Matthew 10

Ilonggo (Maayong Balita nga Biblia (2012))

← Chapter 9 Jump to: Chapter 11 →

1Gintawag ni Jesus sing tingob ang iya dose ka mga gintuton-an kag ginhatagan sila sing awtoridad sa pagtabog sang malaut nga mga espiritu, kag sa pag-ayo sang tanan nga mga masakit kag mga balatian.

2Amo ini ang mga ngalan sang dose ka mga apostoles: ang nahauna, si Simon nga ginatawag Pedro, kag si Andres nga iya utod; si Santiago kag si Juan nga iya utod, nga mga anak ni Zebedeo;

3si Felipe kag si Bartolome; si Tomas kag si Mateo nga sadto anay manugsukot sang buhis; si Santiago nga anak ni Alfeo kag si Tadeo;

4si Simon nga makipungsodnon, kag si Judas Iscariote nga sang ulihi nagluib kay Jesus.

5Ginpadala ni Jesus ining dose ka mga apostoles kag gintudloan sila sang mga masunod nga ila pagahimuon: “Indi kamo magkadto sa duta sang mga Hentil ukon sa mga banwa sang Samaria,

6kundi kadtoi ninyo ang mga tawo sang Israel nga kasubong sang mga karnero nga nagkaladula.

7Lakat kamo kag iwali, ‘Ang Ginharian sang langit malapit na!’

8Ayuha ninyo ang mga masakiton, banhawa ang mga patay, ayuha ang mga aruon, kag tabuga ninyo ang mga demonyo. Nakabaton kamo nga wala magbayad, gani maghatag man kamo nga indi magpabayad.

9Indi kamo magdala sing bulawan, pilak ukon saway nga sensilyo sa inyo mga bulsa.

10Indi kamo magdala sing bag sa inyo pagpanglakaton, ukon ilislan nga bayu, ukon ilislan nga mga sandalyas, ukon sungkod, kay ang mga nagapangabudlay dapat hatagan sang ila mga kinahanglanon.

11“Kon magsulod kamo sa bisan diin nga banwa ukon barangay, pangitaa ninyo ang luyag magbaton sa inyo, kag magdayon kamo upod sa iya tubtob sa inyo paghalin sa sadto nga lugar.

12Sa inyo pagsulod sa isa ka balay, magsiling kamo, ‘Ang paghidait manginyara sa inyo.’

13Kon ginabaton kamo sang mga tawo sa sina nga balay, paluntara ang inyo paghidait sa sina nga panimalay. Pero kon indi sila magbaton sa inyo, bawia ninyo ang inyo pag-abiabi.

14Kag kon may mga panimalay ukon banwa nga indi magbaton ukon magpamati sa inyo, bayai ina nga lugar kag taktaka ang yab-ok sa inyo mga tiil.

15Dumdoma ninyo ini! Sa Adlaw sang Paghukom, ang Dios mas magamaluloy-on pa sa mga tawo sang Sodoma kag Gomorra sang sa mga tawo sa sina nga banwa!

16“Pamatii ninyo ini! Ginapadala ko kamo subong nga mga karnero sa tunga sang mga lobo. Magmainandamon kamo subong sang mga man-og, kag magmabuot subong sang mga pating.

17Mag-andam kamo kay may mga tawo nga magadakop kag magadala sa inyo sa hukmanan, kag pagabunalon kamo nila sa ila mga sinagoga.

18Isumbong kamo sa atubang sang mga pangulo kag mga hari tungod sa akon agod sa pagsugid sang Maayong Balita sa ila kag sa mga Hentil.

19Kon ginasumbong nila kamo, indi kamo magpalibog kon ano ang inyo inugsabat ukon paano ang inyo pagsabat, kay kon mag-abot ina nga tion pagatudloan kamo sang inyo isiling.

20Kay ang inyo ihambal indi inyo kundi iya sang Espiritu sang inyo Amay nga magahambal paagi sa inyo.

21“Ang mga tawo magatugyan sang ila mga utod agod patyon, subong man ang mga amay sa ila mga kabataan, ang mga anak magabato sa ila mga ginikanan kag magapapatay sa ila.

22Pagadumtan kamo sang tanan nga mga tawo tungod sa akon, pero ang bisan sin-o nga nagapadayon tubtob sa katapusan maluwas.

23Kon sila maghingabot sa inyo sa isa ka banwa, magpalagyo kamo sa masunod nga banwa. Nagapasalig ako sa inyo, sa wala pa ninyo matapos ang inyo bulohaton sa tanan nga mga banwa sang Israel ang Anak sang Tawo magaabot.

24“Wala sing estudyante nga maglabaw pa sang sa iya maestro, ukon ulipon nga maglabaw pa sang sa iya agalon.

25Gani tuman na sa estudyante nga manginpareho sa iya maestro, kag sa ulipon nga manginpareho sa iya agalon. Kon ang pangulo sang panimalay ginatawag Beelzebul, ano pa gid ayhan kalain ang pagtawag nila sang mga katapo sina nga panimalay!

26“Gani, indi kamo magkahadlok sa mga tawo, kay wala sing ginatabunan nga indi mabuksan, kag wala sing sekrito nga indi mabuyagyag.

27Ang ginasiling ko sa inyo sa madulom ihambal ninyo sa masanag, kag ang inyo mabatian sa hutik isinggit ninyo gikan sa atop sang mga balay.

28Indi kamo magkahadlok sa mga makapatay sang lawas pero indi makapatay sang kalag; sa baylo magkahadlok kamo sa Dios nga makalaglag sang lawas kag kalag sa impierno.

29Indi bala sarang mabakal ang duha ka magamay nga pispis sang diutay lang nga kantidad? Pero wala sing isa sa ila nga mahulog sa duta nga wala sing pahanugot sang inyo Amay.

30Kag kon nahanungod sa inyo, bisan pa ang mga buhok sa inyo ulo naisip tanan.

31Gani indi kamo magkahadlok, kay mas mahal pa kamo kaayo sang sa magamay nga mga pispis!”

32“Ang bisan sin-o nga magkilala sa akon sa atubang sang mga tawo, kilalahon ko man sia sa atubang sang akon Amay sa langit.

33Pero ang bisan sin-o nga indi magkilala sa akon sa atubang sang mga tawo, indi ko man sia pagkilalahon sa atubang sang akon Amay nga yara sa langit.

34“Indi kamo maghunahuna nga nag-abot ako sa kalibutan sa pagdala sing paghidait. Wala ako mag-abot sa pagdala sing paghidait kundi kagamo.

35Nag-abot ako sa pagpaaway sang anak nga lalaki batok sa iya amay, sang anak nga babayi batok sa iya iloy, sang umagad nga babayi batok sa iya ugangan nga babayi.

36Ang pinakamalain nga mga kaaway sang tawo amo ang katapo sang iya kaugalingon nga panimalay.

37“Ang bisan sin-o nga nagahigugma sang iya amay ukon iya iloy sing mas labi pa sang sa akon, indi angay nga mangin-akon gintuton-an. Ang bisan sin-o nga nagahigugma sang iya anak nga lalaki kag anak nga babayi sing mas labi pa sang sa akon, indi angay nga mangin-akon gintuton-an.

38Ang bisan sin-o nga wala nagapas-an sang iya krus kag nagasunod sa akon, indi angay nga mangin-akon gintuton-an.

39Ang bisan sin-o nga nagapaniguro sang iya kabuhi madula niya ini, pero ang bisan sin-o nga nagadula sang iya kabuhi tungod sa akon maangkon niya ini.

40“Ang bisan sin-o nga nagabaton sa inyo nagabaton sa akon, kag ang bisan sin-o nga nagabaton sa akon nagabaton man sa nagpadala sa akon.

41Ang bisan sin-o nga nagabaton sang mensahero sang Dios, tungod kay mensahero sia sang Dios may parti sia sang balos nga para sa mensahero sang Dios. Ang bisan sin-o nga nagabaton sang matarong nga tawo tungod kay sia matarong nga tawo, may parti sia sang balos nga para sa matarong nga tawo.

42Dumdoma ninyo ini! Ang bisan sin-o nga nagapainom sang bisan isa lamang ka baso nga mabugnaw nga tubig sa isa sining akon pinakakubos nga mga gintuton-an, tungod kay gintuton-an ko sia, magabaton gid sang iya balos.”

← Chapter 9 Jump to: Chapter 11 →