuru ha hekove rupi). Pe Pytu Añeteguáva ombohasa Hesu Crísto ñe’ẽ ijiglésiape.

11Upéi che, Juan, ahecha pe yvága ojepe’a ha péina ou peteĩ kavaju morotĩ ha pe oguapýva hi’ári oñembohéra Hekopetegua (fiel) ha Añeteguáva, Ha’e ningo oporombojovake hekoitépe ha oñorãirõhína.

12Hesakuéra tatarendýicha ha iñakã ári oĩ heta akã jeguaka (coróna), ha héra ojehaíma, avave ndoikuaái katu, Ha’e añoitémante.

13Ha’e oñemonde peteĩ pónchope ojehypýiva tuguýpe ha héra ojehaiva’ekue hese: Ñanderuete ñe’ẽ.

14Ha umi ejército yvága peguáva oho hapykuéri kavaju morotĩ ári, oñemonde ao líno porãitépe, morotĩ asy ha ipotĩvape.

15Ha ijurúgui osẽ peteĩ kyse puku hakua ha hãimbe jováiva oikutu hag̃ua tetãnguérape (oñemoĩva guive hese), Ha’e (Hesu Crísto) oisãmbyhýta ichupekuéra ivarílla hierroguiguápe. Ha’e voi opyrũ pochypópe pe parral’akuéra rehe Ñanderuete parral jehykue’ohápe, ha Ha’e ho’ukáta ichupekuéra Ñanderuete, pe Ipu’akapáva jehavira ipohyietéva rehegua víno.

16Ha ipóncho ha iku’a jokuahápe ojehai héra: Mburuvichakuéra Ruvicha ha karaiguasukuéra Jára.

17Ha che, Juan, ahecha peteĩ yvága rembiguái oñembo’ýva kuarahýpe, ha hatã osapukáiva opaite guyrakuérape, ovevéva ára rehe he’ívo: Peju ha peñembyaty Ñanderuete karuguasúpe,

18pe’u hag̃ua tetã ruvichakuéra ro’o, soldádo aty ruvicha ro’o, imbaretéva ro’o, kavaju ro’o ha hi’ariguakuéra ro’o, tembiguái ha tembiguai’ỹ ro’o, michĩva ha tuicháva ro’o.

19Ha ahecha pe mymba, tetã ruvichakuéra ha isoldádo atykuérape, oñembyatýma ojeity hag̃ua pe oguapýva kavaju morotĩ ári ha isoldádo aty ári.

20Ha ojeapresa pe mymba ha pe proféta japu, pe ojapóva umi mba’e techapyrã (milagrokuéra) ombotavy hag̃ua tetãnguérape, oguerekóva pe mymba márca isyva térã ipóre, ha omomba’eguasuva’ekue pe mymba ra’ãngápe. Ko’ã mokõi oñemombo hekove reheve pe lágo tata ha azúfre hendývape.

21Ha umi ambue oñembyatyva’ekue katu ojejuka kyse puku rupi, osẽva pe kavaju arigua jurúgui, ha opaite guyrakuéra hyg̃uatãmba ho’okuéragui.

← Chapter 18 Jump to: Chapter 20 →