Revelation 15

Guarani 2015 (Ñanderuete Ñe’ẽ Porã 2015)

← Chapter 14 Jump to: Chapter 16 →

1Ha che, Juan, ahecha ambue techaukaha (señal) ndetuicháva ára rehe: 7 yvága rembiguái ogueraháva umi 7 plága paha, ha umíva oikopa rire opa avei Ñanderuete pochy.

2Ha ahecha peteĩ yguasu ita veráicha ojehe’áva tata reheve, ha hembe’ýpe oñembo’yhína umi ipu’akava’ekue upe mymba rehe, ha’ãnga rehe ha pe mymba número 666 rehe, ha ipópe oguerekopa hikuái Ñanderuete harpakuéra.

3Ha ha’ekuéra opurahéi, Ñanderuete rembiguái Moises purahéi ha pe Ovechara’y purahéi he’ívo hikuái: Ituicha ha iporãite ne rembiapokue, Nde, ore Ruete, Nde ningo pe Ipu’akapáva, Nde rapekuéra añete ha hekópe, Nde ningo tetãnguéra ruvichaguasuete.

4Máva piko ndokyhyjemo’ãi ndehegui ha nanemomba’eguasumo’ãi. Nde añómante ningo nde reko porãite, upévare opaite tetãnguéra oúta nemomba’eguasu hag̃ua ojehechauka haguére Nde rembojovake porã ha hekoitépe.

5Ko’ã mba’e rire che, Juan, ama’ẽ ha ojepe’a Ñanderuete rogaguasu, péva ningo pe óga jojohuha yvága pegua,

6ha osẽ 7 yvága rembiguái Ñanderuete rogaguasúgui, oñemondéva ao linoguigua omimbipávape ha ipyti’áre oiporu peteĩ ku’a jokuaha oroguiguáva, ha’ekuéra oguereko umi 7 plága (paha).

7Ha peteĩ umi irundy tekove (apytégui) ome’ẽ umi 7 yvága rembiguáipe 7 ña’ẽmbe oroguiguáva, henyhẽva Ñanderuete pochýgui, Ha’e ningo pe oikovéva ára atyguasu guive umi ára atyguasurãme g̃uarã.

8Ha Ñanderuete rogaguasu henyhẽmba Ñanderuete jajái ratatĩ ha ipu’akágui, ha avave ndaikatúi oike Ñanderuete rogaguasúpe oikopa peve umi 7 plága umi 7 yvága rembiguái ogueraháva (ipópe).

← Chapter 14 Jump to: Chapter 16 →