Numbers 18

Ilonggo (Maayong Balita nga Biblia (2012))

← Chapter 17 Jump to: Chapter 19 →

1Ang Ginoo nagsiling kay Aaron, “Ikaw, ang imo mga anak nga lalaki, kag ang mga Levita kinahanglan mag-antos tungod sang bisan ano nga sala nga inyo nahimo sa pag-alagad sa Tolda sang akon presensya, pero ikaw lamang kag ang imo mga anak ang magaantos sa kaangtanan sa pag-alagad sa hilikuton sang mga pari.

2Dalha ang imo mga pariente, ang tribo ni Levi, sa pag-obra kag pagbulig sa imo, samtang ikaw kag ang imo mga anak nagaalagad sa Tolda.

3Kinahanglan tumanon nila ang ila mga katungdanan sa imo kag ang ila mga bulohaton sa Tolda, pero indi gid sila magtandog sang balaan nga mga butang sa Balaan nga Duog ukon sa altar. Kon himuon nila ini, sila kag ikaw magakalamatay.

4Kinahanglan mag-obra sila upod sa imo kag magtuman sang ila mga bulohaton para sa tanan nga pag-alagdan sa Tolda, pero wala sing tawo nga indi takos nga sarang makaobra upod sa inyo.

5Ikaw kag ang imo mga anak lamang ang kinahanglan magtuman sang mga bulohaton sa Balaan nga Duog kag sa altar, agod ang akon kaakig indi magdabdab liwat batok sa mga tawo sang Israel.

6Ako amo ang nagpili sang inyo mga pariente nga mga Levita halin sa mga Israelinhon subong isa ka dulot sa inyo. Ginhalad sila sa akon, agod makatuman sila sang ila mga katungdanan sa Tolda.

7Pero ikaw kag ang imo lamang mga anak ang magatuman sang tanan nga mga katungdanan sang pagkapari nga may kaangtanan sa altar kag sang yara sa Labing Balaan nga Duog. Ini nga mga butang amo ang inyo mga katungdanan, tungod kay ginhatag ko sa inyo ang hiyas sang pagkapari. Ang bisan sin-o nga tawo nga indi takos nga magpalapit sa balaan nga mga butang pagapatyon.”

8Ang Ginoo nagsiling kay Aaron, “Dumdoma nga ginhatag ko sa inyo ang tanan nga pinasahi nga mga dulot nga ginhatag sa akon nga wala ginasunog subong mga halad. Ginahatag ko ini sa imo kag sa imo mga kaliwat subong inyo mga bahin nga wala sing katapusan.

9Sa labing balaan nga mga dulot nga wala ginasunog sa altar, ang masunod mangin-inyo parti: ang mga halad nga kalan-on, ang mga halad tungod sa sala, kag ang mga halad nga bayad. Ang tagsa ka butang nga ginadala sa akon subong isa ka balaan nga dulot imo kag sang imo mga anak.

10Kinahanglan kaunon ninyo ini nga mga butang sa isa ka balaan nga lugar, kag ang mga lalaki lamang ang sarang makakaon sini; kabiga ninyo ini nga balaan.

11“Wala labot sini, ang iban nga mga pinasahi nga mga dulot nga ginadala sa akon sang mga Israelinhon mangin-inyo. Ginahatag ko ini sa imo, sa imo mga anak nga lalaki, kag mga anak nga babayi sa tanan nga panahon nga palaabuton. Ang tagsa ka katapo sang inyo panimalay nga matinlo sarang makakaon sini.

12“Ginahatag ko sa inyo ang tanan nga labing maayo sang nahauna nga patubas nga ginahatag sang mga Israelinhon sa akon sa tagsa ka tuig: lana sang olivo, bino, kag trigo.

13Ini tanan inyo. Ang tagsa ka katapo sang inyo panimalay nga matinlo sarang makakaon sini.

14“Ang tagsa ka butang sa Israel nga ginhalad sing dayon sa akon, inyo.

15“Ang tagsa ka panganay nga anak ukon sapat nga ginadulot sang mga Israelinhon sa akon, inyo. Pero kinahanglan batunon mo ang bayad subong gawad sang tagsa ka panganay nga anak, kag batunon mo man ang bayad subong nga gawad sang tagsa ka panganay nga sapat nga di-matinlo.

16Ang mga kabataan pagagawaron sa edad nga isa ka bulan sa piho nga bili nga lima ka bilog nga pilak, suno sa opisyal nga talaksan.

17Pero ang panganay sang mga baka, sang mga karnero, kag sang mga kanding indi magawad; akon sila sing bug-os, kag kinahanglan ihalad. Ibasya ang ila dugo sa altar kag sunoga ang ila sapay subong isa ka halad nga kalan-on. Ang kahamot sini manginkahalamut-an sa akon.

18Ang karne sini inyo, pareho sang dughan kag sang tuo nga pangulihi nga paa sang pinasahi nga dulot.

19“Ginahatag ko sa imo, sa imo mga anak nga lalaki, kag sa imo mga anak nga babayi, sa tanan nga panahon nga palaabuton, ang tanan nga pinasahi nga mga dulot nga ginadala sang mga Israelinhon sa akon. Amo ini ang kasugtanan nga indi malapas nga akon ginhimo sa imo kag sa imo mga kaliwat.”

20Ang Ginoo nagsiling kay Aaron, “Indi kamo magbaton sang bisan ano nga pagkabutang nga sarang mapanubli kag wala sing bahin sang duta sang Israel nga ihatag sa inyo. Ako, ang Ginoo, amo lamang ang kinahanglan ninyo.”

21Ang Ginoo nagsiling, “Ginhatag ko sa mga Levita ang tanan nga ikapulo nga ginadala sang mga tawo sang Israel sa akon. Amo ini ang suhol nila tungod sang ila pag-alagad sa pagtatap sang Tolda sang akon presensya.

22Ang iban nga mga Israelinhon indi na gid magpalapit sa Tolda kag sa sini nga paagi magadala sila sang silot sang kamatayon sa ila kaugalingon.

23Sugod karon, ang mga Levita lamang amo ang magatatap sang Tolda kag sila ang may bug-os nga salabton sini. Amo ini ang wala sing katapusan nga pagsulondan para man sa imo mga kaliwat. Ang mga Levita wala sing permanente nga pagkabutang sa Israel,

24tungod kay ginhatag ko sa ila, subong ila pagkabutang, ang ikapulo nga ginadala sang mga Israelinhon sa akon subong isa ka pinasahi nga dulot. Amo ini ang kabangdanan nga ginsingganan ko sila nga wala sila sing permanente nga pagkabutang sa Israel.”

25Ang Ginoo nagsugo kay Moises,

26“Singgana ang mga Levita: Kon makabaton kamo halin sa mga Israelinhon sang ikapulo nga ginahatag sang Ginoo subong inyo pagkabutang, kinahanglan ihalad ninyo ang ikapulo sini subong isa ka pinasahi nga dulot sa Ginoo.

27Ining pinasahi nga dulot pagakabigon nga pareho sang halad nga ginadulot sang mangungoma gikan sa bag-o nga patubas kag bag-o nga bino.

28Sa sini nga paagi magahalad man kamo sang pinasahi nga dulot sa Ginoo gikan sa tanan nga mga ikapulo nga inyo ginabaton halin sa mga Israelinhon. Ihatag ninyo ining pinasahi nga dulot kay Aaron nga pari para sa Ginoo.

29Kuhaa ini gikan sa labing maayo nga inyo ginabaton.

30Sa tapos kamo makadulot sang labing maayo nga bahin, sarang ninyo matago ang nabilin, subong nga ang mangungoma nagatago sang nabilin sa tapos sia makahalad sang iya dulot.

31Kamo kag ang inyo mga panimalay sarang makakaon sang nabilin bisan diin nga lugar, tungod kay amo ini ang inyo suhol sa inyo pag-alagad sa Tolda.

32Indi kamo makasala kon kaunon ninyo ini, kon inyo na nahalad sa Ginoo ang labing maayo nga bahin sini. Pero mag-andam kamo nga indi ninyo pagpasipakpakan ang balaan nga mga dulot sang mga Israelinhon paagi sa pagkaon sang bisan ano nga mga dulot nga wala pa mahalad ang labing maayo nga bahin sini. Kon himuon ninyo ini magakalamatay kamo.”

← Chapter 17 Jump to: Chapter 19 →