Revelation 20

Guarani 2015 (Ñanderuete Ñe’ẽ Porã 2015)

← Chapter 19 Jump to: Chapter 21 →

1Ha che, Juan, ahecha peteĩ yvága rembiguái oguejýva yvágagui, ipópe oĩ pe yvykua pypukuete rehegua lláve ha peteĩ cadéna tuicháva,

2ha ha’e ojapyhy pe tejujaguaguasúpe, pe mbói ymaitegua, pe aña, pe mba’epochy térã Satanáme, ha oñapytĩ ichupe 1.000 áño pukukue.

3Ha oity ichupe pe yvykua pypukuetépe ha omboty porã iséllo reheve anive hag̃ua ombotavy tetãnguérape ohasapa peve 1.000 áño, ha uperire ojepoi jevyva’erã ichugui mbovy ára.

4Ha ahecha guapyhaguasukuéra ha oguapy hikuái hi’arikuéra, ha oñeme’ẽ ichupekuéra pu’aka oporombojovake hag̃ua; ha ahecha umi oñe’ak ã ’ova’ekue ánga ojerovia haguére Hesu Crístore ha omyasãi haguére Ñanderuete ñe’ẽ, umiva nomomba’eguasuiva’ekue upe mymbápe térã ha’ãngápe, ha ndohejáiva’ekue oñemoĩ upe mymba márca isyva térã ipo rehe; ko’ãva oikove jevy ha oisãmbyhy hikuái Hesu Crísto ndive 1.000 áño pukukue.

5Ha umi ambue omanomava’ekue katu ndoikovéi jevy ohasa peve 1.000 áño. Kóva ningo pe ñemoingove jevy peteĩha.

6Ovy’aite ha heko potĩma upe oñemoingove jevýva ko ñemoingove tenonderãguápe, pe ñemano mokõiha ningo ndaipu’akái hesekuéra, oikova’erã uvei Ñanderuete ha Hesu Crísto ndive pa’ikuéra ramo, ha oisãmbyhýta hendive 1.000 áño pukukue.

7Ha ohasapa rire umi 1.000 áño, ojepoíta Satanágui icárcelgui.

8Ha osẽta ombotavy jevy hag̃ua tetãnguérape oĩva guive yvy ape ári; ha Gog ha Magog ombyatýta isoldádo aty ndetuichaitéva, ku yvyku’i yguasu rembe’ypeguáicha, ñorãirõguasúpe g̃uarã.

9Ha ha’ekuéra ojupi omyenyhẽ meve Israel yvy tuichakue ha omongora umi heko potĩva rekoha ha pe tavaguasu Ha’e ohayhúva (Jerusalen); ha yvágagui ho’a tata ha ohapypa ichupekuéra.

10Ha Satana, pe tapia ombotavýmiva ichupekuéra, oñemombo pe lágo hendyhápe tata ha azúfre, oĩháme avei upe mymba ha proféta japu. Upépe ohasa asyetéta ára ha pyharépe ára atyguasu guive ára atyguasu peve g̃uarã (tapia g̃uarã).

11Ha che, Juan, ahecha pe guapyhaguasu morotĩ ha pe oguapýva hi’ári, ha hovakégui okañy pe yvy ha pe ára, ha ndojejohuvéima mamove.

12Upéi ahecha umi omanomava’ekuépe, tuicháva ha michĩvape, oñembo’y hikuái pe guapyhaguasu renondépe, ha ojepe’a umi kuatiañe’ẽ, ojepe’a avei ambue kuatiañe’ẽ, kóva pe tekovete reheguáva, oñembojovake hag̃ua hembiapokuéra rehe, ojehai háicha umi kuatiañe’ẽme.

13Ha pe yguasu opoi umi omanomava’ekuégui oĩva guive ipype ha pe ñemano ha pe añaretã opoi avei opavave oĩva guive ipype oñembojovake hag̃ua avei hembiapokuéra rehe.

14Ha pe ñemano ha pe añaretã oñemombo pe lágo tataguiguápe. Pe lágo tataguigua ningo ha’e pe ñemano mokõiha.

15Ha upe héra ojejohu’ỹva pe tekovete rehegua kuatiañe’ẽme oñemombova’erã pe lágo tataguiguápe.

← Chapter 19 Jump to: Chapter 21 →