Ecclesiastes 12

Ilonggo (Maayong Balita nga Biblia (2012))

← Chapter 11 Jump to:

1Gani dumdoma ninyo ang inyo Manunuga samtang pamatan-on pa kamo, sa wala pa mag-abot yadtong masubo nga mga inadlaw kag mga tinuig nga magasiling kamo, “Wala ako sing kalipay sa kabuhi.”

2Ina kon ang kapawa sang adlaw, sang bulan, kag sang mga bituon magadulom para sa inyo, kag ang gal-om wala gid nagakapanas.

3Dayon ang inyo mga kamot nga nagaapin sa inyo magakurog, kag ang inyo mga tuhod nga karon mabakod pa, magaluya. Ang inyo mga ngipon mangin pila na lang ka bilog nga indi na makausang sang pagkaon, kag ang inyo mga mata magadulom kag indi na makakita sing maathag.

4Ang inyo mga dulonggan indi na makabati sang gahod sa kalsada. Daw halos na kamo makabati sang gahod sang galingan samtang nagagaling ini, ukon sang musika nga ginatukar, pero bisan ang kanta sang isa ka pispis magapabugtaw sa inyo sa katulogon.

5Magakahawa kamo sa mataas nga mga lugar, kag ang paglakat makatalagam. Ang inyo buhok magaubanon, kag ang inyo kapagros kag handom madula. Magapauli kita sa aton ilistaran nga dayon, kag sa sadto nga tion bisan sa kalsada makita ang mga nagalalaw.

6Ang kadena nga pilak mabugto, kag ang suga nga bulawan madagdag kag mabuka. Ang higot sang timba mabugto, kag ang timba mawasak.

7Ang aton mga lawas magabalik sa yab-ok sang duta, kag ang ginhawa sang kabuhi magabalik sa Dios, nga amo ang naghatag sini sa aton.

8Wala sing kapuslanan, wala gid sing kapuslanan, siling sang Manugwali. Ang tanan wala sing kapuslanan.

9Pero tungod kay ang Manugwali maalam, nagpadayon sia sa pagtudlo sa mga tawo sang iya nahibaluan. Nagtuon sia sang mga hulobaton kag gintilawan niya nga nagabinagbinag sang kamatuoran sini.

10Ang Manugwali nagtinguha sa pagpangita sing mga pulong sa paglipay, pero ang mga pulong nga iya ginsulat maminatud-on.

11Ang mga hulobaton sang mga mangin-alamon kaangay sang mataliwis nga mga baston nga ginagamit sang mga manugbantay sa pagtuytoy sa mga karnero, kag ang natipon nga mga hulobaton nagapadayon kaangay sang mga lansang nga napadulot sing maayo. Ginhatag ini sang Dios, ang Manugbantay naton tanan.

12Anak, may isa pa ka butang nga dapat talupangdon. Wala sing katapusan ang pagsulat sang mga libro, kag ang sobra nga pagtuon magapalapyo sa imo.

13Sa tapos sini tanan, amo na lang ini ang akon masiling: Magtahod ka sa Dios, kag tumana ang iya mga sugo, tungod kay amo ini ang bug-os nga katungdanan sang tawo.

14Ang Dios magahukom sang tanan nga aton ginahimo, maayo man ukon malain, bisan ang mga butang nga ginahimo sa tago.

← Chapter 11 Jump to: