Numbers 3

Ilonggo (Maayong Balita nga Biblia (2012))

← Chapter 2 Jump to: Chapter 4 →

1Amo ini ang panimalay ni Aaron kag ni Moises sang paghambal sang Ginoo kay Moises sa Bukid sang Sinai.

2Si Aaron may apat ka mga anak nga lalaki: si Nadab, ang kamagulangan, si Abiu, si Eleazar, kag si Itamar.

3Ginhaplasan sila kag gin-ordinan subong mga pari,

4pero si Nadab kag si Abiu napatay sang paghalad nila sing di-balaan nga kalayo sa Ginoo sa Desierto sa Sinai. Wala sila sing mga anak, gani si Eleazar kag si Itamar lamang ang nag-alagad subong mga pari sang buhi pa si Aaron.

5Ang Ginoo nagsiling kay Moises:

6“Pakadtua ninyo diri sa atubangan ang tribo ni Levi kag himua ninyo sila nga mga suloguon ni Aaron nga pari.

7Pagahimuon nila ang mga hilikuton nga kinahanglanon para sa Tolda sang akon presensya kag magahimo sila sang mga katungdanan para sa mga pari kag para sa bug-os nga katilingban.

8Sila ang magatatap sang tanan nga mga gamit sang Tolda kag magahimo sang mga katungdanan para sa iban nga mga Israelinhon.

9Ang katungdanan sang mga Levita amo lamang ang pag-alagad kay Aaron kag sa iya mga anak nga lalaki.

10Pilion mo si Aaron kag ang iya mga anak nga lalaki sa pagtuman sang mga katungdanan sang mga pari, ang bisan sin-o nga iban nga magtinguha sa paghimo sang ila mga katungdanan pagapatyon.”

11Ang Ginoo nagsiling kay Moises:

12“Karon ang mga Levita mangin-akon. Sang pagpamatay ko sang tanan nga mga panganay sang mga Ehiptohanon, ginpakabalaan ko agod mangin-akon ang panganay nga anak nga lalaki sang tagsa ka panimalay sang mga Israelinhon kag ang panganay sang tagsa ka sapat. Karon, sa baylo sang mga panganay nga anak nga lalaki sang mga Israelinhon, mangin-akon ang mga Levita. Sila mangin-akon. Ako amo ang Ginoo.”

14Sa Desierto sang Sinai ang Ginoo nagmando kay Moises:

15“Listahon mo ang mga Levita suno sa mga barangay kag mga panimalay, nga nagalakip sang tagsa ka lalaki nga nagaedad sing isa ka bulan paibabaw.”

16Gani gintuman ini ni Moises.

17Si Levi may tatlo ka mga anak nga lalaki nga amo sanday Gerson, Kohat, kag Merari, nga amo ang mga katigulangan sang mga kabarangayan nga nagadala sang ila mga ngalan. Si Gerson may duha ka mga anak nga lalaki: sila amo sanday Libni kag Simei. Si Kohat may apat ka mga anak nga lalaki: sila amo sanday Amram, Izar, Hebron, kag Uziel. Kag si Merari may duha ka mga anak nga lalaki: sila amo sanday Mali kag Musi. Amo ini sila ang mga katigulangan sang mga panimalay nga nagadala sang ila mga ngalan.

21Ang barangay ni Gerson nabug-osan sang duha ka mga panimalay nga amo ang mga Libninhon kag ang mga Simeinhon.

22Ang bug-os nga kadamuon sang mga lalaki nga nagaedad sing isa ka bulan paibabaw nga nalista 7,500.

23Ini nga barangay dapat magpatindog sang ila kampo sa likod sang Tolda sang presensya sang Ginoo, sa nakatundan,

24upod kay Eliasaf nga anak nga lalaki ni Lael subong nga pangulo sang barangay.

25Sila ang magatatap sang Tolda, ang iya nasulod nga lipon, ang iya nagwa nga lipon, sang kurtina sa pwertahan,

26sang mga kurtina para sa pasiyuhan sa palibot sang Tolda kag sang altar, kag sang kurtina para sa pwertahan sang pasiyuhan. Sila ang gintugyanan sang tanan nga mga hilikuton nga may kaangtanan sini nga mga butang.

27Ang barangay ni Kohat nabug-osan sang apat ka mga panimalay nga amo ang masunod: mga Amramhon, mga Izranhon, mga Hebronhon, kag mga Uzielnon.

28Ang bug-os nga kadamuon sang mga lalaki nga nagaedad sing isa ka bulan paibabaw nga nalista 8,600.

29Ini nga barangay magpatindog sang ila kampo sa nabagatnan nga bahin sang Tolda sang presensya sang Ginoo,

30upod kay Elisafan nga anak nga lalaki ni Uziel subong pangulo sang barangay.

31Sila ang gintugyanan sang Kaban sang Kasugtanan, sang lamisa, sang kandelirohan, sang mga altar, sang mga gamit nga ginagamit sang mga pari sa Balaan nga Duog, kag ang kurtina sa pwertahan pakadto sa Labing Balaan nga Duog. Sila ang gintugyanan sang tanan nga mga hilikuton nga may kaangtanan sa sini nga mga butang.

32Ang pangulo sang mga Levita amo si Eleazar nga anak ni Aaron nga pari. Sia amo ang nagadumala sang mga nagaalagad sa Balaan nga Duog.

33Ang barangay ni Merari nabug-osan sang duha ka mga panimalay nga amo ang mga Mahalinhon kag ang mga Musinhon.

34Ang bug-os nga kadamuon sang mga lalaki nga nagaedad sing isa ka bulan paibabaw nga nalista 6,200.

35Ini nga barangay magpatindog sang ila mga tolda sa naaminhan nga bahin sang Tolda sang presensya sang Ginoo, upod kay Zuriel nga anak nga lalaki ni Abihail subong pangulo sang barangay.

36Gintugyan sa ila ang pagtatap sang mga dingding sang Tolda, ang mga baral sini, mga haligi, mga sadsaran, kag ang tanan sini nga mga alangtan. Sila ang gintugyanan sang tanan nga mga hilikuton nga may kaangtanan sa sini nga mga butang.

37Sila man ang magatatap sang mga haligi, mga sadsaran, mga palpal, kag mga kalat para sa nagwa nga pasiyuhan.

38Si Moises kag si Aaron kag ang iya mga anak nga lalaki nagpatindog sang ila kampo sa atubangan sang Tolda sang presensya sang Ginoo sa sidlangan. Sila ang gintugyanan sa pagpatuman sang mga hilikuton nga ginahimo sa Balaan nga Duog para sa mga tawo sang Israel. Ang bisan sin-o nga iban nga magtinguha sa paghimo sini pagapatyon.

39Ang bug-os nga kadamuon sang tanan nga mga lalaki nga Levita nga nagaedad sing isa ka bulan paibabaw nga ginlista ni Moises suno sa mga kabarangayan sa mando sang Ginoo, naglambot sa 22,000.

40Ang Ginoo nagsiling kay Moises: “Ang tanan nga mga panganay nga lalaki sang mga Israelinhon akon. Gani listahon mo ang ngalan sang tagsa ka panganay nga anak nga lalaki nga Israelinhon, nga nagaedad sing isa ka bulan paibabaw. Pero sa baylo nila, ginaangkon ko ang tanan nga mga Levita nga mangin-akon! Ako amo ang Ginoo! Akon man ginaangkon ang mga kasapatan sang mga Levita sa baylo sang tanan nga mga panganay sang mga kasapatan.”

42Gintuman ini ni Moises kag ginlista niya ang tanan nga panganay nga mga lalaki

43nga nagaedad sing isa ka bulan paibabaw: ang bug-os nga kadamuon naglambot sa 22,273.

44Ang Ginoo nagsiling kay Moises:

45“Karon ihalad ang mga Levita nga mangin-akon sa baylo sang tanan nga mga panganay nga anak nga lalaki sang mga Israelinhon, kag ihalad ang mga kasapatan sang mga Levita sa baylo sang mga panganay nga mga kasapatan sang mga Israelinhon.

46Tungod kay ang panganay nga mga anak nga lalaki sang Israel nagdamo pa sing 273 sang sa panganay nga mga anak nga lalaki sang mga Levita, kinahanglan gawaron mo ang sobra nga mga anak nga lalaki.

47Para sa tagsatagsa, magbayad ka sing lima ka bilog nga pilak, suno sa opisyal nga talaksan,

48kag ihatag ini nga kwarta sa kay Aaron kag sa iya mga anak nga lalaki.”

49Si Moises nagtuman kag nagkuha

50sing 1,365 ka bilog nga pilak,

51kag ginhatag niya ini kay Aaron kag sa iya mga anak nga lalaki.

← Chapter 2 Jump to: Chapter 4 →