Matthew 4

Ilonggo (Maayong Balita nga Biblia (2012))

← Chapter 3 Jump to: Chapter 5 →

1Dayon si Jesus gindala sang Espiritu Santo sa desierto agod sulayon sang Yawa.

2Sa tapos ang kwarenta ka adlaw kag kwarenta ka gab-i nga pagpuasa, si Jesus gingutom.

3Ang Yawa nagpalapit sa iya kag nagsiling, “Kon ikaw ang Anak sang Dios, sugoa ining mga bato nga mangintinapay.”

4Pero si Jesus nagsabat, “Ang kasulatan nagasiling, ‘Indi lamang sa tinapay mabuhi ang tawo, kundi sa tagsa ka pulong nga ginahambal sang Dios.’”

5Dason gindala sang Yawa si Jesus sa Jerusalem, ang Balaan nga Siudad kag ginpatindog sia sa pinakamataas nga bahin sang Templo,

6kag nagsiling ang Yawa sa iya, “Kon ikaw ang Anak sang Dios, lukso ka paidalom, kay ang kasulatan nagasiling, ‘Ang Dios magasugo sa iya mga anghel sa pagbantay sa imo, bayawon ka nila sa ila mga kamot, agod nga indi masamad ang imo mga tiil sa mga bato.’”

7Si Jesus nagsabat, “Pero ang kasulatan nagasiling man, ‘Indi mo pagsulayon ang Ginoo nga imo Dios.’”

8Dason gindala pa gid sang Yawa si Jesus sa isa ka tama ka taas nga bukid, kag ginpakita sa iya ang tanan nga mga ginharian sang kalibutan kag ang kadayawan sini.

9Ang Yawa nagsiling, “Ini tanan ihatag ko sa imo kon magluhod ka kag magsimba sa akon.”

10Si Jesus nagsabat, “Palayo ka, Satanas! Ang kasulatan nagasiling, ‘Magsimba ka sa Ginoo nga imo Dios, kag sia lamang ang imo alagaron!’”

11Dayon ang Yawa nagbiya kay Jesus, kag ang mga anghel nag-abot kag nag-alagad sa iya.

12Sang mabatian ni Jesus nga ginbilanggo si Juan, nagkadto sia sa Galilea.

13Naghalin sia sa Nazaret kag nagkadto sa pag-estar sa Capernaum, ang banwa sa higad sang Linaw sang Galilea nga sakop sang Zabulon kag Neftali.

14Nahanabo ini agod matuman ang ginsiling ni Isaias nga propeta:

15“Kamo nga mga taga-Zabulon, kamo nga mga taga-Neftali, sa dalan padulong sa baybayon, sa tabok sang Jordan. Galilea, ang duta sang mga Hentil!

16Ang mga tawo nga nagakabuhi sa kadudulman makakita sang daku nga kapawa. Sa mga nagaestar sa madulom nga duta sang kamatayon ang kapawa magasilak.”

17Halin sadto nga tion si Jesus nagsugod sa pagpangwali nga nagasiling, “Magbiya kamo sa inyo mga sala tungod kay ang Ginharian sang langit malapit na!”

18Sang nagalakat si Jesus sa higad sang Linaw sang Galilea, nakita niya ang duha ka mag-utod nga mangingisda. Sila amo sanday Simon nga ginatawag Pedro kag si Andres nga iya utod nga nagaladlad sang ila pukot sa pagpangisda.

19Si Jesus nagsiling sa ila, “Upod kamo sa akon kay tudloan ko kamo sa pagpangisda sang mga tawo.”

20Sa gilayon ginbayaan nila ang ila mga pukot kag nag-upod sa iya.

21Naglakat pa gid si Jesus sa unhan kag nakita naman niya ang duha ka mag-utod nga amo sanday Santiago kag Juan nga mga anak ni Zebedeo. Didto sila sa ila sakayan kaupod sang ila amay nga si Zebedeo nga nagaaman sang ila mga pukot. Gintawag sila ni Jesus,

22kag sa gilayon ginbayaan nila ang ila sakayan kag ang ila amay kag nag-upod sila kay Jesus.

23Si Jesus naglibot sa bug-os nga Galilea, nagpanudlo sa ila mga sinagoga, nagwali sang Maayong Balita nahanungod sang Ginharian, kag nagpang-ayo sang tanan nga sahi sang mga masakit kag balatian sang mga tawo.

24Ang balita nahanungod kay Jesus naglapnag sa bug-os nga duta sang Siria, sa bagay nga gindala nila sa iya ang tanan nga mga nagaantos sang nagkalainlain nga mga balatian kag masakit: ang mga ginagamhan sang mga demonyo, ang mga kuyapon kag ang mga paralitiko. Gin-ayo sila tanan ni Jesus.

25Nag-upod kay Jesus ang madamo nga mga tawo nga naghalin sa Galilea, sa Decapolis, sa Jerusalem, sa Judea kag sa duta sa tabok sang Jordan.

← Chapter 3 Jump to: Chapter 5 →