Matthew 12 — Ilonggo (Maayong Balita nga Biblia (2012))

1Isa sadto ka tion sa Adlaw nga Inugpahuway, si Jesus nag-agi sa tunga sang kaumhan sang trigo. Gingutom ang iya mga gintuton-an, gani nagpangutol sila sang mga uhay sang trigo kag ginkaon ini.

2Sang makita ini sang mga Fariseo, nagsiling sila kay Jesus, “Tan-awa bala, ang ginahimo sang imo mga gintuton-an batok sa Kasugoan sa Adlaw nga Inugpahuway!”

3Si Jesus nagsabat, “Wala bala ninyo mabasahi ang ginhimo ni David sang sia kag ang iya mga kaupdanan gingutom?

4Nagsulod sia sa balay sang Dios, kag ginkaon niya upod sang iya mga tinawo ang tinapay nga nahalad sa Dios, bisan pa batok sa Kasugoan para sa ila ang magkaon sadto nga tinapay. Kay yadto nga tinapay para lamang sa mga pari.

5Kag wala bala ninyo mabasahi sa Kasugoan ni Moises nga sa Adlaw nga Inugpahuway, ang mga pari sa templo nagalapas sang Kasugoan sa tagsa ka Adlaw nga Inugpahuway, pero wala man sila makasala?

6Nagasiling ako sa inyo, may yari diri nga mas importante pa sang sa Templo.

7Kon inyo lamang nahibaluan kon ano ang kahulogan sini nga kasulatan, ‘Indi mga halad nga sapat ang luyag ko, kundi ang pagkamaluloy-on,’ wala ninyo kuntani paghukmi ang mga wala sing sala.

8Kay ang Anak sang Tawo amo ang Ginoo sang Adlaw nga Inugpahuway.”

9Naghalin si Jesus sa sadto nga lugar kag nagsulod sa ila sinagoga, sa diin

10may isa ka tawo didto nga naitus ang iya kamot. May mga tawo man didto nga luyag magsumbong kay Jesus tungod sang iya mga ginahimo. Gani nagpamangkot sila sa iya, “Ginatugot bala sa aton Kasugoan ang pagpamulong sa Adlaw nga Inugpahuway?”

11Si Jesus nagsabat, “Abi kon ang isa sa inyo may karnero nga nahulog sa madalom nga buho sa Adlaw nga Inugpahuway, ano bala ang himuon niya? Indi bala niya pagkuhaon ini sa buho?

12Ang tawo mas labi pa ka mahal sang sa karnero! Gani ang aton Kasugoan nagatugot sa aton sa paghimo sing maayo sa isa ka tawo bisan pa sa Adlaw nga Inugpahuway.”

13Dayon nagsiling si Jesus sa tawo, “Untaya ang imo kamot.” Gin-untay niya ini kag nag-ayo kasubong sang pihak niya nga kamot.

14Pero ang mga Fariseo naglakat kag nagplano sa pagpatay kay Jesus.

15Sang mahibaluan ni Jesus ang plano batok sa iya, naghalin sia sa sadto nga lugar kag ginsunod sia sang madamo nga mga tawo. Gin-ayo niya ang tanan nga mga masakiton,

16kag ginmanduan nga indi sila magpanugid sa iban nahanungod sa iya.

17Ginhimo niya ini agod matuman ang ginsiling ni Isaias nga propeta:

18“Yari ang akon alagad nga akon ginpili, ang akon hinigugma nga sa iya nahamuot ako. Ibutang ko sa iya ang akon Espiritu, kag sia magapahibalo sang akon paghukom sa mga kapungsoran.

19Indi sia magbais ukon magsinggit, ukon mabatian ang iya matunog nga hambal sa mga dalan.

20Magamalulo sia sa mga maluya, kag magamaayo sa indi makasarang, tubtob iya madala ang katarungan sa pagdaog,

21kag ang tanan nga mga tawo magasalig sa iya.”

22Dayon may mga tawo nga nagdala sa kay Jesus sang isa ka tawo nga bulag kag apa, tungod kay ginagamhan sia sang demonyo. Gin-ayo ni Jesus ini nga tawo, sa bagay nga makahambal kag makakita na sia.

23Natingala gid ang tanan nga mga tawo gani nagpinamangkutanay sila, “Sia na ayhan ang Anak ni David?”

24Sang pagkabati sini sang mga Fariseo nagsiling sila, “Ginatabog niya ang mga yawa tungod kay si Beelzebul nga pangulo sang mga demonyo naghatag sa iya sing gahom sa paghimo sini.”

25Si Jesus nakahibalo sang ila panghunahuna, gani nagsiling sia sa ila, “Kon ang mga pumoluyo sang isa ka pungsod nagabinahinbahin kag nagailinaway, ina nga pungsod malaglag. Kon ang mga pumoluyo sang isa ka banwa ukon mga katapo sang isa ka panimalay nagabinahinbahin kag nagailinaway, ina nga banwa ukon panimalay magabuloblag.

26Gani kon ang mga ginsakpan ni Satanas magbinahinbahin kag mag-ilinaway, ang iya ginharian magabuloblag!

27Nagasiling kamo nga ako nagatabog sang mga demonyo tungod sang gahom nga ginhatag sa akon ni Beelzebul. Ti, karon sin-o bala ang nagahatag sing gahom sa inyo mga sumolunod sa pagtabog sa ila? Ang ginahimo sang inyo mga sumolunod amo man ang nagapamatuod nga nagsayop gid kamo!

28Indi si Beelzebul, kundi ang Espiritu sang Dios amo ang naghatag sa akon sing gahom sa pagtabog sang mga demonyo, gani ini nagapamatuod nga ang paghari sang Dios nag-abot na sa inyo.

29“Wala sing may makasulod sa balay sang makusog nga tawo sa pagkuha sang iya mga pagkabutang luas lang kon iya anay gapuson ang makusog nga tawo, dayon sarang na sia makapanguha sang bisan ano nga butang sa amo nga balay.

30“Ang bisan sin-o nga wala nagaapin sa akon batok sa akon, ang bisan sin-o nga wala nagatipon upod sa akon nagapaaplaag.

31Gani, nagasiling ako sa inyo: mapatawad ang mga tawo sang bisan ano nga sala kag sang malaut nila nga ginapanghambal, pero indi mapatawad ang bisan sin-o nga maghambal sing malain batok sa Espiritu Santo.

32Ang bisan sin-o nga maghambal sang pulong batok sa Anak sang Tawo mapatawad, pero ang bisan sin-o nga maghambal batok sa Espiritu Santo indi mapatawad, sa karon ukon sa palaabuton.

33“Agod makaangkon sang maayo nga bunga dapat ang kahoy maayo, kay kon ang kahoy indi maayo, magaangkon ini sang indi maayo nga bunga. Kay ang kahoy makilala sa iya bunga.

34Kamo nga kaliwat sang mga man-og, paano bala ang paghambal ninyo sing maayo nga mga butang kon kamo malaut? Kay ginahambal sang baba kon ano ang yara sa tagipusoon.

35Ang maayo nga tawo nagapagwa sing maayo nga mga butang gikan sa mga gintipon niya nga maayo, ang tawo nga malaut nagapagwa sang malaut nga mga butang gikan sa mga tinago niya nga malaut.

36“Ako nagasiling sa inyo: sa Adlaw sang Paghukom ang tagsatagsa magapanabat sa tagsa ka pulong nga wala sing pulos nga ginhambal niya.

37Kay sa imo mga pulong pagahukman ka, sa paghilway ukon sa pagkondenar sa imo.”

38Dayon may mga manunodlo sang Kasugoan kag mga Fariseo nga nagsiling kay Jesus, “Manunodlo, luyag kami makakita sa imo nga nagahimo sang gamhanan nga buhat nga nagapakita nga ang imo gahom naghalin sa Dios.”

39Si Jesus nagsabat, “Daw ano kalaut kag di-maminatud-on sa Dios ang mga tawo sa sini nga mga inadlaw! Nagapangayo bala kamo sa akon sing gamhanan nga buhat? Wala sing gamhanan nga buhat nga ipakita sa inyo luas sang natabo na sa kay Jonas nga propeta.

40Subong nga si Jonas nagpabilin sa tiyan sang daku nga isda sa sulod sing tatlo ka adlaw kag tatlo ka gab-i, amo man ang Anak sang Tawo magapabilin sa kadadalman sang duta sa sulod sing tatlo ka adlaw kag tatlo ka gab-i.

41Sa Adlaw sang Paghukom ang mga tawo sa Ninive magatindog kag magasumbong sa inyo tungod kay naghinulsol sila sang ila mga sala sang pagkabati nila kay Jonas nga nagawali. Kag nagasiling ako sa inyo nga may ari diri nga labaw pa sang sa kay Jonas!

42Sa Adlaw sang Paghukom ang Rayna sang Seba magatindog kag magasumbong sa inyo, tungod kay nag-abot sia halin pa sa malayo gid nga lugar sa pagpamati sang kaalam ni Haring Solomon. Nagasiling ako sa inyo, may ari diri nga labaw pa sang sa kay Haring Solomon!

43“Kon ang malaut nga espiritu maggwa sa isa ka tawo, nagapanglugayawan sia sa mamala nga mga lugar sa pagpangita sing palahuwayan. Kon wala sia sing may makita,

44nagasiling sia sa iya kaugalingon, ‘Mabalik ako sa akon ginhalinan.’ Gani sa pagbalik niya, iya makita nga ang iya ginhalinan wala sing may nagaestar, matinlo kag nahimos na.

45Dayon magalakat sia kag manghagad sang pito ka espiritu nga mas malaut pa sang sa iya. Magasulod sila kag magaestar sa sadto nga tawo. Gani, sa katapusan ini nga tawo mas magamalaut pa gid sang sa una niya nga kahimtangan. Amo man ini ang mahanabo sa malaut nga mga tawo sa sini nga mga inadlaw.”

46Nagahambal pa si Jesus sa mga tawo, sang mag-abot ang iya iloy kag mga utod. Nagtindog sila sa gwa kag nagpangabay nga makapakighambal sa iya.

47Gani ang isa sang mga tawo didto nagsiling kay Jesus, “Yara sa gwa nagatindog ang imo iloy kag mga utod. Luyag sila magpakighambal sa imo.”

48Si Jesus nagsabat, “Sin-o bala ang akon iloy? Sin-o bala ang akon mga utod!”

49Dayon gintudlo niya ang iya mga gintuton-an kag nagsiling, “Tan-awa ninyo, yari ang akon iloy kag mga utod!

50Kay ang bisan sin-o nga nagatuman sang kabubot-on sang akon Amay sa langit amo ang akon utod nga lalaki, utod nga babayi, kag akon iloy.”