Ecclesiastes 11

Ilonggo (Maayong Balita nga Biblia (2012))

← Chapter 10 Jump to: Chapter 12 →

1Ibutang ang imo kwarta sa negosyo sa iban nga pungsod, kag sa pila ka adlaw makaganansya ikaw.

2Ibutang ang imo kwarta sa nagakalainlain nga palatikangan kay indi ka makahibalo kon ano nga malain nga kapalaran ang magaabot sa imo sa sini nga kalibutan.

3Kon ang mga gal-om madamol na, nagaulan sa duta. Bisan diin lang ang kahoy matumba, didto ini magapabilin.

4Kon maghulat ka tubtob mag-ayo ang panahon kag indi gid mabaskog ang hangin, indi ka gid makatanom, kag wala ka gid sing may mapatubas.

5Ang Dios naghimo sang tanan, kag subong nga indi ka makahangop kon paano ang pagsugod sang kabuhi sa tiyan sang nagabusong nga babayi, indi ka man makahangop sang ginahimo sang Dios.

6Magtanom ka sa aga kag sa hapon man, kay indi ka gid makahibalo kon magatubo ini sing maayo, ukon diin sini sa ila ang mas maayo sing tubo.

7Maayo nga magkasadya sa matahom nga kapawa sang adlaw.

8Magpasalamat ka sa tagsa ka tuig sang imo pagkabuhi. Bisan daw ano kalawig sang imo pagkabuhi, dumdoma nga mas malawig pa gid ang kamatayon. Wala ka sing palaabuton nga may kapuslanan.

9Mga pamatan-on, magkalipay kamo sa inyo pagkapamatan-on. Magkalipay kamo samtang pamatan-on pa kamo. Himua ninyo ang luyag ninyo himuon kag tumana ang handom sang inyo tagipusoon. Pero dumdoma ninyo nga ang Dios magahukom sa inyo sang bisan ano nga inyo ginahimo.

10Indi kamo magpalibog ukon magkalisod sang bisan ano kay ang pagkapamatan-on umalagi lang.

← Chapter 10 Jump to: Chapter 12 →