Mark 12

Hausa Arabic 2020 (أَتَّوْرَتْ دَ أَنَّبَاوَا)

1سَيْ عِيسَىٰ يَڢَارَ يِمُسُ مَغَنَ دَ مِصَلَيْ؞ يَثٜىٰ «وَنِ مُتُمْ يَيِ غُواْنَرْ إِنَبِے، يَكٜىٰوَيٜىٰتَ دَ كَتَنْ‌غَ، يَحَڧَ وُرِنْ مَڟٜىٰوَرْ یَیَنْ إِنَبِنْ، يَكُمَ غِنَا طَاكِنْ مَيْغَادِ؞ يَبَا وَطَنْسُ مَنُواْمَ هَيَرْ غُواْنَرْ، سَعَنً يَتَڢِے وَتَ ڧَسَا؞

2دَ لُواْكَثِنْ غِرْبِنْ إِنَبِنْ يَيِ، سَيْ يَعَيْكِ وَنِ بَاوَنْسَ وُرِنْ وَطَنْدَ سُكَ كَرْٻِ هَيَرْ غُواْنَرْ دُواْمِنْ يَكَرْٻُواْ مَسَ وَطَنْسُ یَیَنْ إِنَبِے دَغَ غُواْنَرْ؞

3عَمَّا یَنْ هَيَرْ سُكَ كَامَ شِ، سُكَيِ مَسَ دُوكَ، سُكَ سَلَّمٜىٰشِ حَنُّ وُاْڢِ؞

4سَيْ يَسَاكٜىٰ عَيْكَرْ مُسُ وَنِ بَاوَ؞ سُكَ بُغِ وَنَّنْ مُتُمْ عَكَيْ، سُكَيِ مَسَ وُلَڧَنْثِ؞

5يَسَاكٜىٰ عَيْكَرْ وَنِ، وَنَّنْ كُوَ مَنُواْمَنْ سُكَ كَشٜىٰشِ؞ يَعَيْكَ وَطَنْسُ كُمَ دَيَوَ؞ مَنُواْمَنْ سُكَ دُوكٜىٰ وَطَنْسُ، سُكَ كَشٜىٰ وَطَنْسُ؞

6حَرْ يَنْذُ دَيْ يَنَدَ سَوْرَنْ مُتُمْ طَيَ، وَتُواْ طَنْسَ، وَنْدَ يَكٜىٰ ڧَوْنَ؞ عَڧَرْشٜىٰ يَعَيْكٜىٰشِ وُرِنْسُ، يَنَ ثٜىٰوَ ‹أَيْ، ذَاسُبَا طَانَ غِرْمَ؞›

7عَمَّا یَنْ هَيَرْ نَنْ سُكَثٜىٰ وَجُونَ، ‹يَوَّ! غَا وَنْدَ ذَيْثِ غَادُوانْ غُواْنَرْ؞ كُذُواْ مُكَشٜىٰشِ، دُوانْ غَادُوانْسَ يَذَمَ نَامُ؞›

8سَيْ سُكَ كَامَ شِ، سُكَ كَشٜىٰشِ، سُكَجٜىٰڢَرْ دَ غَاوَرْ عَبَايَنْ كَتَنْ‌غَرْ غُواْنَرْ؞»

9عِيسَىٰ يَتَمْبَيٜىٰسُ، يَثٜىٰ «تُواْ، مٜىٰ مَيْ غُواْنَرْ نَنْ ذَيْ يِ؟ أَيْ، ذَيْذُواْ يَهَلَّكَ یَنْ هَيَرْ نَنْ، يَبَادَ غُواْنَرْ غَ وَطَنْسُ؞

10أَشٜىٰ، بَكُ تَٻَ كَرَنْتَ وَنَّنْ رُبُوتَثِّيَرْ مَغَنَرْ اللَّهْ بَ؟ دُوانْ أَرُبُوثٜىٰ يَكٜىٰ ثٜىٰوَ « ‹دُوڟٜىٰنْ دَ مَاسُ غِنِ سُكَڧِ، شِينٜىٰ يَذَمَ دُوڟٜىٰ مَڢِے أَمْڢَانِ أَغِنِ؞

11وَنَّنْ يِنْ عُبَنْ‌غِجِ نٜىٰ، أَبِنْ مَامَاكِ نٜىٰ كُوَ أَعِدَنُونْمُ؞› »

12سَيْ شُوغَبَنِّنْ يَهُودَاوَا سُكَ نٜىٰمِ حَنْيَرْ دَ ذَاسُ كَامَ شِ، دُوانْ سُنْ غَانٜىٰ عَكَنْسُ نٜىٰ يَيِ مِصَالِنْ؞ عَمَّا سُكَجِڟُواْرُوانْ جَمَعَ؞ دُواْمِنْ حَكَ سُكَ بَرْ شِ، سُكَ تَڢِے؞

13أَنَانً، سَيْ عَكَ عَيْكَ وَطَنْسُ ڢَرِسِيَاوَا دَ مُتَنٜىٰنْ هِرُدُسْ، دُواْمِنْ سُسَاوَ عِيسَىٰ تَرْكُواْ عَثِكِنْ مَغَنَرْ دَ ذَيْ ڢَطَا؞

14دَ سُكَ إِسُواْ، سُكَثٜىٰ مَسَ «مَلَمْ، مُنْ سَنِ كَيْ مَيْ غَسْكِيَ نٜىٰ؞ مُتَنٜىٰ دُكْ طَيَ نٜىٰ أَغَرٜىٰكَ، غَمَا بَاكَ نُونَ بَمْبَنْثِ ڟَكَانِنْ مُتَنٜىٰ؞ كُمَ كَنَ كُواْيَرْ دَ حَنْيَرْ اللَّهْ عَثِكِنْ غَسْكِيَ؞ كَنَ غَنِ دَيْدَيْنٜىٰ مُبِيَ وَ كَيْسَرْ وَتُواْ، بَبَّنْ سَرْكِنْ رُواْمَ هَرَاجِ، كُواْ أَعَ؟

15مُبِيَ، كُواْ كَدَ مُبِيَ؟» عَمَّا عِيسَىٰ يَغَانٜىٰ مُنَاڢُنْثِنْسُ، يَثٜىٰ مُسُ «مٜىٰيَسَا كُكٜىٰ ڠُودَ نِے؟ كُكَٰوُاْ مِنِ كُطِنْ دَ عَكٜىٰ بِيَنْ هَرَاجِ دَشِ؞»

16سَيْ سُكَ كَٰوُاْ مَسَ، سَيْيَثٜىٰ مُسُ «حُواْتُواْنَّنْ دَ سُونَنَّنْ نَوَنٜىٰنٜىٰ؟» سُكَثٜىٰ مَسَ «نَ كَيْسَرْ نٜىٰ؞»

17سَيْ عِيسَىٰ يَثٜىٰ مُسُ «تُواْ، كُبَا كَيْسَرْ أَبِنْدَ يَكٜىٰ نَ كَيْسَرْ؞ كُكُمَبَا اللَّهْ أَبِنْدَ يَكٜىٰ نَ اللَّهْ ؞» سَيْ سُكَيِ مَامَاكِنْسَ ڨُورَيْ؞

18وَطَنْسُ سَدُوكِيَاوَا سُكَذُواْ وُرِنْ عِيسَىٰ ؞ سُونٜىٰ سُكٜىٰثٜىٰوَ وَيْ بَا تَاشِنْ مَتَتُّو؞ سُكَ تَمْبَيٜىٰشِ سُكَثٜىٰ،

19«مَلَمْ، مُوسَٰى يَرُبُوتَ مَنَ ثٜىٰوَ عِدَنْ طَنْعُوَنْ مُتُمْ يَمُتُ، يَبَرْ مَاتَرْسَ بَا طَا، دُواْلٜىٰنٜىٰ مُتُمِنْ يَ عَوْرِ مَاتَرْ، يَحَيْڢَ وَطَنْعُوَنْسَ یَیَ؞

20تُواْ، أَݣَويْ وَطَنْسُ یَنْعُوَ مَظَا غُدَا بَݣَويْ؞ نَڢَرْكُوانْ يَيِ عَوْرٜىٰ، يَمُتُ بَيْ بَرْ طَبَ؞

21نَبِيُنْ كُمَ يَ عَوْرٜىٰتَ، شِے مَا يَمُتُ، بَا طَا؞ نَعُكُنْ مَا حَكَ؞

22حَكَ دَيْ دُكَ بَݣَويْ طِنْ، بَاوَنْدَ يَبَرْ طَا؞ عَڧَرْشٜىٰ كُمَ عِتَ مَاتَرْ تَمُتُ؞

23تُواْ، عَتَاشِنْ مَتَتُّو ذَاتَ ذَمَ مَاتَرْ وَنٜىٰنٜىٰ عَثِكِنْسُ؟ غَمَا دُكْ بَݣَويْ طِنْ سُنْ عَوْرٜىٰتَ؞»

24سَيْ عِيسَىٰ يَأَمْسَ يَثٜىٰ مُسُ «أَيْ، تُنَانِنْكُ بَ دَيْدَيْ بَنٜىٰ دُوانْ بَكُسَنْ رُبُوتَثِّيَرْ مَغَنَرْ اللَّهْ بَ، بَكُكُمَ سَنْ إِيكُوانْ اللَّهْ بَ؞

25لُواْكَثِنْ دَ مَتَتُّو ذَاسُ تَاشِ، مَظَا بَذَاسُيِ عَوْرٜىٰ بَ، مَتَ كُمَ بَذَاعَ بَادَسُو غَ عَوْرٜىٰبَ، عَمَّا ذَاسُ ذَمَ كَمَرْ مَلاَىِٕكُنْ دَسُكٜىٰ ثِكِنْ سَمَنٜىٰ؞

26غَمٜىٰ دَ تَاشِنْ مَتَتُّو كُوَ، أَشٜىٰ، بَكُ تَٻَ كَرَنْتَ وَنَّنْ أَ لِتَّڢِنْ مُوسَٰى بَ، دُوانْ أَنْرُبُوتَ ثِكِنْ لَابَرِنْ ڧَرَمِنْ إِتَاثٜىٰنْدَ يَثِ وُتَا ثٜىٰوَ ‹نِنٜىٰ اللَّهْ نَ إِبْرَٰهِيمْ دَ نَ إِسْحَٰڧَ دَ كُمَ نَ يَعْڧُوبَ؟›

27شِ بَ اللَّهْ نَمَتَتُّو بَنٜىٰ، عَمَّا نَمَاسُ رَيْ؞ كُنْيِ بَبَّنْ كُسْكُرٜىٰ؞»

28وَنِ مَلَمِنْ كُواْيَرْوَرْ مُوسَٰى يَذُواْ يَجِ سُنَ مُهَوَرَ دَ جُونَ؞ دَ يَلُورَ ثٜىٰوَ عِيسَىٰ يَبَاسُ أَمْسَ مَيْݣَوْ، سَيْ يَتَمْبَيٜىٰشِ يَثٜىٰ «وَثٜىٰ دُواْكَا ثٜىٰ مَڢِے غِرْمَ دُكَ؟»

29عِيسَىٰ يَأَمْسَ، يَثٜىٰ «مَڢِے غِرْمَ عِتَثٜىٰ، ‹كُجِ، يَا جَمَعَرْ إِسْرَٰٓءِيلَ، عُبَنْ‌غِجِ اللَّهْ نْمُ، عُبَنْ‌غِجِ طَيَ نٜىٰ؞

30سَيْ كَڧَوْنَثِ عُبَنْ‌غِجِ اللَّهْ نْكَ دَ دُكَنْ ذُوثِيَارْكَ دَ دُكَنْ رَنْكَ دَ دُكَنْ حَنْكَلِنْكَ دَ كُمَ دُكَنْ ڧَرْڢِنْكَ؞›

31مَيْبِيٜىٰ دَ عِتَ عِتَثٜىٰ، ‹كَڧَوْنَثِ مَڨُوبْثِنْكَ كَمَرْ يَدَّ كَكٜىٰ ڧَوْنَرْ كَنْكَ؞› بَا وَتَ دُواْكَرْدَ تَڢِے وَطَنَّنْ غِرْمَ؞»

32سَيْ مَلَمِنْ كُواْيَرْوَا يَثٜىٰ وَ عِيسَىٰ «دَيْدَيْ نٜىٰ كَا ڢَطَا مَلَمْ، عُبَنْ‌غِجِ طَيَنٜىٰ، بَا كُوَ وَنِ سَيْ شِ؞

33عَڧَوْنَثٜىٰشِ كُمَ دَ دُكَنْ ذُوثِيَا دَ دُكَنْ تُنَانِ دَ دُكَنْ ڧَرْڢِے، كَكُمَ ڧَوْنَثِ مَڨُوبْثِنْكَ كَمَرْ كَنْكَ، أَيْ، يَڢِ دُكَنْ هَدَايَرْ ڧُواْنٜىٰ ڧُواْنٜىٰ دَ يَنْكٜىٰ يَنْكٜىٰ غِرْمَ؞»

34دَ عِيسَىٰ يَغَ يَدَّ يَيِ مَسَ مَغَنَ دَ حِكِمَ، سَيْيَثٜىٰ مَسَ «كَنَ كُسَدَ مُلْكٍ اللَّهْ ڢَا؞» بَايَنْ وَنَّنْ كُمَ بَاوَنْدَ يَيِ ڧَرْڢِنْ حَلِ يَڧَارَ تَمْبَيَرْسَ وَنِ أَبُ؞

35سَعَدَّ عِيسَىٰ يَكٜىٰ كُواْيَرْوَا أَ هَيْكَلِ سَيْ يَيِ تَمْبَيَ يَثٜىٰ «يَيَ مَلَمً كُواْيَرْوَرْ مُوسَٰى سُكٜىٰثٜىٰوَ أَلْمَسِيحُ طَنْ دَاوُدَ نٜىٰ؟

36دَاوُدَ دَ كَنْسَ، تَوُرِنْ إِيكُوانْ رُوحُ مَيْ ڟَرْكِے يَثٜىٰ، « ‹ عُبَنْ‌غِجِ يَثٜىٰ وَ عُبَنْ‌غِجِنَ ، ذَوْنَ أَ حَنُّنْ دَامَنَ، سَيْنَا سَا أَبُواْكَنْ غَابَنْكَ عَڧَرْڧَشِنْ ڧَڢَاڢُنْكَ؞› »

37«دَاوُدَ دَكَنْسَ يَثٜىٰ دَ أَلْمَسِيحُ ‹ عُبَنْ‌غِجِ ›؞ تُواْ، يَيَ أَلْمَسِيحُ ذَيْ ذَمَ طَا أَوُرِنْ دَاوُدَ؟» دَجِنْ إِرِنْ وَنَّنْ مَغَنَ عَبَاكِنْ عِيسَىٰ، جَمَعَ سُكَجِ دَاطِے؞

38عَثِكِنْ كُواْيَرْوَرْسَ، عِيسَىٰ يَثٜىٰ «كُيِ حَنْكَلِ دَ مَلَمً كُواْيَرْوَرْ مُوسَٰى، سُو مَاسُ سُوانْ سَا مَنْيَنْ رِيغُنَ سُنَ يَٰوُاْ؞ سُنَسُواْ أَغَيْشٜىٰسُ عَكَاسُوَ؞

39سُنَسُواْ كُمَ عَبَاسُ وُرَارٜىٰنْ ذَمَ مَاسُ دَرَجَ أَ مَجَمِعُ دَ وُرَارٜىٰنْ ذَمَ مَاسُ ݣَوْ أَوُرِنْ بِكِ؞

40سُونٜىٰ مَاسُثِنْ كَايَنْ مَاتَانْدَ مَذَنْسُ سُكَ مُتُ؞ سَعَنً سُيِ دُواْغُوَرْ أَدُّعَ دُوانْ أَغَنْسُ؞ أَيْ، سُو ذَاعَيِ مُسُ حُكُنْثِ مَڢِے ڟَنَنِ؞»

41عِيسَىٰ يَنَ ظَوْنٜىٰ أَ هَيْكَلِ وُرِنْ دَ عَكٜىٰ ظُبَ بَيْكُواْ، يَنَ دُوبَنْ يَدَّ جَمَعَ سُكٜىٰ ظُبَ كُطِنْسُ أَعَݣُوتِنْ بَيْكُواْ؞ وَطَنْسُ مَاسُ أَرْزِڧِ دَيَوَ سُنَ ظُبَ كُطِ مَيْ يَوَ؞

42سَيْغَا وَتَ مَتَلَوْثِيَ وَدَّ مِجِنْتَ يَمُتُ، تَذُواْ تَظُبَ یَنْ تَغُلَّ بِيُ دَ بَسُ كَيْ كُواْبُواْبَ؞

43سَيْ عِيسَىٰ يَكِرَا أَلْمَجِرَنْسَ، يَثٜىٰ مُسُ «غَسْكِيَ، إِنَ غَيَ مُكُ، أَبِنْدَ مَتَلَوْثِيَرْ نَنْ وَدَّ مِجِنْتَ يَمُتُ تَظُبَ ثِكِنْ عَݣُوتِنْ، يَاڢِ نَسَوْرَنْسُ دُكَ؞

44دُكَنْسُ سُنْ بَايَرْ دَغَ يَوَنْ أَبِنْدَ سُكٜىٰ دَشِينٜىٰ، عَمَّا عِتَ كُوَ دَغَ ثِكِنْ تَلَوْثِنْتَ تَبَادَ دُكَنْ كُواْمٜىٰ، حَرْ مَا دُكَنْ أَبِنْدَ تَكٜىٰ دُواْغَضَ دَشِ؞»

← Chapter 11 Jump to: Chapter 13 →