Matthew 15

Ilonggo (Maayong Balita nga Biblia (2012))

← Chapter 14 Jump to: Chapter 16 →

1May mga Fariseo kag mga manunodlo sang Kasugoan halin sa Jerusalem nga nagkadto kay Jesus kag namangkot sa iya,

2“Ngaa bala nga ang imo mga gintuton-an wala nagatuman sang mga pagtulon-an nga ginpaalinton sang aton mga katigulangan? Wala sila nagapanghinaw sang ila mga kamot sa wala pa sila magkaon suno sa kinabatasan!”

3Si Jesus nagsabat, “Kag ngaa man nga ginalapas ninyo ang sugo sang Dios kag ginasunod ang inyo kaugalingon nga pagtulon-an nga ginpaalinton sa inyo?

4Kay ang Dios nagsiling, ‘Tahura ang imo amay kag iloy,’ kag nagsiling pa gid sia, ‘Ang bisan sin-o nga nagapakamalaut sang iya amay kag iloy dapat patyon.’

5Pero kamo nagatudlo nga kon ang tawo may inugbulig sa iya amay kag iloy, kag magsiling sia, ‘Ini iya sang Dios,’

6indi na sia dapat magbulig sa iya amay kag iloy. Sa sini ginapakawalay pulos ninyo ang pulong sang Dios agod sa pagtuman sang inyo kaugalingon nga pagtulon-an nga ginpaalinton sa inyo.

7Mga hipokrito! Matuod gid ang mensahe sang Dios paagi kay Isaias nahanungod sa inyo!

8‘Ang Dios nagsiling, ini nga mga tawo, nagapasidungog sa akon sa ila mga pulong, pero ang ila tagipusoon malayo gid sa akon.

9Wala sing pulos ang ila pagsimba sa akon, tungod kay nagapanudlo sila sang mga kasugoan nga ginhimo sang tawo, nga daw subong sila nga akon mga kasugoan!’”

10Dayon gintawag ni Jesus ang mga tawo nga magpalapit sa iya kag nagsiling sa ila, “Pamatii kag hangpa ninyo!

11Indi ang nagasulod sa baba sang tawo ang nagadagta sa iya, kundi ang ginapagwa niya sa iya baba amo ang nagadagta sa iya.”

12Dayon ang iya mga gintuton-an nagpalapit sa iya kag nagsiling, “Nahibal-an mo bala nga ang mga Fariseo nasaklaw sang imo ginsiling?”

13Si Jesus nagsabat, “Ang tagsa ka tanom nga wala gintanom sang akon langitnon nga Amay pagagabuton.

14Pabayai sila! Mga bulag sila nga manugtuytoy. Kay kon ang bulag magtuytoy sa isa man ka bulag, sila nga duha mahulog sa kanal.”

15Si Pedro nagsiling, “Ipaathag sa amon ang kahulogan sini nga palaanggiran.”

16Si Jesus nagsiling sa ila, “Wala gid kamo sing kinalis sa iban!

17Wala bala kamo makahangop nga ang bisan ano nga nagasulod sa baba sang tawo nagakadto sa iya tiyan kag dayon ginapagwa sa iya lawas?

18Pero ang mga pulong nga nagagwa sa baba nagahalin sa tagipusoon, kag amo ina ang nagadagta sa tawo.

19Kay sa tagipusoon sang tawo nagagikan ang malaut nga mga panghunahuna: ang pagpatay, ang pagpanginbabayi ukon pagpanginlalaki, ang pagpakighilawas, ang pagpangawat, ang pagsaksi sang butig, kag ang pagpasipala sa iban.

20Ini nga mga butang amo ang nagadagta sa tawo. Pero indi madagtaan ang tawo kon magkaon sia nga wala makapanghinaw sang iya mga kamot.”

21Naghalin si Jesus sa sadto nga lugar kag nagkadto sa kadutaan malapit sa mga siudad sang Tiro kag Sidon.

22May isa ka babayi nga taga-Canaan nga nagaestar sa sadto nga rehiyon nga nagpalapit sa iya nga nagasinggit, “Sir, Anak ni David! Kaluoyi ako! Ang akon anak nga babayi ginagamhan sang demonyo kag yara sa malubha nga kahimtangan.”

23Pero si Jesus wala gid magsabat sa iya. Ang iya mga gintuton-an nagpalapit sa iya kag nagpangabay nga nagasiling, “Pahalina sia! Nagasunodsunod sia sa aton kag nagagahod!”

24Dayon si Jesus nagsabat, “Ako ginpadala para lamang sa mga tawo sang Israel nga kaangay sang panong sang mga karnero nga nadula.”

25Pero nagkadto ang babayi sa iya atubang kag nagluhod nga nagasiling, “Sir, buligi ako!”

26Nagsabat si Jesus, “Indi nagakabagay nga kuhaon ang pagkaon sang mga kabataan kag ihaboy sa mga ido.”

27Nagsiling sia, “Matuod ina, Sir, pero bisan ang mga ido nagakaon sang mga usik nga nagakalahulog sa lamisa sang ila mga agalon.”

28Dayon nagsabat si Jesus sa iya, “Ikaw isa ka babayi nga may daku nga pagtuo! Matuman ang imo ginapangabay.” Sa amo gid nga tion nag-ayo ang iya anak nga babayi.

29Naghalin si Jesus sa sadto nga lugar kag nag-agi sa higad sang Linaw sang Galilea. Nagtaklad sia sa isa ka bakulod kag nagpungko didto.

30Nagkadto sa iya ang madamo nga mga tawo nga nagadala sang mga piang, mga bulag, mga pingkaw, mga apa, kag madamo pa nga mga masakiton, kag ila ginbutang sa atubang ni Jesus, kag gin-ayo niya sila.

31Ang mga tawo natingala sang ila makita nga ang mga apa makahambal, ang mga pingkaw nag-ayo, ang mga piang makalakat, kag ang mga bulag makakita, kag gindayaw sang mga tawo ang Dios sang Israel.

32Gintawag ni Jesus ang iya mga gintuton-an kag nagsiling sa ila, “Naluoy ako sa sini nga mga tawo, tungod kay ikatlo na subong nga adlaw ang ila pag-upod sa akon, kag karon nawad-an na sila sing kalan-on. Indi ako luyag nga magpauli sila nga wala makakaon, kay basi magkalalipong sila sa dalanon.”

33Ang mga gintuton-an nagpamangkot sa iya, “Diin bala kita mangita sing pagkaon diri sa desierto nga makaigo sa pagpakaon sini nga kadamuon sang mga tawo?”

34Ginpamangkot sila ni Jesus, “Pila bala ka bilog ang inyo tinapay?” Nagsabat sila, “Pito ka bilog nga tinapay kag pila ka bilog nga magagmay nga mga isda.”

35Gani ginsugo niya ang mga tawo nga magpungko sa duta.

36Dayon ginkuha niya ang pito ka bilog nga tinapay kag ang mga isda, kag sang nakapasalamat sia sa Dios, ginpamihakpihak niya ini kag ginhatag sa mga gintuton-an, kag ang mga gintuton-an naghatag sini sa mga tawo.

37Ang tanan nagkaon kag nabusog. Dayon gintipon sang mga gintuton-an ang nabilin kag pito pa ka mga alat ang napuno.

38Ang kadamuon sang mga tawo nga nagkalaon 4,000 ka mga lalaki wala labot sa mga babayi kag mga kabataan.

39Dayon ginpapauli ni Jesus ang mga tawo, nagsakay sia sa sakayan kag nagkadto sa duta sang Magadan.

← Chapter 14 Jump to: Chapter 16 →