Matthew 22

Ilonggo (Maayong Balita nga Biblia (2012))

← Chapter 21 Jump to: Chapter 23 →

1Si Jesus naghambal liwat sa mga tawo paagi sa mga palaanggiran.

2“Ang Ginharian sang langit kaangay sa isa ka hari nga naghanda sang isa ka punsyon sa kasal sang iya anak nga lalaki.

3Ginpadala niya ang iya mga suloguon sa pagtawag sang mga inagda sa punsyon, pero ang mga inagda indi magkadto.

4Gani ginsugo niya ang iban sang iya mga suloguon kag ginsingganan: ‘Singgana ninyo ang mga inagda nga ang akon punsyon handa na, ang akon mga baka kag mga tinday nga pinatambok naihaw na, kag ang tanan handa na. Gani dali kamo kag mamunsyon!’

5Pero ang mga inagda wala magsapak kag naglakat sila: ang isa sa iya uma, kag ang isa pa gid sa iya balaligyaan,

6samtang ang iban nga mga inagda nagdakop, nagbunal, kag nagpatay sa mga suloguon.

7Ang hari naakig gid, gani ginpadala niya ang iya mga soldado sa pagpamatay sa mga nagpatay sang iya mga suloguon, kag sa pagsunog sang ila banwa.

8Dayon gintawag niya ang iya mga suloguon kag ginsingganan, ‘Ang akon punsyon sa kasal handa na, ugaling ang mga inagda indi takos.

9Karon kadto kamo sa mga dalan kag agdaha ninyo sa punsyon ang tanan nga inyo makita.’

10Gani ang mga suloguon nagkadto sa mga dalan kag gintipon nila ang tanan nga ila nakita, malain kag maayo. Kag ang kalan-an sa punsyon napuno sang mga inagda.

11“Nagsulod ang hari sa pagtan-aw sang mga inagda, kag nakita niya ang isa ka tawo nga wala makasuksok sang bayu para sa punsyon.

12Ginpamangkot sia sang hari, ‘Abyan, ngaa nga nakasulod ka diri nga wala makasuksok sang bayu para sa punsyon?’ Pero wala sia magsabat.

13Dayon ang hari nagsugo sa mga suloguon, ‘Gapusa ninyo ang iya kamot kag tiil kag ihaboy sia sa kadudulman sa gwa. Didto magahibi sia kag magabagrot sang iya mga ngipon.’”

14Kag sa katapusan si Jesus nagsiling, “Madamo ang mga gin-agda, pero pila lamang ang mga ginpili.”

15Ang mga Fariseo naglakat kag nagplano sa pagdakupdakop kay Jesus paagi sa mga pamangkot.

16Dayon ginpakadto nila ang iban sang ila mga gintuton-an kag ang iban nga mga katapo sang partido ni Herodes sa pagpamangkot kay Jesus. Nagsiling sila, “Manunodlo, nahibaluan namon nga nagasugid ikaw sang kamatuoran. Nagatudlo ikaw sang kamatuoran nahanungod sang kabubot-on sang Dios para sa tawo kag wala ikaw nagasapak kon ano ang isiling sang mga tawo tungod kay wala ikaw sing may ginapasulabi.

17Gani, sugiri kami, ano bala sa imo? Batok bala sa aton Kasugoan ang pagbayad sang mga buhis sa Emperador ukon indi?”

18Ugaling si Jesus nakahibalo sang ila malain nga tuyo, gani nagsiling sia, “Mga hipokrito kamo! Ngaa bala ginadakupdakop ninyo ako?

19Ipakita sa akon ang kwarta nga ginabayad sa buhis!” Gindala nila sa iya ang kwarta.

20Ginpamangkot sila ni Jesus, “Kay sin-o bala laragway kag ngalan ang yari diri?”

21Nagsabat sila, “Iya sang Emperador.” Gani si Jesus nagsiling sa ila, “Ti, kundi ihatag ninyo sa Emperador ang para sa Emperador, kag ihatag sa Dios ang para sa Dios.”

22Sang pagkabati nila sini, naurongan gid sila kag ginbayaan nila sia kag naglakat.

23Sa amo man nga adlaw may mga Saduceo nga nagpalapit kay Jesus, kag nagsiling nga wala sing pagkabanhaw.

24Nagsiling sila, “Manunodlo, si Moises nagsiling, ‘Kon ang isa ka tawo nga wala sing mga anak mapatay, ang iya utod dapat magpangasawa sang iya balo, agod makapamata sila para sa iya utod nga napatay.’

25Karon, may pito ka mag-utod nga lalaki nga nagkabuhi anay diri. Ang kamagulangan nagpangasawa kag napatay nga wala sing mga anak, gani ginbilin niya ang iya asawa sa iya utod.

26Amo man ang natabo sa ikaduha nga utod, kag sa ikatlo, kag sang ulihi sa ila tanan nga pito.

27Sa katapusan ang babayi napatay man.

28Karon, sa adlaw sang pagkabanhaw kay sin-o sia mangin-asawa, kay tanan sila nakapangasawa sa iya?”

29Si Jesus nagsabat sa ila, “Nagsala gid kamo, tungod kay wala kamo makahibalo sang mga Kasulatan ukon sang gahom sang Dios.

30Kay sa pagkabanhaw, manginkaangay sila sang mga anghel sa langit kag wala sila nagapangasawa ukon nagapamana.

31Karon nahanungod sang pagkabanhaw sang mga minatay, wala bala ninyo mabasahi ang ginsiling sang Dios sa inyo? Nagsiling sia,

32‘Ako amo ang Dios ni Abraham, ang Dios ni Isaac, kag ang Dios ni Jacob.’ Sia ang Dios sang mga buhi kag indi sang mga patay.”

33Sang pagkabati sini sang mga tawo, natingala gid sila sa iya pagpanudlo.

34Sang pagkabati sang mga Fariseo nga napahipos ni Jesus ang mga Saduceo, nagtipon sila,

35kag ang isa sa ila nga isa ka manunodlo sang Kasugoan, nagdakupdakop sa iya paagi sa isa ka pamangkot,

36“Manunodlo, ano bala ang labing daku nga sugo sa Kasugoan?”

37Si Jesus nagsabat, “‘Higugmaa ang Ginoo nga imo Dios sa bug-os mo nga tagipusoon, sa bug-os mo nga kalag, kag sa bug-os mo nga hunahuna.’

38Amo ini ang labing daku kag ang labing importante nga sugo.

39Ang ikaduha kaangay man sini: ‘Higugmaa ang imo isigkatawo subong sang imo kaugalingon.’

40Sa sining duha ka mga sugo napasad ang bug-os nga Kasugoan ni Moises kag ang mga pagtulon-an sang mga propeta.”

41Sang pagtilipon sang mga Fariseo, si Jesus nagpamangkot sa ila,

42“Ano bala ang hunahuna ninyo nahanungod sa Cristo? Kay sin-o bala sia kaliwat?” Nagsabat sila, “Kaliwat sia ni David.”

43Si Jesus nagpamangkot, “Ti, ngaa nga si David ginbugnaan sang Espiritu sa pagtawag sa iya nga ‘Ginoo’? Kay si David nagsiling:

44‘Ang Ginoo nagsiling sa akon Ginoo, pungko ka diri sa akon tuo, tubtob nga mabutang ko ang imo mga kaaway sa idalom sang imo mga tiil.’

45Karon kon si David nagtawag sa iya nga ‘Ginoo,’ paano bala nga ang Cristo mangin-kaliwat ni David?”

46Wala gid sing may nakasabat kay Jesus bisan isa ka tinaga, kag sugod sadto nga adlaw wala na sing may nangahas sa pagpamangkot sa iya.

← Chapter 21 Jump to: Chapter 23 →