Matthew 8

Ilonggo (Maayong Balita nga Biblia (2012))

← Chapter 7 Jump to: Chapter 9 →

1Sang si Jesus nagdulhog halin sa bukid, ginsunod sia sang madamo nga mga tawo.

2Dayon may isa ka aruon nga nagpalapit sa iya, kag nagluhod sa iya atubang nga nagasiling, “Sir, kon buot mo, magaayo ako.”

3Gin-untay ni Jesus ang iya kamot kag gintandog sia nga nagasiling, “Buot ko nga mag-ayo ka!” Sa gilayon nag-ayo sia sa iya aro.

4Dayon si Jesus nagsiling, sa iya, “Pamati ka! Indi mo ini pag-isugid bisan kay sin-o, kundi magkadto ka gilayon sa pari kag magpatan-aw ka sang imo kaugalingon. Dayon maghalad ka suno sa ginsugo ni Moises sa pagpamatuod sa mga tawo nga maayo ka na.”

5Sang pagsulod ni Jesus sa Capernaum, may opisyal nga Romanhon nga nagsugata sa iya kag nagpangayo sing bulig nga nagasiling,

6“Sir, ang akon suloguon didto sa balay nagamasakit sa iya hiligdaan, indi sia makahulag kag tama gid ang iya pag-antos.”

7Si Jesus nagsiling, “Kadtuan ko sia kag ayuhon.”

8Nagsabat ang opisyal, “Indi na lang Sir, kay indi ako takos nga magkadto ka sa akon balay, kundi isiling lang kag magaayo ang akon suloguon.

9Kay ako man yara sa idalom sang mataas nga mga opisyales, kag may mga soldado man sa idalom ko. Nagamando ako sa isa, ‘Lakat!’ kag nagalakat sia; nagamando man ako sa isa, ‘Palapit!’ kag nagapalapit sia; kag nagasugo ako sa akon suloguon, ‘Himua ini!’ kag ginahimo niya.”

10Natingala gid si Jesus sang pagkabati niya sini, kag nagsiling sia sa mga tawo nga nagasunod sa iya, “Nagasiling ako sa inyo nga wala pa ako makakita sa Israel sing pagtuo nga subong sini.

11Dumdoma ninyo ini! Madamo ang magaabot halin sa sidlangan kag sa nakatundan kag magapungko kaupod ni Abraham, ni Isaac, kag ni Jacob sa punsyon sa Ginharian sang langit.

12Pero yadtong mga anak sang Ginharian pagaihaboy sa kadudulman didto sa gwa, sa diin magahibi sila kag magabagrot ang ila mga ngipon sa kasakit.”

13Kag nagsiling si Jesus sa opisyal, “Pauli ka! Tungod kay nagtuo ka sa Dios, sia magahatag sang imo ginapangayo.” Kag nag-ayo ang suloguon sang opisyal sa sadto gid nga tion.

14Si Jesus nagkadto sa balay ni Pedro, kag nakita niya ang ugangan nga babayi ni Pedro nga nagahigda nga may hilanat.

15Gintandog ni Jesus ang iya kamot kag nag-ayo sia sa iya hilanat. Nagbangon sia kag nag-amuma sa iya.

16Sang sirom na, ang mga tawo nagdala sa kay Jesus sang mga ginagamhan sang mga demonyo. Sa isa lang ka paghambal gintabog niya ang mga espiritu nga malaut kag gin-ayo ang tanan nga mga masakiton.

17Ginhimo niya ini agod matuman ang ginsiling ni Isaias nga propeta, “Sia gid mismo ang naghilway sa aton gikan sa aton mga masakit kag nagkuha sang aton mga balatian.”

18Sang matalupangdan ni Jesus ang madamo nga mga tawo sa iya palibot, ginsugo niya ang iya mga gintuton-an sa pagtabok sa pihak sang linaw.

19May isa ka manunodlo sang Kasugoan nga nagpalapit sa iya kag nagsiling, “Manunodlo, handa ako sa pagsunod sa imo bisan diin ka makadto.”

20Si Jesus nagsabat sa iya, “Ang mga singgalong may mga buho, kag ang mga pispis may mga pugad, pero ang Anak sang Tawo wala gid sing hiligdaan agod makapahuway.”

21Isa pa sang iya mga gintuton-an nagsiling, “Ginoo, mapauli anay ako sa paglubong sang akon amay.”

22Pero si Jesus nagsabat, “Sunod ka sa akon kag pabay-i ang mga patay sa paglubong sang ila mga patay.”

23Nagsakay si Jesus sa sakayan kag ang iya mga gintuton-an nag-upod sa iya.

24Sa hinali nag-abot ang mabaskog nga bagyo sa linaw, sa bagay nga ang sakayan may katalagman nga malunod. Pero si Jesus nagakatulog.

25Ginpalapitan sia sang iya mga gintuton-an kag ginpukaw nga nagasiling, “Ginoo, luwasa kami! Daw malunod kita!”

26Si Jesus nagsabat, “Ngaa bala nagakahadlok gid kamo? Kadiutay sang inyo pagtuo!” Dayon nagbangon sia, ginmanduan niya ang hangin kag ang balod nga mag-untat, kag naglinaw.

27Ang tanan natingala gid kag nagsiling, “Ano bala nga tawo ini? Bisan pa ang hangin kag ang mga balod nagatuman sa iya!”

28Sang makaabot si Jesus sa duta sang mga taga-Gadara, sa tabok sang linaw, ginsugata sia sang duha ka tawo nga naggwa gikan sa mga lungib nga lulobngan. Ini sila ginagamhan sang mga demonyo kag mabangis kaayo, sa bagay nga wala sing tawo nga nagaagi sa sadto nga dalan.

29Sa gilayon nagsinggit sila, “Ano bala ang gusto mo sa amon, Anak sang Dios? Nag-abot ka bala sa pagsilot sa amon sa wala pa ang nagakaigo nga tion?”

30Didto sa unhan may daku nga panong sang mga baboy nga nagapang-ungad.

31Gani ang mga demonyo nagpakitluoy kay Jesus nga nagasiling, “Kon tabugon mo gid man kami, pasudla na lang kami sa sadtong panong sang mga baboy.”

32Si Jesus nagsiling sa ila, “Sigi, lakat kamo!” Gani naggwa sila kag nagsulod sa mga baboy. Ang bug-os nga panong nagdinaguso padulhog sa kilid sang pil-as pakadto sa linaw kag nagkalalumos.

33Ang mga manugsagod sang mga baboy nagpalagyo kag nagkadto sa banwa, sa diin ginpanugid nila ang tanan nga nahanabo kag kon ano ang natabo sa duha ka tawo nga ginagamhan sang mga demonyo.

34Gani ang tanan nga mga tawo sa sadto nga banwa naggulowa sa pagsugata kay Jesus, kag sang pagkakita nila sa iya, nagpakitluoy sila sa iya nga maghalin sia sa ila banwa.

← Chapter 7 Jump to: Chapter 9 →