Numbers 24

Ilonggo (Maayong Balita nga Biblia (2012))

← Chapter 23 Jump to: Chapter 25 →

1Karon nahibal-an ni Balaam nga luyag sang Ginoo nga bendisyunan niya ang mga tawo sang Israel, gani wala na sia maglakat sa pagpangita sing mga tanda, subong sang iya ginhimo sang una. Nagliso sia pakadto sa desierto

2kag nakita niya ang mga tawo sang Israel nga nagpahamtang sang kampo suno sa ila mga tribo. Gingamhan sia sang Espiritu sang Dios,

3kag ginhambal niya ini nga tagna: “Ang mensahe ni Balaam nga anak ni Beor, ang mga pulong sang tawo nga makakita sing maathag,

4nga makabati sang ginasiling sang Dios. Sa akon paghimutad, makita ko ang isa ka palanan-awon nga halin sa Makagagahom nga Dios.

5Ang mga tolda sang Israel matahom,

6kaangay sang nagakubay nga mga palma, ukon subong sang mga hardin sa tupad sang isa ka suba, kaangay sang linaloes nga gintanom sang Ginoo, ukon sang mga sedro sa tupad sang tubig.

7Magaangkon sila sang bugana nga ulan kag magatanom sila sing binhi sa mga talamnan nga madamo sing tubig. Ang ila hari mangingamhanan pa sang sa kay Agag, kag ang iya paggahom magasangkad.

8Ang Dios nagpagwa sa ila sa Ehipto, nagapakig-away sia para sa ila kaangay sang baka nga simaron. Ginahalunhon nila ang ila mga kaaway, ginadugmok ang ila mga tul-an, ginabali ang ila mga pana.

9Ang pungsod kaangay sang isa ka makusog nga leon, kon nagakatulog ini wala sing mangahas sa pagpukaw sa iya. Ang bisan sin-o nga nagabendisyon sang Israel pagabendisyunan, kag ang bisan sin-o nagapakamalaut sang Israel pagapakamalauton.”

10Gin-umolan ni Balak si Balaam sa kaakig kag ginsingganan, “Gintawag ko ikaw sa pagpakamalaut sang akon mga kaaway, pero sa baylo, ginbendisyunan mo sila sing makatlo na.

11Karon magpauli ka! Nagsaad ako nga suholan ka, pero ang Ginoo indi magtugot sa imo nga makuha ini nga suhol.”

12Nagsabat si Balaam, “Ginsingganan ko ang mga mensahero nga ginpadala mo sa akon nga

13bisan ihatag mo sa akon ang tanan nga pilak kag bulawan sa imo palasyo, indi ko malapas ang sugo sang Ginoo paagi sa paghimo sang bisan ano nga butang sa akon kaugalingon nga pagbuot. Ihambal ko ang ginasugo lamang sang Ginoo sa akon nga ihambal.”

14Si Balaam nagsiling kay Balak, “Karon mabalik ako sa akon mga kasimanwa, pero sa wala pa ako maglakat, ginapaandaman ko ikaw sang pagahimuon sang mga tawo sang Israel sa imo mga tawo sa ulihi.”

15Dayon ginhambal niya ini nga tagna: “Ang mensahe ni Balaam nga anak ni Beor, ang mga pulong sang tawo nga makakita sing maathag,

16nga makabati sang ginasiling sang Dios, kag makabaton sang ihibalo halin sa Labing Gamhanan. Sa akon pagtulok sing masipat, makita ko ang isa ka palanan-awon halin sa Makagagahom nga Dios.

17Nagatulok ako sa palaabuton, kag makita ko ang pungsod sang Israel. Ang isa ka hari, kaangay sang isa ka masanag nga bituon, magasubang sa sina nga pungsod. Kaangay sang isa ka kometa nagagikan sia sa Israel. Laglagon niya ang mga pangulo sang Moab, kag lutoson niya ang tanan nga mga bugalon kag mapintas.

18Lutoson niya ang iya mga kaaway sa Edom kag himuon ang ila duta nga iya pagkabutang, samtang ang Israel nagapadayon sa pagdaog.

19Lapakon sila sang pungsod sang Israel kag papason ang nabilin nga mga buhi.”

20Dayon sa iya palanan-awon nakita ni Balaam ang mga Amaleknon kag naghambal sia sini nga mensahe halin sa Dios: “Ang Amalek amo ang labing gamhanan nga pungsod sa tanan, pero sa ulihi malaglag ini sa walay katapusan.”

21Sa iya palanan-awon nakita niya ang mga Kenhanon, kag naghambal sia sini nga mensahe halin sa Dios: “Ang lugar sa diin ikaw nagaestar malig-on, hilway sa katalagman subong sang isa ka pugad nga nabutang sa isa ka mataas nga pil-as,

22pero kamo nga mga Kenhanon malaglag kon bihagon kamo sang Asiria.”

23Si Balaam naghambal sini nga mensahe halin sa Dios: “Sin-o bala ining mga tawo nga nagatipon sa aminhan?”

24Ang manuggubat magapanakayon halin sa Cipre, lutoson nila ang Asiria kag Eber, pero sa baylo, sila amo ang malaglag sing dayon.”

25Dayon si Balaam naghanda kag nagpauli, kag si Balak nagpadayon sa iya paglakat.

← Chapter 23 Jump to: Chapter 25 →