Numbers 20

Ilonggo (Maayong Balita nga Biblia (2012))

← Chapter 19 Jump to: Chapter 21 →

1Sa nahauna nga bulan, ang bug-os nga katilingban sang Israel nakaabot sa desierto sang Zin kag naghimo sila sing kampo sa Kades. Didto si Miriam napatay kag ginlubong.

2Wala sing tubig sa lugar nga ila ginhimuan sing kampo, gani ang mga tawo nagtipon sa palibot ni Moises kag ni Aaron

3kag nagreklamo: “Maayo pa kuntani kon nagkalamatay kami sa atubangan sang Tolda sang Ginoo upod sa amon mga kasimanwa.

4Ngaa bala gindala ninyo kami sa sini nga desierto? Agod bala magkalamatay kami upod sa amon mga kasapatan?

5Ngaa bala nga ginpagwa ninyo kami halin sa Ehipto pakadto sa sining malain nga lugar nga wala sing bisan ano nga nagatubo? Wala sing trigo, mga higos, mga ubas, ukon mga granada. Wala gani sing tubig nga sarang mainom!”

6Si Moises kag si Aaron naghalin sa mga tawo kag nagtindog sila sa pwertahan sang Tolda. Nagluhod sila nga ang ila mga guya nagaduot sa duta kag ang makasililaw nga kapawa nga nagapakita sang presensya sang Ginoo nagpahayag sa ila.

7Ang Ginoo nagsiling kay Moises,

8“Kuhaa ang sungkod nga yara sa atubangan sang Kaban sang Kasugtanan, dayon ikaw kag si Aaron magtipon sang bug-os nga katilingban. Didto sa atubang sang tanan maghambal ka sa sinang igang, kag halin sa sini magatubod ang tubig. Sa sini nga paagi magapagwa ka sing tubig halin sa igang para sa mga tawo, agod imnon nila kag sang ila mga kasapatan.”

9Si Moises naglakat kag ginkuha niya ang sungkod suno sa sugo sang Ginoo.

10Sia kag si Aaron nagtipon sang bug-os nga katilingban sa atubangan sang igang, kag si Moises nagsiling, “Pamati kamo nga mga rebelde! Kinahanglan bala nga magkuha kami sing tubig halin sa sini nga igang para sa inyo?”

11Dayon ginbayaw ni Moises ang sungkod kag ginhampak sing makaduha ang igang, kag nagpuswak ang madamo nga tubig, kag ang tanan nga mga tawo kag mga kasapatan nag-inom.

12Pero gin-akigan sang Ginoo si Moises kag si Aaron. Nagsiling ang Ginoo, “Tungod kay kulang ang inyo pagtuo sa pagkilala sang akon balaan nga gahom sa atubangan sang mga tawo sang Israel, indi kamo makadala sa ila sa pagsulod sa duta nga akon ginsaad nga ihatag sa ila.”

13Nahanabo ini sa Meriba, sa diin ang mga tawo sang Israel nagreklamo batok sa Ginoo, kag sa diin nagpakita sia sa ila nga sia balaan.

14Si Moises nagpadala sing mga mensahero halin sa Kades pakadto sa hari sang Edom. Nagsiling sila, “Ini nga mensahe naghalin sa imo mga pariente nga mga tribo sang Israel. Nakahibalo ikaw sang mga kabudlayan nga amon gin-antos,

15kon paano nga ang amon mga katigulangan nagkadto sa Ehipto, sa diin nag-estar kami sa sulod sang madamo nga mga tinuig. Ang mga Ehiptohanon nagpigos sang amon mga katigulangan kag sa amon,

16kag nagpangayo kami sa Ginoo sing bulig. Ginpamatian niya ang amon pagpanawag kag nagpadala sia sa amon sing anghel, nga nagtuytoy sa amon pa gwa sa Ehipto. Karon yara kami sa Kades, isa ka banwa nga yara sa dulonan sang imo duta.

17Kon mahimo tugoti kami sa pag-agi sa imo duta. Kami kag ang amon mga kasapatan indi maglipas sa alagyan ukon magkadto sa imo mga kaumhan ukon mga talamnan sang ubas, kag indi kami mag-inom sa imo mga bubon. Indi kami maglipas sa mayor nga dalan tubtob makagwa kami sa imo duta.”

18Pero ang mga taga-Edom nagsabat, “Indi kami magtugot nga mag-agi kamo sa amon duta! Kon mag-agi kamo, magwa kami kag salakayon namon kamo.”

19Ang mga tawo sang Israel nagsiling, “Indi kami maglipas sa dalan, kag kon kami kag ang amon mga kasapatan mag-inom sang inyo tubig, bayaran namon ini. Ang amon lamang luyag amo nga makaagi kami.”

20Ang mga taga-Edom nagsiling liwat, “Indi kami magtugot!” Dayon naggwa sila upod sa madamo nga mga hangaway sa pagsalakay sa mga Israelinhon.

21Tungod kay ang mga taga-Edom indi magtugot sa mga Israelinhon sa pag-agi sa ila duta, ang mga Israelinhon naglikaw kag nag-agi sa iban nga dalan.

22Ang bug-os nga katilingban sang Israel naghalin sa Kades kag nakaabot sila sa Bukid sang Hor,

23sa dulonan sang Edom. Didto ang Ginoo nagsiling kay Moises kag kay Aaron,

24“Si Aaron indi makasulod sa duta nga akon ginsaad nga ihatag sa Israel, mapatay sia, tungod kay kamo nga duha nagrebelde batok sa akon sugo sa Meriba.

25Dalha si Aaron kag ang iya anak nga si Eleazar sa pagtaklad sa Bukid sang Hor,

26kag didto ubahi si Aaron sang iya bayu sang pagkapari kag isuksok ini kay Eleazar. Si Aaron mapatay didto.”

27Gintuman ni Moises ang sugo sang Ginoo. Nagtaklad sila sa Bukid sang Hor nga nagatan-aw ang bug-os nga katilingban,

28kag gin-ubahan ni Moises si Aaron sang iya bayu sang pagkapari kag ginpasuksok ini sa kay Eleazar. Didto sa putokputokan sang bukid napatay si Aaron, kag si Moises kag si Eleazar nagdulhog pabalik.

29Ang bug-os nga katilingban nakahibalo nga napatay si Aaron, kag naglalaw sila tanan para sa iya sa sulod sang traynta ka adlaw.

← Chapter 19 Jump to: Chapter 21 →