Numbers 34

Ilonggo (Maayong Balita nga Biblia (2012))

← Chapter 33 Jump to: Chapter 35 →

1Ang Ginoo naghatag kay Moises

2sang masunod nga mga sugo para sa mga tawo sang Israel: “Kon magsulod kamo sa duta sang Canaan, ang duta nga akon ginahatag sa inyo, amo ini ang mga dulonan sa inyo mga kadutaan.

3Ang dulonan sa nabagatnan magagikan sa desierto sang Zin sa ubay sang dulonan sang Edom. Magasugod ini sa sidlangan nga bahin sang nabagatnan nga punta sang Patay nga Dagat.

4Dayon magaliko ini pa bagatnan padulong sa Taklaran sang Akrabim, kag magapadayon nga nagaagi sa Zin, tubtob sa Kades Barnea sa nabagatnan. Dayon magaliko ini pakadto sa aminhan-nakatundan pakadto sa Hazar-addar kag tubtob sa Azmon,

5sa diin magaliko ini pakadto sa sapa sa dulonan sang Ehipto, kag ang katapusan sini amo ang Mediteraneo.

6“Ang dulonan sa nakatundan amo ang Dagat sang Mediteraneo.

7“Ang dulonan sa aminhan nagagikan sa Mediteraneo pakadto sa Bukid sang Hor,

8kag halin didto padulong sa Taklaran sang Hamat. Magapadayon ini pakadto sa Zedad,

9kag pakadto sa Zifron, kag ang katapusan amo ang Hazar-enan.

10“Ang dulonan sa sidlangan magagikan sa Hazar-enan pakadto sa Sepam.

11Dayon magapadulong ini sa bagatnan pakadto sa Harbel, sa sidlangan sang Ayin, kag padulong sa mga kabakuloran sa sidlangan nga baybayon sang Linaw sang Galilea,

12dayon pakadto sa bagatnan sa ubay sang Suba sang Jordan pakadto sa Patay nga Dagat. “Amo ini ang apat ka mga dulonan sang inyo duta.”

13Si Moises naghambal sa mga Israelinhon, “Amo ini ang duta nga inyo pagabatunon paagi sa pagabutgabot, ang duta nga igahatag sang Ginoo sa siyam kag tunga ka mga tribo.

14Ang mga tribo ni Ruben kag ni Gad, kag ang nasidlangan nga katunga sang Manases nakabaton na sang ila pagkabutang nga ginpamartida suno sa ila mga panimalay,

15sa nasidlangan nga bahin sang Jordan nga nagaatubang sa Jerico.”

16Ang Ginoo nagsiling kay Moises,

17“Si Eleazar nga pari kag si Josue nga anak ni Nun magapamartida sang duta para sa mga tawo.

18Kag halin sa tagsa ka tribo magkuha ka man sing isa ka pangulo nga magabulig sa ila sa pagpamartida sini.”

19Amo ini ang mga lalaki nga ginpili sang Ginoo: Juda Caleb, anak ni Jefone Simeon Semuel, anak ni Amiud Benjamin Elidad, anak ni Kislon Dan Buqui, anak ni Jogli Manases Haniel, anak ni Efod Efraim Kemuel, anak ni Siftan Zabulon Elisafan, anak ni Parnac Isacar Paltiel, anak ni Azan Aser Ahihud, anak ni Selomi Neftali Pedahel, anak ni Amiud

29Amo ini ang mga lalaki nga ginpili sang Ginoo sa pagparti sang duta para sa mga tawo sang Israel sa duta sang Canaan.

← Chapter 33 Jump to: Chapter 35 →