Numbers 22

Ilonggo (Maayong Balita nga Biblia (2012))

← Chapter 21 Jump to: Chapter 23 →

1Ang mga Israelinhon nagpadayon sa paglakat kag naghimo sila sing kampo sa mga kapatagan sang Moab, sa sidlangan sang Jordan, sa atubangan sang Jerico.

2Sang ang hari sang Moab nga si Balak nga anak nga lalaki ni Zipor nakabati sang ginhimo sang mga Israelinhon sa mga Amornon kag kon daw ano kadamo sang mga Israelinhon,

3sia kag ang iya mga tawo hinadlukan gid.

4Ang mga Moabnon nagsiling sa mga pangulo sang mga taga-Midian, “Ini nga grupo magalaglag sa labing madali sang tagsa ka butang sa palibot naton, kaangay sang isa ka toro nga baka nga nagaharab sang hilamon sa isa ka halalban.” Gani si Haring Balak

5nagpadala sing mga mensahero sa pagtawag kay Balaam, anak nga lalaki ni Beor, nga yadto didto sa Petor malapit sa Suba sang Eufrates sa duta sang Amaw. Gindala nila sa iya ining balita halin kay Balak: “Luyag ko nga mahibal-an mo nga ang isa ka pungsod nag-abot halin sa Ehipto, ang mga tawo sini nagalapta bisan diin kag nagapamahog sa pag-agaw sang amon duta.

6Mas madamo sila sang sa amon, gani kon mahimo mag-abot ka kag pakamalauta sila para sa akon. Kag ayhan sarang namon sila madaog kag matabog pa gwa sa duta. Nahibal-an ko nga kon magbendisyon ka ang mga tawo mabendisyunan, kag kon magpakamalaut ka pakamalauton sila.”

7Gani ang mga pangulo sang mga Moabnon kag mga Midianhon nagdala sang bayad para sa pagpakamalaut, nagkadto sila kay Balaam, kag ginhatag nila sa iya ang mensahe ni Balak.

8Si Balaam nagsiling sa ila, “Pabilin kamo diri sa sini nga gab-i, kag buas sugiran ko kamo kon ano ang isiling sang Ginoo sa akon.” Gani ang mga pangulo nga mga Moabnon nagpabilin upod kay Balaam.

9Pagkagab-i, ang Dios nagpamangkot kay Balaam, “Sin-o ining mga tawo nga nagapabilin upod sa imo?”

10Nagsabat sia, “Ginpadala sila ni Haring Balak sang Moab sa pagsugid sa akon

11nga may mga katawhan nga nag-abot halin sa Ehipto nga naglapta sa bug-os nga duta. Luyag niya nga pakamalauton ko sila para sa iya agod makapakig-away sia sa ila kag matabog sila pa gwa.”

12Ang Dios nagsiling kay Balaam, “Indi ka mag-upod sa sini nga mga tawo, kag indi pagpakamalauta ang mga tawo sang Israel, tungod kay ginbendisyunan ko sila.”

13Sang madason nga aga, nagkadto si Balaam sa mga mensahero ni Balak kag ginsingganan sila, “Pauli kamo, kay ang Ginoo indi luyag nga mag-upod ako sa inyo.”

14Gani nagbalik sila kay Balak kag ginsugiran sia nga si Balaam indi mag-upod sa ila.

15Dayon si Balak nagpadala sing madamo pa gid nga mga pangulo, nga labi pa ka gamhanan sang sa nahauna.

16Nagkadto sila kay Balaam kag ginhatag nila sa iya ini nga mensahe halin kay Balak: “Kon mahimo indi pagtugoti nga masablagan ka sang bisan ano sa pagkadto sa akon!

17Suholan ko ikaw sang tama ka daku kag himuon ko ang bisan ano nga isiling mo. Kon mahimo mag-abot ka kag pakamalauta ini nga mga tawo para sa akon.”

18Pero si Balaam nagsabat, “Bisan ihatag sa akon ni Balak ang tanan nga pilak kag bulawan sa iya palasyo, indi ako maglapas sang sugo sang Ginoo nga akon Dios bisan sa diutay lang nga bagay.

19Pero kon mahimo magpabilin kamo diri karon nga gab-i subong sang ginhimo sang iban, agod mahibal-an ko kon bala ang Ginoo may iban pa nga luyag isiling sa akon.”

20Sadto nga gab-i ang Dios nag-abot kay Balaam kag nagsiling, “Kon ini nga mga tawo nag-abot sa pag-agda sa imo sa pag-upod sa ila, maghimos ka kag maglakat, pero himua lang ang ginasiling ko sa imo.”

21Gani sang madason nga aga, gintakdan ni Balaam sing montora ang iya asno, kag nag-upod sia sa mga pangulo sang mga Moabnon.

22Ang Dios naakig sang paglakat ni Balaam, kag samtang si Balaam naglakat nga nagasakay sa iya asno, nga ginaupdan sang duha niya ka mga suloguon, ang anghel sang Ginoo nagtindog sa dalan sa pagbalabag sa iya alagyan.

23Sang makita sang asno ang anghel nga nagatindog didto nga nagauyat sang espada, naglipas ini sa dalan kag nagpadulong sa mga kaumhan. Ginhanot ni Balaam ang asno kag ginpabalik ini sa dalan.

24Dayon ang anghel nagtindog sa makitid nga dalan sa gintung-an sang duha ka talamnan sang mga ubas kag mga pader nga bato sa pihak kag pihak.

25Sang makita sang asno ang anghel nagbunggo sia sa pader kag naipit ang tiil ni Balaam sa pader. Ginhanot liwat ni Balaam ang asno.

26Sa liwat ang anghel nagkadto sa unhan, nagtindog sia sa isa ka makitid nga duog sa diin wala na sing sarang maagyan sa pihak kag pihak.

27Sa sini nga tion, sang makita sang asno ang anghel, nagluko sia. Wala na makapugong si Balaam sang iya kaakig kag ginsugoran niya ang paghanot sang asno sang iya bilugon.

28Dayon ginpahambal sang Ginoo ang asno, kag nagsiling ini kay Balaam, “Ano bala ang ginhimo ko sa imo? Ngaa bala nga makatlo mo na ako ginhanot?”

29Nagsabat si Balaam, “Tungod kay ginbuang mo ako! Kon may espada lang ako ginpatay ko na ikaw.”

30Ang asno nagsabat, “Indi bala ako amo ang asno nga imo ginsakyan sa bug-os mo nga kabuhi? Naghimo bala ako sa imo sing pareho sini sang una?” Nagsabat sia, “Wala.”

31Dayon ginpakita sang Ginoo kay Balaam ang anghel nga nagatindog didto nga may espada; kag si Balaam nagluhod nga ang iya guya nagaduot sa duta.

32Ginpamangkot sia sang anghel, “Ngaa bala ginhanot mo ang imo asno sing subong sina sa makatlo ka beses? Nag-abot ako sa pagbalabag sa imo alagyan tungod kay indi ka tani dapat maglakat.

33Pero nakita ako sang imo asno kag naglikaw sia sing makatlo. Kon wala sia maglikaw napatay ko na ikaw, kag ginluwas ang asno.”

34Si Balaam nagsabat, “Nakasala ako. Wala ako makahibalo nga nagatindog ka sa dalan sa pagsumpong sa akon; pero karon kon nagahunahuna ka nga sala para sa akon ang pagpadayon mapauli ako.”

35Pero ang anghel nagsiling, “Upod ka sa sini nga mga tawo, pero ihambal lang ang akon ginasiling sa imo.” Gani si Balaam nag-upod sa ila.

36Sang pagkabati ni Balak nga nagapalapit si Balaam, naglakat sia sa pagsugata sa iya sa Ar, isa ka siudad sa ubay sang Suba sang Arnon sa dulonan sang Moab.

37Ginsingganan sia ni Balak, “Ngaa bala wala ka mag-abot sang nahauna nga pagpatawag ko sa imo? Naghunahuna ka bala nga indi ako makasarang sa pagsuhol sa imo?”

38Si Balaam nagsabat, “Yari na ako, indi bala? Pero karon, ano bala ang akon gahom? Ang akon lamang mahambal amo ang ginasiling sang Dios sa akon.”

39Gani si Balaam nag-upod kay Balak pakadto sa banwa sang Huzot,

40sa diin si Balak nag-ihaw sing mga baka kag mga karnero, kag ginhatag ang iban sang mga karne kay Balaam kag sa mga pangulo nga kaupod niya.

41Sang madason nga aga gindala ni Balak si Balaam sa pagtaklad pakadto sa Bamot Baal, sa diin makita niya ang bahin sang mga tawo sang Israel.

← Chapter 21 Jump to: Chapter 23 →