Matthew 5

Ilonggo (Maayong Balita nga Biblia (2012))

← Chapter 4 Jump to: Chapter 6 →

1Sang makita ni Jesus ang madamo nga mga tawo nga nagasunod sa iya, nagtaklad sia sa bukid. Sang nakapungko sia, nagpalapit sa iya ang iya mga gintuton-an,

2kag nagsugod sia sa pagtudlo sa ila sang masunod:

3“Malipayon ang mga nagakilala nga sila nagakinahanglan sang Dios, kay ila ang Ginharian sang langit!

4“Malipayon ang mga nagakasubo, kay pagalipayon sila sang Dios!

5“Malipayon ang mga mapainuboson, kay magabaton sila sang ginsaad sang Dios!

6“Malipayon ang may daku nga handom sa paghimo sang ginapaabot sang Dios, kay ang Dios magahatag sing katumanan sina nga handom!

7“Malipayon ang mga maluloy-on, kay pagakaluoyan man sila sang Dios!

8“Malipayon ang may putli nga tagipusoon, kay makita nila ang Dios!

9“Malipayon ang nagapaluntad sang paghidait sa tunga sang mga tawo, kay ang Dios magatawag sa ila nga iya mga anak!

10“Malipayon ang mga ginahingabot tungod kay ginahimo nila ang ginapaabot sang Dios sa ila, kay ila ang Ginharian sang langit!

11“Malipayon kamo kon ang mga tawo magpasipala kag maghingabot kag magbutangbutang sa inyo tungod kay kamo sumolunod ko.

12Magkalipay kag maghinugyaw kamo, tungod kay daku ang inyo balos sa langit. Kay amo ini nga paghingabot ang naaguman sang mga propeta nga nauna sa inyo.

13“Kaangay kamo sang asin para sa mga tawo. Pero kon ang asin indi na maarat, wala na sing paagi nga mapaarat pa ini. Wala na ini sing pulos kundi itampok sa dalan kag tapakon sang mga tawo.

14“Kaangay kamo sang kapawa para sa kalibutan. Ang siudad nga napatindog sa ibabaw sang bakulod indi matago.

15Wala sing tawo nga nagasindi sing suga nga takloban man lang niya ini sang sulokban, kundi ginabutang niya ini sa tulongtungan agod maiwagan ang tanan nga yara sa balay.

16Subong man dapat ninyo pasigahon ang inyo kapawa sa mga tawo agod makita nila ang inyo maayo nga mga binuhatan, kag magadayaw sila sa inyo Amay nga yara sa langit.

17“Indi kamo maghunahuna nga nag-abot ako sa pagdula sang Kasugoan ni Moises kag sang mga ginpanudlo sang mga propeta. Wala ako mag-abot sa pagdula sini, kundi sa pagdala sang katumanan sini.

18Dumdoma ninyo ini! Samtang may langit pa kag duta, wala sing bisan isa ka kudlit ukon labing diutay nga bahin sang Kasugoan nga pagadulaon tubtob nga matuman ang tanan.

19Gani, ang bisan sin-o nga maglapas sang pinakadiutay sang mga kasugoan kag magpanudlo sa iban sa paglapas man, manginlabing kubos sa Ginharian sang langit. Pero ang bisan sin-o nga magtuman sang Kasugoan kag magtudlo sa iban sa pagtuman man, mangindaku sa Ginharian sang langit.

20Gani nagasiling ako sa inyo nga sarang lang kamo makasulod sa Ginharian sang langit, kon ang inyo katutom sa pagtuman sang ginapaabot sang Dios sa inyo, maglabaw pa sang sa katutom sang mga manunodlo sang Kasugoan kag sang mga Fariseo.

21“Inyo nabatian ang ginsiling sang una sa inyo mga katigulangan, ‘Indi ka magpatay sang tawo. Ang bisan sin-o nga makapatay pagadalhon sa hukmanan.’

22Pero karon nagasiling ako sa inyo nga ang bisan sin-o nga nagakaakig sa iya utod, pagadalhon sa hukmanan, kag ang bisan sin-o nga nagapakalain sa iya utod, sa pagsiling sa iya, ‘Hoy, waay ka pulos!’ pagadalhon sa Pinakamataas nga Hukmanan, kag ang bisan sin-o nga nagasiling sa iya utod, ‘Hoy, buang!’ may katalagman nga magpaimpierno.

23Gani kon nagahalad ikaw sang imo dulot sa altar kag dira madumdoman mo nga ang imo utod may aligutgot sa imo,

24bayai anay ang imo dulot sa atubangan sang altar. Maglakat ka kag sa gilayon magpakighusay sa imo utod, kag ugaling magbalik ka kag maghalad sang imo dulot sa Dios.

25“Kon may tawo nga magsumbong sa imo sa hukmanan, magpakighusay ka sa iya samtang may tion pa kag wala pa kamo makakadto sa hukmanan, kay kon didto na kamo, iya ikaw itugyan sa hukom kag ang hukom magatugyan sa imo sa gwardya, kag isulod ka sa bilangguan.

26Nagasiling ako sa imo, magapabilin ka didto tubtob mabayaran mo ang tanan mo nga multa.

27“Nabatian ninyo ang ginsiling sang una, ‘Indi kamo magpanginbabayi ukon magpanginlalaki.’

28Pero karon nagasiling ako sa inyo: ang bisan sin-o nga nagatulok sa babayi kag nagahandom sa pagpakighilawas sa iya, nakapakasala na sang pagpanginbabayi sa iya tagipusoon.

29Gani kon ang imo tuo nga mata, manginkabangdanan sang imo pagpakasala lukata ini kag ihaboy! Mas maayo pa nga madula ang isa ka bahin sang imo lawas sang sa itagbong ang imo bug-os nga lawas sa impierno.

30Kon ang imo tuo nga kamot manginkabangdanan sang imo pagpakasala, utda ini kag ihaboy! Mas maayo pa nga madula ang isa ka bahin sang imo lawas sang sa itagbong ang imo bug-os nga lawas sa impierno.

31“Nasiling pa gid, ‘Ang bisan sin-o nga magbulag sa iya asawa, kinahanglan maghatag sia sa iya asawa sang papeles sang pagbulagay.’

32Pero karon nagasiling ako sa inyo: ang bisan sin-o indi magbulag sa iya asawa luas lamang sa kabangdanan nga sia nagpanginlalaki. Kon bulagan sia, ang iya bana amo ang may salabton nga sia nagpanginlalaki, subong nga ang bisan sin-o nga tawo nga nagpangasawa sa iya nakasala sa pagpanginbabayi.

33“Inyo man nabatian ang ginsiling sa mga tawo sang una, ‘Indi ka magsumpa sang indi mo man lang pagtumanon, kundi tumanon mo ang imo ginsumpa sa Ginoo.’

34Pero karon nagasiling ako sa inyo: indi kamo magsumpa kon magsaad kamo. Indi kamo magsumpa nga nagasiling, ‘Saksi ko ang langit,’ kay amo ini ang trono sang Dios,

35ukon magsiling, ‘Saksi ko ang duta,’ kay amo ini ang tulongtungan sang iya mga tiil, ukon magsiling, ‘Saksi ko ang Jerusalem,’ kay amo ini ang siudad sang gamhanan nga Hari.

36Indi ka man magpanumpa nga nagasiling, ‘Bisan utdan pa ako sang ulo,’ tungod kay indi ikaw makapaputi ukon makapaitom sang bisan isa lang ka nahot nga buhok.

37Magsiling lang kamo ‘Huo’ ukon ‘Indi’ kay ang bisan ano pa nga dugang sini, nagagikan sa Yawa.

38“Nabatian ninyo ang ginsiling, ‘Kon lukaton niya ang imo mata, lukata man ang iya, kag kon bingawon niya ang imo ngipon, bingawa man ang iya.’

39Pero karon nagasiling ako sa inyo: indi kamo magtimalos sa nagabuhat sing malain sa inyo. Kon tampaon ka sa imo tuo nga guya, itaya man ang imo pihak nga guya sa iya.

40Kon may tawo nga magsumbong sa imo sa korte sa tuyo nga kuhaon niya ang imo bayu, ihatag man sa iya pati ang imo kunop.

41Kag kon piliton ka ni bisan sin-o nga yara sa gahom sa pagpas-an sang iya karga sing isa ka kilometro, pas-ana ini sing duha ka kilometro.

42Kon may magpangayo sa imo, hatagi sia, kag kon may maghulam sa imo, pahulama sia.

43“Inyo nabatian ang ginsiling, ‘Higugmaa ang imo mga abyan, kag dumti ang imo mga kaaway.’

44Pero karon nagasiling ako sa inyo: higugmaa ang inyo mga kaaway, kag magpangamuyo kamo para sa mga nagahingabot sa inyo,

45agod mangin-anak kamo sang inyo Amay nga yara sa langit. Kay pareho lang nga ginapasilak niya ang adlaw sa malain kag maayo nga mga tawo, kag nagahatag sia sing ulan sa mga matarong kag mga di-matarong.

46Ti ngaa gid abi nga ang Dios maghatag sa inyo sing balos kon ang inyo ginahigugma amo man lang ang mga tawo nga nagahigugma sa inyo? Bisan ang mga manugsukot sang buhis nagahimo man sina!

47Kag kon ang ginabugno ninyo ang inyo man lang mga abyan, pinasahi gid bala ina? Bisan ang mga di-diosnon nagahimo sina!

48Gani, dapat magmanginhimpit kamo, subong nga ang inyo Amay sa langit himpit.”

← Chapter 4 Jump to: Chapter 6 →