Revelation 17

Guarani 2015 (Ñanderuete Ñe’ẽ Porã 2015)

← Chapter 16 Jump to: Chapter 18 →

1Ha peteĩ umi 7 yvága rembiguái oguerekóva umi 7 ña’ẽmbe ou che rendápe ha he’i: Eju, ahechaukáta ndéve pe kuña reko vai oñembojovakétavape, oisãmbyhýva iguapyhaguasúgui, oñemohendáva yeta rembe’ýpe,

2ha hendive oñemoangaipa tetã ruvichakuéra oikóva guive yvy ape ári, ha’e omonga’u yvy tetãyguakuérape ivíno heko vai reheguápe.

3Ha pe yvága rembiguái chegueraha che pytúpe desiértope, upépe che ahecha pe kuña reko vai oguapyvahína peteĩ mymba pytãva ári, henyhẽ heta ñe’ẽvaígui ha oñemoĩva Ñanderuete rehe. Upe mymba 7 iñakã ha 10 hatĩ.

4Ha upe kuña péva oñemonde ao pytã hepývape ha ao hovy porãvape, ha ojegua óro, ita vera ha ambue ita hepývape, ipópe oguereko peteĩ váso oroguiguáva henyhẽva heko vai ha heko ky’águi.

5Ha isyváre ojehai: Mba’e ñemimby (secréto) Babilónia pe tavaguasuete, pe teko vai ha teko ky’a sy.

6Ha che, Juan, ahecha pe kuña reko vai oka’u opytávo umi ojeroviáva Hesu Crísto rehe ha heko potĩva ruguykuépe. Ha che py’andýi apytávo.

7Ha pe yvága rembiguái oporandu chéve: Mba’érehepa nepy’andýi repytávo. Che voi ningo amombe’úta ndéve upe kuña reko vai ha upe mymba mba’e ñemimbýgui. Kuña oguapýva pe mymba ári, ha upe mymba oguerekóva 7 akã ha 10 hatĩ.

8Upe mymba rehecha oikova’ekue ha upéi ndaiporivéima, ojupi jevyva’erã pe yvykua pypukuetégui oñehundi jevy hag̃ua; ha umi tetãygua réra ojehai’ỹva pe tekovete kuatiañe’ẽme ipy’andyipáta ohechávo upe mymbápe, oikómiva ha ndaiporivéima ha upéi ou jevy.

9Ojekuaa porã hag̃ua ko’ã mba’e oñekotevẽ arandu rehe (akãporã rehe). Umi 7 akã ningo 7 cérro, ha hi’ári ningo oguapy pe kuña reko vai.

10Umi 7 akã ningo 7 tetã ruvicha, 5 ichuguikuéra okúima, peteĩ oĩ gueteri ha upe ambue ne’ĩra gueteri ou, ha ou ramo ndahi’aremo’ãi.

11Ha upe mymba oikómiva ha ndaiporivéima, upéva ningo pe tetã ruvicha 8-ha, ha’e ramojepe peteĩ umi 7 reheguáva apytépe, ha ha’e ou jevy ramojepe, oúta oñehundi hag̃uántema.

12Umi 10 tatĩ rehecháva ningo 10 tetã ruvicha, ha’ekuéra noisãmbyhýi gueteri, oisãmbyhýta upe mymba oñepyrũvo oisãmbyhy.

13Umi 10 tetã ruvicha oñembopy’apeteĩ ombohasa hag̃ua ipu’aka ha isãmbyhy upe mymbápe g̃uarã.

14Ha’ekuéra oñorãirõta pe Ovechara’y ndive, Ha’e katu ombopoguýta ichupekuéra, Ha’e voi ningo jarakuéra Jára, ha mburuvichakuéra Ruvichaguasuete, ha umi hendive oĩva, Ñanderuete ohenoimava’ekue, Ha’e oiporavova’ekue avei ha oha’ãrõva mborayhupópe Ha’e ou jevy peve.

15Ha pe yvága rembiguái he’ive chéve: Pe yeta nde rehecháva, pe kuña reko vai oguapyhápe, umía ningo heta tetãyguakuéra ha tribukuéra, ñe’ẽnguéra ha tetãnguéra.

16Ha umi 10 hatĩ rehecháva upe mymba rehe, umíva ndaija’emo’ãvéi upe kuña reko vai rehe ha opoíta ichugui, ombo’opívota ichupe, omokõta upe kuña reko vai ro’o ha ipahápe ohapýta ichupe.

17Ñanderuete omoinge ipy’apypekuéra ojapopa hag̃ua pe Ha’e oipotáva, upévare ha’ekuéra oñemoĩ avei peteĩ ñe’ẽme upe mymba ndive, ombohasávo ichupe ipu’aka ha isãmbyhy oikopa peve Ñanderuete he’iukava’ekue.

18Ha upe kuña reko vai rehecháva ningo upéva ha’e pe tavaguasuete oisãmbyhýva tetãnguéra ruvichakuérape.

← Chapter 16 Jump to: Chapter 18 →