Matthew 24 — Ilonggo (Maayong Balita nga Biblia (2012))

1Naggwa si Jesus sa Templo kag sang nagalakat sia, ang iya mga gintuton-an nagpalapit kag ila gintudlo sa iya ang mga balay sang Templo.

2Si Jesus nagsiling sa ila, “Nakita ninyo ina tanan, indi bala? Nagasiling ako sa inyo: wala sing bisan isa ka bato nga mabilin nga nagatungtong pa sa ibabaw sang isa ka bato, kay ang tanan pagagub-on.”

3Sang nagapungko si Jesus sa Bukid sang mga Olivo, ang mga gintuton-an nagpalapit sa iya nga silahanon lang. Nagpamangkot sila, “Sugiri kami, san-o bala ini mahanabo kag ano ang tanda sang imo pag-abot kag sang katapusan sini nga panag-on?”

4Si Jesus nagsabat, “Mag-andam kamo nga indi kamo pagpatalangon ni bisan sin-o,

5kay madamo nga mga tawo ang magaabot sa akon ngalan kag magasiling, ‘Ako amo ang Cristo!’ kag magapatalang sila sang madamo.

6Mabatian ninyo ang mga linupok sang inaway sa malapit kag ang mga balita sang gira sa malayo nga mga lugar, pero indi kamo magpakulba. Ini nga mga butang dapat matabo gid man pero indi pa ini ang katapusan.

7Ang isa ka pungsod magasalakay sa isa ka pungsod, ang isa ka ginharian magagubat sa isa ka ginharian. May mga gutom kag mga linog sa bisan diin nga lugar.

8Ini tanan nga mga butang kaangay sang pagsugod sang pagpasakit sang nagapanganak.

9“Dayon pagadakpon kamo kag igatugyan agod silutan kag patyon. Pagadumtan kamo sang tanan nga mga tawo tungod sa akon.

10Sa sadto nga tion madamo ang magabiya sang ila pagtuo, magaluibay sila kag magadinumtanay.

11Dayon magagwa ang madamo kag di-matuod nga mga propeta kag magapatalang sang madamo nga mga tawo.

12Tungod sang pagdamo sang kalautan ang gugma sang madamo nga mga tawo magatahaw.

13Pero ang bisan sin-o nga nagapadayon tubtob sa katapusan maluwas.

14Kag ining Maayong Balita nahanungod sa Ginharian iwali sa bug-os nga kalibutan, subong saksi sa tanan nga katawhan, kag ugaling magaabot ang katapusan.

15“Makita ninyo ang nagatindog sa lugar nga balaan ‘Ang Makakulogmat nga Kangil-aran,’ nga gintagna ni Daniel nga propeta.” (Ang nagabasa maghangop sang kahulogan sini!)

16“Dayon ang mga yara sa Judea dapat magpalagyo sa kabukiran.

17Ang tawo nga yara sa atop sang iya balay indi na dapat mag-usik sang tion sa pagpanaog sa pagkuha sang iya mga pagkabutang sa sulod sang balay.

18Ang tawo nga yara sa uma indi na magbalik kag magkuha sang iya kunop.

19Makaluluoy man ang mga babayi nga nagabusong sa sadto nga mga adlaw, kag ang mga iloy nga may ginapasuso!

20Magpangamuyo kamo sa Dios nga ang inyo pagpalagyo indi matuon sa tigtulognaw ukon sa Adlaw nga Inugpahuway!

21Kay ang pag-antos sa sadto nga tion mas sobra pa ka makangilidlis sang sa kinagamo nga natabo halin sa ginsugoran sang kalibutan tubtob sa sini nga adlaw, kag wala na sing hitabo sa palaabuton nga kaangay sini liwat.

22Pero ang Dios nagpalip-ot na sang mga inadlaw, kay kon wala niya paghimua ini wala sing tawo nga maluwas. Pero tungod sa iya mga pinili nga mga tawo, pagapalip-uton sang Dios yadto nga mga inadlaw.

23“Gani, kon may magsiling sa inyo, ‘Tan-awa, yari ang Cristo!’ ukon ‘Ato sia!’—indi kamo magpati sa iya.

24Kay magagwa ang di-matuod nga mga Cristo, kag di-matuod nga mga propeta, kag magapakita sila sing dalagku nga mga tanda kag makatilingala nga mga buhat agod sa pagpatalang kon mahimo, bisan pa sang mga pinili sang Dios.

25Pamati kamo! Ginasiling ko na ini sa inyo sa wala pa mag-abot ang tion.

26“Gani kon ang mga tawo magsiling sa inyo, ‘Tan-awa, ato sia sa desierto!’—indi kamo magkadto didto, ukon magsiling sila, ‘Tan-awa, nagapanago sia diri!’—indi kamo magpati.

27Kay ang Anak sang Tawo magaabot subong sang kilat nga nagakirab halin sa sidlangan pakadto sa nakatundan.

28“Kon diin may lawas nga patay, didto nagatipon ang mga uwak.

29“Sa tapos ang kalalat-an sa sadto nga mga inadlaw, ang adlaw magadulom, kag ang bulan indi na magsanag, ang mga bituon magakalahulog gikan sa langit, kag ang mga gahom sa kahawaan pagapatalangon sa ila mga alagyan.

30Dayon mapahayag sa langit ang tanda sang Anak sang Tawo, kag ang tanan nga mga katawhan sang duta magahilibion kag makita nila ang pag-abot sang Anak sang Tawo sa mga panganod sang langit nga may gahom kag daku nga himaya.

31Sa pagtunog sang daku nga trumpeta magapadala sia sang iya mga anghel sa bug-os nga kalibutan, kag tipunon nila ang iya pinili nga mga tawo gikan sa tanan nga bahin sang kalibutan.

32“Magtuon kamo sing leksyon sa kahoy nga higera. Kon ang iya mga sanga magpanglumbay na, inyo mahibaluan nga malapit na lang ang tingadlaw.

33Sa amo man nga bagay, kon makita ninyo ini tanan nga mga butang, inyo mahibaluan nga malapit na sia, kag madali na lang mag-abot.

34Dumdoma ninyo nga mahanabo ini tanan nga mga butang sa wala pa magkalamatay ang mga tawo nga nagakabuhi subong.

35Ang langit kag ang duta magataliwan, pero ang akon mga pulong indi magtaliwan.

36“Ugaling kon san-o maabot ina nga adlaw kag takna, wala gid sing may nakahibalo, bisan pa ang mga anghel sa langit, ukon ang Anak, kundi ang Amay lang.

37Subong sang nahanabo sang panahon ni Noe, amo man ang mahanabo sa pag-abot sang Anak sang Tawo.

38Kay subong sang mga adlaw nga wala pa ang Anaw, ang mga tawo nagakinaon kag nagailinom, nagapalangasawa kag nagapalamana tubtob gid sa adlaw nga si Noe nagsulod sa arka.

39Wala gid sila nakahibalo kon ano ang nagakahanabo tubtob nga nag-abot ang Anaw kag nagkalalumos sila tanan. Subong man sini ang mahanabo sa pag-abot sang Anak sang Tawo.

40Sa sadto nga tion may duha ka tawo nga magaobra sa talamnan: ang isa kuhaon, kag ang isa mabilin.

41May duha ka babayi nga magagaling: ang isa kuhaon, kag ang isa mabilin.

42Gani magbantay kamo, tungod kay wala kamo makahibalo kon ano nga adlaw maabot ang inyo Ginoo.

43Dumdoma ninyo ini! Kon ang tagbalay nakahibalo kon sa ano nga tion sang gab-i ang makawat magaabot, pat-ud gid nga magapulaw sia kag indi sia magtugot nga ang makawat makarungkab sang iya balay.

44Gani dapat man kamo maghanda pirme, tungod kay sa takna nga wala ninyo ginapaabot, ang Anak sang Tawo magaabot.

45“Karon sin-o bala ang matutom kag maalam nga suloguon? Sia amo ang gintugyanan sang iya agalon sa pagdumala sang iban nga mga suloguon, kag sa paghatag sa ila sang ila pagkaon sa nagakaigo nga tion.

46Daw ano ka malipayon yadto nga suloguon nga sa pagpauli sang iya agalon masapwan sia nga nagahimo sang iya bulohaton!

47Nagasiling ako sa inyo, nga sia ang padumalahon sang iya agalon sang tanan niya nga pagkabutang.

48Pero kon malain sia nga suloguon magasiling sia sa iya kaugalingon, ‘Dugay pa mabalik ang akon agalon,’

49kag magasugod sia sa pagpamintas sang iya kaupod nga mga suloguon, kag magkaon kag mag-inom upod sa mga palahubog.

50Dayon ang agalon sadto nga suloguon magaabot sa adlaw nga wala niya sia ginapaabot kag sa tion nga wala niya mahibaloi.

51Ang agalon magahatukhatok sa iya kag magasilot sa iya upod sa mga hipokrito. Didto magahibi sia kag magabagrot sang iya mga ngipon.