Ecclesiastes 7

Ilonggo (Maayong Balita nga Biblia (2012))

← Chapter 6 Jump to: Chapter 8 →

1Ang dungganon nga ngalan mas maayo pa sang sa malahalon nga agwa, kag ang adlaw sang imo pagkapatay mas maayo pa sang sa adlaw sang imo pagkatawo.

2Mas maayo pa ang magkadto sa balay nga may paglalaw sang sa balay nga may pagkinasadya, tungod kay ang buhi dapat magpahanumdom pirme sang ila kaugalingon nga tanan kita nagapadulong sa kamatayon.

3Ang pagkasubo mas maayo sang sa pagkinadlaw, ayhan magamasinulob-on ang imo guya, pero nagadugang ini sang imo paghangop.

4Ang tawo nga buangbuang pirme nagapanumdom nahanungod sang kalipayan. Ang tawo nga maalam nagapanumdom sang kamatayon.

5Mas maayo pa nga sawayon ikaw sang tawo nga maalam sang sa dayawon ikaw sang mga buangbuang.

6Kon ang buangbuang magkadlaw, kaangay ini sang mga tunok nga nagabiti sa kalayo. Wala man ini sing kapuslanan.

7Kon ang isa ka maalam nga tawo magdaya sa isa ka tawo, nagaginawi sia kaangay sang buangbuang. Kon magbaton ka sing hamham, ginapierde mo ang imo kadungganan.

8Mas maayo pa ang katapusan sang isa ka butang sang sa iya ginsugoran. Ang pagpailob mas maayo sang sa pagpabugal.

9Punggi ang imo kaakig. Ang nagahupot sing dumot buangbuang.

10Indi ka gid magpamangkot, “Ngaa mas maayo iya sang una sang sa karon?” Indi amo ini ang pamangkot sang maalam.

11Ang tagsatagsa nga nagakabuhi dapat magmaalam. Subong ini kaayo sang nagabaton ka sing palanublion,

12kag magahatag ini sa imo sing kasigurohan pareho sang ginahatag sang kwarta. Ang kaalam nagatipig sa imo nga indi ka maano—amo ini ang kinaayo sang ihibalo.

13Panumdoma kon ano ang ginhimo sang Dios. Ano ang pagtadlong sang tawo sang ginhimo sang Dios nga tiko?

14Kon yara ka sa maayo nga kahimtangan, magmalipayon ka, kag kon mag-abot ang kapiutan, dumdoma nga ang Dios nagapadala sang kalipay kag kapiutan kag indi ka makahibalo kon ano ang madason nga matabo.

15Ang akon kabuhi nanginwala sing kapuslanan, pero nakita ko ini tanan sa sini nga kabuhi. Ang isa ka tawo nagakapatay bisan nga maayo sia nga tawo, samtang ang isa ka tawo nagapadayon sa pagkabuhi bisan nga malaut sia.

16Gani indi ka gid magtama kaayo ukon magtama kaalam—ngaa patyon mo ang imo kaugalingon?

17Pero indi ka man magtama kalaut ukon kabuang, kay ngaa nga magdali ka sa pagtaliwan sa wala pa ang imo tion?

18Haganhagana lang, kay kon ikaw nagakahadlok sa Dios magamadinalag-on ka.

19Sobra pa ang mahimo sang kaalam sa isa ka tawo sang sa mahimo sang napulo ka mga pangulo sa isa ka siudad.

20Wala gid sing isa ka tawo sa duta nga nagahimo sing matarong sa tanan nga tion kag wala gid nagasayop.

21Indi ka magsapak sa tanan nga ginasiling sang mga tawo, ayhan mabatian mo ang imo suloguon nga nagapakamalaut sa imo,

22kag ikaw gid nakahibalo nga nakapakamalaut ka sang iban nga mga tawo sa madamo nga beses.

23Gingamit ko ang akon kaalam sa pagtilaw sini tanan. Nagtapat ako nga magmaalam, pero indi ko ini malambot.

24Ano ang pagkatungkad sang tawo kon ano ang kahulogan sang kabuhi? Tama ini kadalom para sa aton, tama kabudlay nga hangpon.

25Pero gingamit ko ang akon tion sa pagtuon kag sa pag-angkon sing ihibalo. Nagtapat ako sa pagpangita sang kaalam kag sang mga sabat sa akon mga pamangkot, kag sa paghibalo kon daw ano kalaut kag kabuang sang kabuangan.

26Nasapwan ko nga ang malain nga babayi mas mapait pa sang sa kamatayon. Ang gugma nga iya ginatanyag magadakop sa imo subong sang isa ka siod, ukon subong sang pukot, kag ang iya mga butkon magagapos sa imo subong sang isa ka kadena. Ang isa ka tawo nga nagapahamuot sa Dios makapalagyo, pero ang malain nga babayi magadakop sa makasasala.

27Siling sang Manugwali, huo, nasapwan ko ini sing amat-amat sa nagapangita ako sing mga sabat.

28Nagpangita ako sing iban nga mga sabat pero wala gid ako sing may nakita. Nasapwan ko nga sa 1,000 may isa ka talahaon nga lalaki, pero wala gid sing isa ka talahaon nga babayi.

29Amo ini tanan ang akon nasapwan: ang Dios naghimo sa aton nga simpli lang, pero naghimo kita sing madamo nga mga padugi.

← Chapter 6 Jump to: Chapter 8 →