Matthew 25

Ilonggo (Maayong Balita nga Biblia (2012))

← Chapter 24 Jump to: Chapter 26 →

1“Sa sina nga tion ang Ginharian sang langit mapaanggid sa napulo ka mga dalaga nga nagdala sang ila mga suga kag naglakat sa pagsugat sang lalaki nga kalasalon.

2Ang lima sa ila mga buangbuang kag ang lima maalam.

3Ang mga buangbuang nagdala sang ila mga suga ugaling wala sila magbalon sing lana.

4Ang mga maalam nagdala sang mga tibodtibod nga puno sang lana para sa ila mga suga.

5Kadugay mag-abot sang lalaki nga kalasalon, gani tinuyo ang mga dalaga kag natulogan.

6“Sang tungang gab-i na may nagsinggit, ‘Yari na ang lalaki nga kalasalon! Dali kamo kag sugata ninyo sia!’

7Ang napulo ka mga dalaga nagmata kag nag-aman sang ila mga suga.

8Dayon ang mga buangbuang nagsiling sa mga maalam, ‘Hatagi kami sang inyo lana, kay nagapiraw na ang amon mga suga.’

9Ang mga maalam nagsabat, ‘Indi mahimo, kay basi kon indi ini makaigo sa inyo kag sa amon. Kadto kamo sa tiyanggi kag magbakal kamo para sa inyo kaugalingon.’

10Gani ang mga dalaga nga buangbuang naglakat sa pagbakal sang lana, kag sang nakalakat sila amo man ang pag-abot sang lalaki nga kalasalon. Ang lima ka dalaga nga nakaaman nag-upod sa iya sa punsyon, kag ginsirahan ang pwertahan.

11“Dugaydugay nag-abot ang iban nga mga dalaga kag nagpanawag, ‘Sir, sir! Pasudla kami!’

12Pero ang lalaki nga kalasalon nagsabat, ‘Nagasiling ako sa inyo, wala ako makakilala sa inyo.’”

13Kag si Jesus nagsiling, “Gani magbantay kamo, tungod kay wala kamo makahibalo sang adlaw ukon sang takna.

14“Sa sadto nga tion ang Ginharian sang langit kaangay sang isa ka tawo nga manuglakat sa iban nga lugar. Gintawag niya ang iya mga suloguon kag gintugyan niya sa ila ang iya mga pagkabutang.

15Ginhatagan niya ang kada isa sa ila suno sa ila ikasarang. Ginhatagan niya ang isa sing 5,000 pisos, ang isa sing 2,000 pisos, kag ang isa pa gid sing 1,000 ka pisos. Dayon naglakat sia.

16Ang suloguon nga nakabaton sing 5,000 pisos naglakat sa gilayon kag iya ginpatikang ang iya kwarta, kag nakaganansya sia sing 5,000 pisos.

17Amo man ang suloguon nga nakabaton sing 2,000 pisos, nakaganansya man sia sing 2,000 pisos.

18Pero ang nakabaton sing 1,000 ka pisos naglakat kag nagkutkot sa duta, kag ginlubong niya ang kwarta sang iya agalon.

19“Sa tapos ang malawig nga panahon nagbalik ang agalon kag nagpakighusay sa iya mga suloguon.

20Ang suloguon nga nakabaton sing 5,000 pisos nagsulod kag nagdala sing 5,000 pisos. Nagsiling sia, ‘Ginoo, ginhatagan mo ako sing 5,000 pisos. Yari pa gid ang 5,000 pisos nga akon naganansya.’

21Ang iya agalon nagsiling sa iya, ‘Maayo gid, maayo kag matutom nga suloguon! Tungod kay matutom ka magpatikang sang diutay nga kantidad karon, ikaw ang padumalahon ko sang dalagku pa gid nga kantidad. Dali diri kag mag-ambit sang akon kalipay!’

22Dayon ang suloguon nga nakabaton sing 2,000 pisos nagsulod kag nagsiling, ‘Ginoo, ginhatagan mo ako sing 2,000 pisos. Yari pa gid ang 2,000 pisos nga akon naganansya.’

23Ang iya agalon nagsiling, ‘Maayo gid, maayo kag matutom nga suloguon! Tungod kay matutom ka magpatikang sang diutay nga kantidad, karon ikaw ang padumalahon ko sang dalagku pa gid nga kantidad. Dali diri kag mag-ambit sang akon kalipay!’

24Dayon ang suloguon nga nakabaton sing 1,000 ka pisos nagsulod kag nagsiling, ‘Ginoo, nakahibalo ako nga mabudlay ikaw nga tawo, nagaani ka sa wala mo matamni kag nagatipon sang patubas sa wala mo masab-ugi.

25Hinadlukan ako, gani naglakat ako kag gintago ko ang imo kwarta sa duta. Yari ang imo kwarta.’

26Ang iya agalon nagsiling, ‘Malain kag matamad ka nga suloguon! Nakahibalo ka gali nga ako nagaani sa wala ko matamni kag nagatipon sang patubas sa wala ko masab-ugi?

27Ti, kuntani ginpatago mo sa bangko ang akon kwarta, agod sa akon pagbalik mabaton ko ang akon kwarta upod sang iya saka.

28Karon, kuhaa ninyo ang kwarta sa iya kag ihatag sa suloguon nga may 10,000 pisos.

29Kay ang tagsatagsa nga may iya, hatagan pa gid, kag magasulobra ang iya pagkabutang. Pero sia nga wala sing iya, bisan pa ang diutay niya nga pagkabutang kuhaon pa sa iya.

30Nahanungod sa sining walay pulos nga suloguon, ihaboy sia ninyo sa kadudulman sa gwa. Didto magahibi sia kag magabagrot ang iya mga ngipon.’

31“Kon ang Anak sang Tawo mag-abot subong Hari, nga ginaupdan sang tanan nga mga anghel, magapungko sia sa iya harianon nga trono,

32kag ang tanan nga mga tawo sa kalibutan pagatipunon sa iya atubang. Dayon painon niya sila sa duha ka grupo, subong nga ang manugbantay nagapain sang mga karnero sa mga kanding.

33Ipahamtang niya ang mga karnero sa iya tuo, kag ang mga kanding sa iya wala.

34Dayon ang Hari magasiling sa mga tawo sa iya tuo, ‘Dali kamo nga ginpakamaayo sang akon Amay. Panublia ninyo ang Ginharian nga gin-aman sa inyo halin pa sa pagtuga sang kalibutan.

35Kay gingutom ako kag ginpakaon ninyo ako, gin-uhaw ako kag ginpainom ninyo ako, dumoluong ako kag ginpadayon ninyo ako sa inyo mga balay,

36hubo ako kag ginpabayuan ninyo ako, nagmasakit ako kag gin-atipan ninyo ako, nabilanggo kag ginbisitahan ninyo ako.’

37Dayon ang mga matarong magasabat sa iya, ‘San-o bala, Ginoo, nga nakita ka namon nga nagutom kag ginpakaon ka namon, ukon nauhaw kag ginpainom ka namon?

38San-o ka bala namon nakita nga dumoluong kag ginpadayon ka sa amon nga mga balay, ukon hubo kag ginpabayuan ka namon?

39San-o ka bala namon nakita nga nagmasakit ukon nabilanggo kag ginbisitahan ka namon?’

40Ang Hari magasabat, ‘Nagasiling ako sa inyo, kon inyo ini nahimo sa isa sang labing kubos sining akon mga utod, ginhimo ninyo ini sa akon!’

41“Dayon magasiling sia sa mga tawo sa iya wala, ‘Palayo kamo sa akon, mga ginpakamalaut sang Dios! Didto kamo sa kalayo nga wala sing katapusan nga gin-aman sa Yawa kag sa iya mga anghel!

42Kay gingutom ako kag wala ninyo ako pagpakan-a, gin-uhaw ako kag wala ninyo ako pagpaimna,

43dumoluong ako kag wala ninyo ako pagpadayuna sa inyo mga balay, hubo ako kag wala ninyo ako pagpabayui, nagmasakit ako kag ginbilanggo pero wala ninyo ako pagbisitahi.’

44Dayon magasabat sila sa iya, ‘Ginoo, san-o ka bala namon nakita nga gingutom ukon gin-uhaw ukon dumoluong ukon hubo ukon nagamasakit ukon ginabilanggo, kag wala kami magbulig sa imo?’

45Dayon ang Hari magasabat sa ila, ‘Nagasiling ako sa inyo, kon wala ninyo paghimua ini sa isa sining mga labing kubos, wala man ninyo mahimo ini sa akon.’

46Ini sila pagatabugon pakadto sa wala sing katapusan nga silot, pero ang mga matarong magakadto sa kabuhi nga wala sing katapusan.”

← Chapter 24 Jump to: Chapter 26 →