bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Ilonggo
/
Ilonggo (Maayong Balita nga Biblia (2012))
/
Matthew 6
Matthew 6
Ilonggo (Maayong Balita nga Biblia (2012))
← Chapter 5
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 7 →
1
“Mag-andam kamo nga indi magpakitakita sa mga tawo sang inyo maayo nga ginahimo. Kay kon magpakitakita kamo wala na kamo sing balos sa inyo Amay nga yara sa langit.
2
“Gani kon ikaw magpanglimos, indi mo ini pag-ipanugidsugid subong sang ginahimo sang mga tawo nga salimpapaw sa mga sinagoga kag sa mga dalan. Ginahimo nila ini agod nga ang mga tawo magdayaw sa ila. Dumdoma ninyo ini! Nabaton na nila ang ila balos.
3
Pero kon magbulig ka sa tawo nga nagakinahanglan, himua nga bisan ang imo mahirop nga abyan indi makahibalo,
4
kundi ikaw gid lang. Kag ang imo Amay nga nagatan-aw sang imo ginahimo sa tago magabalos sa imo.
5
“Kon magpangamuyo kamo, indi kamo magmanginkaangay sa mga tawo nga hipokrito! Luyag sila magpangamuyo nga nagatindog sa mga sinagoga kag sa mga ginsang-an sang mga dalan, agod nga makita sila sang mga tawo. Dumdoma ninyo ini! Nabaton na nila ang ila balos.
6
Pero kon magpangamuyo ka, sulod ka sa imo kwarto, sirahi ang pwertahan kag magpangamuyo ka sa imo Amay nga indi makita. Kag ang imo Amay nga nagatan-aw sang imo ginahimo sa tago magabalos sa imo.
7
“Sa inyo pagpangamuyo indi kamo maggamit sang madamo nga mga pulong nga wala sing pulos subong sang ginahimo sang mga pagano, nga nagahunahuna nga pagapamatian sila sang ila mga dios tungod kay malawig ang ila mga pangamuyo.
8
Indi kamo magmanginkaangay sa ila, kay ang inyo Amay nakahibalo na sang inyo kinahanglan sa wala pa kamo makapangayo sa iya.
9
Gani magpangamuyo kamo sing subong sini: ‘Amay namon nga yara sa langit, pasidunggan ang imo balaan nga ngalan;
10
kabay ang imo paghari magsugod, kabay matuman ang imo kabubot-on sa duta subong sang sa langit.
11
Hatagi kami sa sini nga adlaw sang kalan-on nga amon kinahanglanon,
12
Patawara kami sang amon mga sala, subong nga ginapatawad man namon ang mga nakasala sa amon.
13
Indi kami pagdalha sa mabudlay nga pagtilaw, kundi luwasa kami sa Malaut.
14
“Kay kon ginapatawad ninyo ang mga nakasala sa inyo, ang inyo Amay sa langit magapatawad man sa inyo.
15
Pero kon wala ninyo ginapatawad ang mga nakasala sa inyo, ang inyo Amay sa langit indi man magpatawad sa inyo.
16
“Kag kon magpuasa kamo, indi kamo magpakita nga masinulob-on kamo subong sang ginahimo sang mga hipokrito, kay luyag sila magpakita sa ila guya sang kagutom agod ang mga tawo makahibalo nga sila nagapuasa. Dumdoma ninyo ini! Nabaton na nila ang ila balos.
17
Pero kon magpuasa kamo, magpanghilam-os kag magpanghusay kamo,
18
agod nga ang iban nga mga tawo indi makahibalo nga nagapuasa kamo, kundi ang inyo lamang Amay nga indi makita. Kag ang inyo Amay nga nagatan-aw sang inyo ginahimo sa tago magabalos sa inyo.
19
“Indi kamo magtipon sing mga manggad para sa inyo kaugalingon diri sa duta, sa diin ang mga sapatsapat kag ang tuktok makaut-ot kag ang mga makawat makasulod sa pagpangawat.
20
Sa baylo, magtipon kamo sing mga manggad sa langit, sa diin wala sing sapatsapat kag tuktok nga makaut-ot kag ang mga makawat indi makasulod sa pagpangawat.
21
Kay kon diin ang inyo manggad didto man ang inyo tagipusoon.
22
“Ang mga mata kasubong sang suga sa lawas. Kon ang imo mga mata maayo, ang imo bug-os nga lawas puno sang kapawa.
23
Pero kon ang imo mga mata indi maayo, ang imo bug-os nga lawas yara sa kadudulman. Gani kon ang kapawa nga yara sa imo manginkadudulman, daw ano pa gid kadulom ina nga kadudulman!
24
“Wala sing tawo nga makaalagad sa duha ka agalon. Kay kontrahon niya ang isa kag higugmaon ang isa, ukon magadampig sia sa isa kag magatamay sa isa. Indi kamo makaalagad sing dungan sa Dios kag sa manggad.
25
“Amo ini ang kabangdanan kon ngaa nagasiling ako sa inyo nga indi kamo magpalibog kon ano ang inyo pagakaunon kag pagaimnon agod kamo mabuhi, ukon ano ang inyo isuksok sa inyo lawas. Indi bala ang kabuhi mas labi pa sang sa kalan-on kag ang lawas mas labi pa sang sa panapton?
26
Tan-awa bala ang mga pispis sa palibot: wala sila nagasab-og sing binhi ukon nagaani, ukon nagatipon sang patubas sa mga bodega, pero ang inyo Amay sa langit nagapakaon sa ila! Indi bala mas mahal pa kamo sang sa ila?
27
Sin-o bala sa inyo ang makadugang sing mga tinuig sa iya kabuhi paagi sa pagpalibog tungod sini?
28
“Kag ngaa bala magpalibog kamo nahanungod sang inyo mga bayu? Tan-awa bala kon paano ang pagtubo sang mga bulak sa latagon, wala sila nagapangabudlay ukon nagahimo sang ila mga bayu.
29
Pero nagasiling ako sa inyo nga bisan pa si Haring Solomon sa iya kamanggaran, wala makasuksok sing bayu nga subong katahom sini nga mga bulak.
30
Kon ang Dios amo ang nagapabayu sang hilamon sa latagon nga nagatubo subong kag buas idap-ong lamang sa kalayo, indi bala sia magpabayu sa inyo sing mas labi pa? Ay kadiutay sang inyo pagtuo!
31
“Gani indi kamo magpalibog nga nagasiling, ‘Diin bala kita makuha sang aton kaunon, ukon sang aton ilimnon, ukon sang aton mga bayu?’
32
Kay amo ini nga mga butang ang ginapaligban pirme sang mga pagano. Ang inyo Amay sa langit nakahibalo nga kinahanglan ninyo ini tanan nga mga butang.
33
Sa baylo sini, tinguhai labaw sa tanan ang pagpasakop sa paghari sang Dios kag ang pagtuman sang iya ginapaabot sa inyo, kag hatagan niya kamo sini tanan nga mga butang.
34
Gani indi kamo magpalibog nahanungod sang buas, kay ang buas may iya man nga kaugalingon nga palaligban. Wala sing kinahanglan nga dugangan pa ang palaligban nga nagaabot sa tagsa ka adlaw.
← Chapter 5
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 7 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25
26
27
28