Jeremiah 51 — hadiyya

1Waa'i «Baabiloonaa minaadabaa fii'aa massoo hafachcha ki'isoommo.

2Hafachchi bura'a fii'aa massoo'isam Baabiloonam bi'isoo allaggi diina'a asse'oommo; oo bichchi amman afoo ammane kolli hundinnem uulla hawwodda'a diih issitamo.

3Gaadaanim xiyya tokkosseebe'e te'im o'l eddechcha edde'lleebe'e cawwitakkotte; harde'i keeninam qishixxitakka'a eroomma issitakkotte.

4Ixxuwwi beero'uwwi googonne omatta'a letamo.

5An gogoxxi Moollanni Waa'i Isra'ee'l keesammi ihummi eese maham hawwoddota'nnim Isra'eelaa Yihuxxi minaadabaa urummoyyo.

6Baabilooniinsi gibbehe; ki'n foore gatixxitakkeena xollehe; Baabiloo'n baaxii'l mashka'inne kore'a fatakitakkotte; an ixxuwwika baado fireena guzumo'eena gudaammoo ammane.

7Uulli hundam dimbisso'i Baabiloon i anganne yoo worqi injaffisatte; uulli minaadab hundim Baabiloo'n woyi'n diqaasa agaakko; ee bikkina minaadab gaga huushaakko.

8Baabiloon dangonnem ubaa bi'aakkoo bikkina kichche'llehe; ayyi la'ukko fayye'oolas omaroomina qaraare hassehe.

9Eekke'enne hee'llam allaggi ‹Baabiloo'n uullina hara'mmineena hansaa hee'nnummo; ihukkaarem fayye'lleenayyo. Waa'i ixxi malaayyinne hundinnem Baabiloona guzumo'aa hore'oomam bi'iseena hincu bikkina ixxuwwa ullaa ni uulla daba'llinona› yito'o» yukko.

10Waa'i «I minaadaba, ‹Waa'i niina oogataakko; Yerusaaleema mallaa ni Moollanni Waa'i issu luwwi hundam minaadabina kullona› yitakka'a laallehe» yukko.

11Baabiloo'n uulla bi'iseena sawwu bikkina Waa'i Meedoo'n adilluwwa orina ki'isaakko; Keesammi mi'n gindanchikam baado firookkok ee'isinnette. Hawwo afissam ijaajaan ka'isa yita'a ijaajjona; «Ki'nnuwwika xiyya qareessehe; agiram gudissehe.

12Baabiloo'n ootanne hawwo afissakkam mare'e uwwehe; egechcham qoxxissehe; qoto'aanom uullissehe; gafanna egetta'a orantam keenom gudissehe; kaka issitakkamok Waa'i Baabiloo'n minaadabanne sawwukkokaa wocukkokaa wonshoo bikkinatte.

13At lob daajjuwwi gadanonne hee'lloo goddaanchi Baabiloona, kiina qoodamu bichchi doolli afaakko.

14Gogoxxi Moollanni Waa'i Baabiloonanne qawwaawwi'nnoo xigo dut gogota eeboo'isa ixxi summinne hide'aakko; oo gogotim kaa'aa sharookko.

15Waa'i ixxi malaayyinne uulla ixxi qooroominne odim uullanne yoo luwwa qooccukko; ixxi qooroominnem iimane biddiqaa'ukko.

16Iimanenne yoo wo'i ixxi ijaajinne heekke'ookko; duub uulli tochchiinsi waaroo'isa issookko. Xeenaam banqi belecce'oo'isa issookko; dissu beyyiinsi fissaatim hafachchi hafachchoo'isa issookko.

17Manni hundim qawwuwwaa lachchi bee'i keenoo ikko'o; baxxo'i misilluwwi tuussisoohanee foor bee'i keenoo ihu bikkina bukkaa misilluwwa baxookkok baxu qophpha'n waa'uwwanne tuuraakko.

18Ku qophpha'n waa'uwwi awwaad bee'i keenoo naacakkam mu'utaa ihaakko; Waa'i oogateena waaroo ammane bi'llamo.

19Ihukkaarem Yaaqoob Waa'i ixxuwwisayyo; ixxi hundem luwwinam qooccaancho; ixxi gagina annanni minaadab ihoo'isina Isra'ee'l minaadaba doo'llaakko; ixxi summim gogoxxi Moollanni Waa'a.

20Waa'i «Baabiloona; At iina fanxiisaa o'l mu'utaa hee'llitto; keese mulli minaadaba aphphiseena awwaaxxaa hee'ummo.

21Faradoo faradaanoo faraxxi gaare'ee faraxxi gaare'enne afuuttam keenoo iiqanseena keese awwaaxxummo.

22Kiinninne meentoo goonaa, lommanchoo harde'ee, woraadaa landaa iiqansaammo.

23Allaaraanchoo allaachchaa abuullaanchoo ixxeka qaash mirgo'uwwaa gassaanoo lob daannuwwaa bi'iseena mu'ut issaa awwaaxxummo» yukko.

24Waa'i «Baabiloonii Baabiloo'n minaadabii Yerusaaleemanne baxxo'i jor bax bikkina hundinam baado firaa liqaayyo miqummuuyyi moo'llakkamo.

25Baabiloona, uulli hundam gojjoo gojaanchi duuna, an keese iittoombee'ane; an keesenne i anga biddiqaa'aa baalli gaangiinsi onkoroollisoommo; shokku duu'nnisam issoommo.

26Lamejjina te'im uullanne dahimmina ihoo kin kiinniinsi siidamooyyo; at heer heerinam udma'i uulli ikkootto; an Waa'i kaka wocaammo.

27«Hawwo afisimmina xansiisoo mare'e uwwehe; minaadab hundim macceesimma xantamisina xurumba fuggehe. Baabiloona qassamisina minaadaba gudissehe; Araaraaxxek, Miini'ikii Ashkeenaaz adilluwwii qassona kullehe. Gaaxxi awwonsaanchi ihoo mancho uwwehe; xigoom qawwaawwisa ihaakkoo farado eebbehe.

28Baabiloona qassamisina minaadaba gudissehe; mannam qooddehe; meedoo'n adilluwwi beyyo, awwonsaa'n beyyo, o'l ijaajaa'n beyyoo ee'isam ixxuwwi daannoo'm woronne yo'i uullanne hee'llam gogoxxi beyyoo hundam asse'amaano asse'llehe.

29Baabiloonanne ayyim hee'oobee'i udma'i ihoo'isina Waa'i sawwukkoka wonshoo amman ihu bikkina uulli heekke'amaa huxe'oolla.

30Baabiloo'n gaadaan ora uullissa'a girbanne maaxanto'o qoxalla'n tiir bee'aa meentisa ikko'o; beero'oo'mmek ooxxi gooc laqqo'uwwi iiqamaakko; minneewwim giirinne shokkaakko.

31Ixxek beero'i tochchiinsi tochchi afeebe'e amadamukkisa Baabiloo'n adilina kureena mat geerookkok muulli geeroohaannina mat asse'amaanchi mulli asse'amaanchina assoo kureena geerookko.

32Diina'ik gogot daajje higakkam beyyo amadaa waardiyya egerakkam beyyuwwa shokkiisukko; Baabiloo'n gaadaan dambaqqa'a batbatito'o.

33Baabiloon hurbaata ganakkam oodo'isa ihookko; minaadabam ganakkam hurbaaxxesa diina'i ganookko; an gogoxxi Moollanni Waa'i kaka wocaammo» yukko.

34Baabiloo'n adil Nabukadanaxoor Yerusaaleema bogukko; silliqukkome, diih mu'uxxisam issukko; xarakkichchisa minaadaba xuuxukko; danaam danaamooma massaa gatukkoka tufakko'i hurbaaxxisa uunjukko.

35Ee bikkina Xiyoo'n beero'i minaadab «Neesenne afu hawwi Baabiloonanne afona» yitamo; Yerusaalee'm minaadab «Ni xiig dunamukkisam Baabiloo'n mannikim dunamona» yitamo.

36Ee bikkina Waa'i Yerusaalee'm minaadabina «An ki'nnuwwina hara'mmoommo; Baabiloo'n mannikam baado firoommo; Baabiloo'n wo'i bu'uwwii daajjuwwii gogoo'isa issoommo.

37Oo uulli gindamu luwwi tuubbaa wengereelli daabbaroo beyyoo ihookko; ayyim eekke'enne hee'ooyyo; moo'ukkok hundim gadookko.

38Baabiloo'n manni hundim hobbichchisa muuntamo; hobbichchi geexisam quunquuntamo.

39Agginne ixxuwwik orachchi iibboo ammane aggika maadda gudisoommo; dimbiteebee'em agisoommo; ee lasage heer heerina diriittamo; hore'em baqitamoyyo.

40Waa'i «Ixxuwwa gereebbi geexxuwwisaa fella'i ambulluwwisaa durantam beyyo mattamisa issoommo; an Waa'i kaka wocaammo» yukko.

41Waa'i «Baabiloo'n beero'i hinkid amadamukko! Oo heer uulli hundim bakke'am hee'u beero'i hinkid qeefadamukko! Baabiloon hinkid uulli minaadab hundinam maalallatina ihukko!

42Baabiloo'n diina'i cambalaq hambu'llamisa fitta'a beero'onne wo'mmito'o.

43Beero'oom wo'i bee'anee ayyim hee'eenaa eeheen higeenaa xanoobee'i udma'aa ihaakko.

44Baabiloonina qophpha'n waa'i ihu Beela guzumo'oommo; game'amu mu'uttuwwam ixxi angiinsi ubbuusisoommo; kanniinsi eehid mulli minaadab ixxonne otossitamoyyo. «Baabiloo'n oottuwwi ubaakko.

45«I minaadaba, eekke'iinsi gibbakka'a fillehe; baddisoo i quunqiinsim ki'nnuwwi gaga gatixxitakkeena xollehe.

46Macceessakkam kushkushshaaxxi sagariinsi ki'ukkok badditakka'a qoxallan siggoone; hiinchina hiinchina annanni annanni kushkushshaaxxi woshshi wocamookko; uullanne mat adil mulleka qasoo'isa kuroo boqqoo'm kushkushshat macceesamookko.

47Ee bikkina Baabiloo'n qophpha'n waa'uwwa hooroommi amman waarookko; uulli hundannem tuulli ihookko; shakko'i oos hundim beero'i woronne ubbamo.

48Baabiloon hanaa'n qariinsi waatto'i bi'issam kee'n anganne ubu ammane iimanennee uullannee yoo gogot hundim ilil yitamo.

49Baabiloon uulli minaadab hundim beeddoo'isina mashka'i ihaakko; dut Isra'ee'l manni beeddoo'isina mashka'i ihimminne oono'o, Baabiloon gagim ubimmi hasisookko; an Waa'i kaka wocaammo» yukko.

50Waa'i Baabiloonanne yoo minaadabina «Ki'nnuwwi lehiinsi gattakko'i i minaadaba, dassakkoo'n mallehe; qee'l uullanne ikkakka'a eese Waa'a tiillehe; Yerusaaleemam ki'nnuwwi wodanonne sawwi'llehe.

51‹Duumammummi bikkina tuullaammo; Waa'i Keesammi Minenne keesamaakkoo beyyuwwanne allaggi manni aaggo'i bikkina sholle'nnaa horoore heeshaa'nnummo› yi'llehe.

52An Waa'i yoommok kane; «Baabiloo'n qophpha'n waa'uwwanne oogatoommokii uullanne yo'i omatto'i keen u'n sagara macceesissam ammanii waarookko.

53Baabiloon iimane afuta'nnim iim firaakkoo girbam qoxxisuta'n bi'isookkoka asse'oommo; an Waa'i kaka wocaammo» yukko.

54Waa'i «Baabiloo'n laachchiinsi Kalaadaawe'i uulliinsi lobakat bichchik sagar macceesamoolla.

55Dambalaq womoo'llisa gugoo gogot dangonnem Baabiloonanne afookko; Sharukkuuyyi hawwo afisookko; ee'isenne an ixxuwwa bi'isoommo; sa'itamisam issoommo.

56Bi'issam keen Baabiloonanne gaaddamo; Baabiloo'n gaadaanim qeefadantamo; ixxuwwikim xiyyi iiqamukko; an hundinam bito miqoommi Waa'i ihummi bikkina Baabilooninam baxu jollika barche'e miqoommo.

57Gassaan, qoolluwwi, awwonsaan, o'l ijaajaanii gaadaanii agga'a dimbitamisa issoommo; ee lasage iinse'llamo; heer heerinam baqitamoyyo. Kaka wocummok an adila; i summim gogoxxi Moollanni Waa'a!

58Haraar Baabiloo'n oot ubaa buchchanne hamaaramookko; qeeraa'llaa baxamu ooxxi gooccuwwim giirinne shokkookko; minaadaphphi qondoojjim awwaad bee'an ihookko; minaadab baxu luwwi hundim giirinne shokkookko. An gogoxxi Moollanni Waa'i kaka wocaammo» yukko.

59Maahisey beetina beet ihu Neeriy beet Saaraay adil Sedeeqiyaasina hincee'n awwaadaanchi hee'ukko; Sedeeqiyaas Yihuxxi uullanne adil ihu soo'l hiinchonne Saaraay ixxenne maqirem Baabiloona marukko. An Ermiyaasim ee ammane ijaajo uwwummo.

60Baabiloonanne iheena yoo bichchaa ee'isam ixxuwwi bikkina wocamu sagaraa kitaabanne kitaabummo.

61Saaraayinam «Baabiloona affittisam ka kitaabanne kitaabamukkoka hundam ki sagara iimaa'llaa minaadabina qananaa'e.

62Ee lasage ‹Waa'a! At ka beyyo bi'issoo'isa woccaatto; ee bikkina foor yoo mikmikoo soko'i hee'ooyyo; mannii diinatii bi'oo bikkina heer heerinam udma'i ihaa gatookko› yihe.

63Saaraayya, ka kitaaba minaadabina qananaa'llaa lasonne kitaabooma kinanne kattaa Efiraaxiis daajjenne uunje.

64Ee'isam ‹Baabiloonem Waa'i ixxuwwanne eeboommi bichchiinsi ki'ukkok ubba'a gattamo bagaan la'mmaagge ki'lleena xantamoyyo› yihe» yummo. Ermiyaas hiraag ka beyyonne beeddookko.