Ecclesiastes 2

Ilonggo (Maayong Balita nga Biblia (2012))

← Chapter 1 Jump to: Chapter 3 →

1Nagtapat ako sa akon kaugalingon nga magpangalipay ako, kag tilawan ko kon ano ang kalipay. Pero akon nasapwan nga ini wala man sing kapuslanan.

2Nasapwan ko nga ang pagkadlaw kabuangan, kag ang pagpangalipay wala sing pulos.

3Tungod sang akon handom sa pag-angkon sang kaalam, nagtapat ako nga lipayon ko sing bino ang akon kaugalingon kag magpangalipay. Naghunahuna ako nga ayhan amo ini ang pinakamaayo nga paagi nga mahimo sang tawo sa iya malip-ot nga pagkabuhi sa sini nga duta.

4Dalagku nga mga butang ang nahimo ko. Naghimo ako sing mga balay para sa akon kaugalingon kag nagtanom sing mga ubas.

5Naghimo ako sing mga katamnan kag mga hardin, kag sa sini nagtanom sang nanarisari nga mga prutas.

6Naghimo ako sing irigasyon sa pagpatubig sa ila.

7Nagbakal ako sing mga ulipon nga babayi kag lalaki, kag may mga ulipon nga natawo sa akon balay. Mas madamo pa ang akon mga baka sang sa kay bisan sin-o nga nag-estar sa Jerusalem.

8Nagtipon man ako sing mga pilak kag bulawan gikan sa mga manggad sang mga hari sa mga duta nga akon gingamhan. Ang mga lalaki kag mga babayi nagkanta sa paglipay sa akon, kag ang tanan nga mga babayi nga ginahandom sang isa ka lalaki naangkon nakon.

9Huo, nangingamhanan ako, mas gamhanan pa sang sa bisan kay sin-o nga nag-estar sa Jerusalem, kag ang akon kaalam yara gihapon sa akon.

10Ang bisan ano nga luyag ko, naangkon ko. Wala ko gindumilii ang akon kaugalingon sang bisan ano nga kalipayan. Ginpabugal ko ang tanan nga akon ginpangabudlayan, kag amo ini ang akon balos.

11Dayon nagpanghunahuna ako nahanungod sang tanan nga ginhimo ko, kag kon daw ano ang pagpangabudlay ko sa paghimo sini, kag akon natalupangdan nga wala ini sing pulos. Kaangay lang ini sang nagalagas ka sang hangin, wala gid sing kapuslanan.

12Kon sa bagay, ang isa ka hari makahimo lamang sang nahimo na sang nahauna nga mga hari. Gani nagsugod ako sa pagpanumdom kon ano ang kapuslanan sang kaalam, pagkabuang kag kabuangan.

13A, nahibaluan ko, “Ang kaalam mas maayo sang sa kabuangan, subong nga ang kapawa mas maayo sang sa kadudulman.

14Ang maalam nga mga tawo nakahibalo kon diin sila nagapakadto, pero ang mga buangbuang wala makahibalo.” Pero akon man nahibaluan nga pareho man lang ang kapalaran nga nagahulat sa aton tanan.

15Nagpanghunahuna ako sa akon kaugalingon, “Ang matabo sa mga buangbuang matabo man sa akon. Gani ano gid bala ang napulos ko sa akon pagkaalam?” Nagsabat ako, “Wala gid, bisan diutay lang.”

16Wala sing may nagadumdom sang mga maalam, kag wala sing may nagadumdom sang mga buangbuang. Sa palaabuton nga mga adlaw, tanan kita malipatan. Tanan kita, maalam kag buangbuang, mapatay gid.

17Gani ang kabuhi wala sing pulos sa akon, tungod kay ang tanan nga mga butang sa kabuhi wala sing nahatag sa akon kundi kagamo. Ang tanan wala sing kapuslanan, kaangay ako sang naglagas sa hangin.

18Ang tanan nga akon ginpangabudlayan kag akon naangkon wala sing pulos sa akon, tungod kay nahibaluan ko nga akon man lang ini bayaan sa magabulos sa akon,

19kag sin-o bala ang makahibalo kon maalam sia ukon buangbuang? Pero sia magapanag-iya sang tanan ko nga ginpangabudlayan kag sang tanan nga akon naangkon sa sini nga kalibutan tungod sang akon kaalam. Wala ini tanan sing kapuslanan.

20Gani naghinulsol ako nga nagpangabudlay ako sing tudo gid.

21Nagapangabudlay ka sa bug-os mo nga kaalam, ihibalo, kag kinaadman para sa isa ka butang, kag dayon bayaan mo man lang ini sa tawo nga wala magpangabudlay sini. Wala ini sing pulos, kag wala nagakaigo!

22Nagapangabudlay ka kag nagapalibog sa bug-os mo nga pagkabuhi, kag ano bala ang nakuha mo?

23Ang tanan mo nga ginahimo, sa bug-os mo nga pagkabuhi, wala sing iban nga ginadala kundi palaligban kag kasakit sa tagipusoon. Bisan sa kagab-ihon indi gani makapahuway ang imo panghunahuna. Ini tanan wala sing kapuslanan.

24Ang labing maayo nga himuon sang tawo amo ang pagkaon, pag-inom, kag pagpangalipay sa iya pinangabudlayan. Ini man, natalupangdan ko nga nagagikan sa Dios.

25Kay luas sa Dios, sin-o bala ang makakita sing kalan-on kag makapangalipay?

26Ang Dios nagahatag sing kaalam, ihibalo, kag kalipay sa mga nagapahamuot sa iya, pero ginapapangabudlay niya ang mga makasasala sa pagtipon kag sa pagtago, agod ang ila matipon mahatag sa mga nagapahamuot sa iya. Ini tanan wala sing kapuslanan. Kaangay ini sang nagalagas ka sa hangin.

← Chapter 1 Jump to: Chapter 3 →