Numbers 21

Ilonggo (Maayong Balita nga Biblia (2012))

← Chapter 20 Jump to: Chapter 22 →

1Sang pagkabati sang Canaanhon nga hari sang Arad sa nabagatnan nga bahin sang Canaan nga ang mga Israelinhon nagapakadto paagi sa alagyan sang Atarim, ginsalakay niya sila kag ginbihag ang iban sa ila.

2Dayon ang mga Israelinhon naghimo sing panaad sa Ginoo: “Kon imo lang kami padag-on sa sini nga mga tawo, amon sila ihalad sa imo nga wala sing hawidhawid kag ang ila mga siudad kag laglagon sila.”

3Ginpamatian sila sang Ginoo kag ginbuligan sila sa pagdaog sang mga Canaanhon. Gani ang mga Israelinhon naglaglag sa ila sing bug-os kag sang ila mga siudad, kag ginhingalanan ang lugar nga Horma.

4Ang mga Israelinhon naghalin sa Bukid sang Hor paagi sa alagyan nga nagapadulong sa Gulfo sang Aqaba, agod makalibot sila sa kadutaan sang Edom. Pero sa dalanon nadulaan sila sang pasensya,

5kag naghambal sila batok sa Dios kag kay Moises. Nagreklamo sila, “Ngaa bala ginpagwa ninyo kami halin sa Ehipto agod magkalamatay sa sini nga desierto, sa diin wala sing kalan-on kag tubig? Indi kami makaagwanta sining kalan-on nga wala sing data!”

6Dayon ang Ginoo nagpadala sing mga man-og nga dalitan sa tunga sang mga tawo, kag madamo sang mga Israelinhon ang ginbuntog kag nagkalamatay.

7Ang mga tawo nagpalapit kay Moises kag nagsiling, “Nakasala kami sang paghambal namon batok sa Ginoo kag sa imo. Karon magpangamuyo ka sa Ginoo nga panguhaon niya ini nga mga man-og.” Gani si Moises nagpangamuyo para sa mga tawo.

8Dayon ang Ginoo nagsugo kay Moises sa paghimo sing man-og nga bronsi kag ibutang ini sa isa ka tukon, agod nga ang bisan sin-o nga mabuntog makatulok sa sini kag magaayo.

9Gani si Moises naghimo sing isa ka man-og nga bronsi kag ginbutang ini sa isa ka tukon. Ang bisan sin-o nga ginbuntog magatulok sa sining man-og nga bronsi kag magaayo sia.

10Nagpadayon ang mga Israelinhon sa paglakat kag naghimo sila sing kampo sa Obot.

11Sa tapos sila makahalin sa sadto nga lugar, naghimo sila sing kampo sa mga ginub-an sang Abarim sa desierto sa nasidlangan nga kadutaan sang mga Moabnon.

12Dayon naghimo sila sing kampo sa Kapatagan sang Zered.

13Halin didto nagpadayon sila liwat sa paglakat kag naghimo sing kampo sa naaminhan nga bahin sang Suba sang Arnon, sa desierto nga nagalambot sa kadutaan sang mga Amornon. (Ang Arnon amo ang dulonan sa tunga sang mga Moabnon kag mga Amornon.)

14Amo ini ang kabangdanan nga ang Libro nahanungod sang Pagpakig-away sang Ginoo nagasugid nahanungod sang “…ang banwa sang Waheb sa Sufa, kag sa mga kapatagan; ang Suba sang Arnon,

15kag ang banglid sa mga kapatagan nga nagalambot sa banwa sang Ar pakadto sa dulonan sang Moab.”

16Halin didto nagpadayon sila sa isa ka lugar nga gintawag Mga Bubon, sa diin ang Ginoo nagsiling kay Moises, “Tipuna ang mga tawo kag hatagan ko sila sing tubig.”

17Sa sadto nga tion ang mga tawo sang Israel nagkanta sini nga ambahanon: “Mga bubon, patubora ang imo tubig, kag abi-abihon namon ini sing isa ka ambahanon—

18Ang bubon ginkutkot sang mga prinsipe, kag sang mga pangulo sang mga tawo, ang gingamit sa pagkutkot amo ang isa ka setro sang Hari kag sang ila mga sungkod.” Halin sa desierto nagpadayon sila sa Matana,

19kag halin didto nagpadulong sila sa Nahaliel, kag halin sa Nahaliel pakadto sa Bamot,

20kag halin sa Bamot pakadto sa kapatagan sa kadutaan sang mga Moabnon, sa ubos sang putokputokan sang bukid sang Pisga nga nagatamod sa desierto.

21Dayon ang mga tawo sang Israel nagpadala sing mga mensahero sa kay Haring Sihon nga Amornon sa pagsiling:

22“Paagya kami sa imo duta. Kami kag ang amon mga kasapatan indi maglipas sa alagyan kag magkadto sa imo mga kaumhan ukon mga talamnan sang ubas, kag indi kami mag-inom sing tubig sa imo mga bubon; indi kami maglipas sa mayor nga dalan tubtob makagwa kami sa imo duta.”

23Pero si Sihon indi magtugot sa mga tawo sang Israel sa pag-agi sa iya duta. Gintipon niya ang iya mga hangaway kag nagwa sila pakadto sa Jahaz sa desierto kag ginsalakay ang mga Israelinhon.

24Pero ang mga Israelinhon nagpamatay sang madamo nga mga kaaway sa inaway, kag gin-agaw ang ila duta, halin sa Suba sang Arnon sa naaminhan pakadto sa Jaboc, tubtob sa Jazer sa dulonan sang mga Amonhon.

25Gani ang mga tawo sang Israel nag-agaw sang tanan nga mga siudad sang mga Amornon, lakip ang Hesbon kag ang palibot nga mga banwa, kag gin-estaran nila ini.

26Ang Hesbon amo ang kapital nga siudad sang Amornon nga hari nga si Sihon, nga nagpakig-away sang una batok sa nahauna nga hari sang Moab kag gin-agaw ang iya tanan nga kadutaan tubtob sa Suba sang Arnon.

27Amo gani nga ang mga manugbinalaybay nagkanta, “Dali kamo sa Hesbon, sa siudad ni Haring Sihon! Luyag namon makita nga ginpatindog ini liwat kag ginpalig-on.

28Sang una halin sa sining siudad sang Hesbon, ang mga hangaway ni Sihon naggwa kaangay sang kalayo, ginlaglag nila ang siudad sang Ar, sa Moab, kag ginhalunhon ang mga bakulod sang naibabaw nga Arnon.

29Daw ano kalain sa inyo, mga tawo sang Moab! Kamo nga mga nagasimba kay Kemos, nalaglag na! Ang inyo dios naghimo sang mga kalalakin-an nga mga laaslaas, ang mga kababayin-an nanginbihag sang Amornon nga hari.

30Pero karon ang ila mga kaliwat nalaglag, halin sa Hesbon pakadto sa Dibon, halin sa Nashim pakadto sa Nofa, malapit sa Medeba.”

31Gani ang mga tawo sang Israel nag-estar sa kadutaan sang mga Amornon,

32kag si Moises nagpadala sing mga tawo sa pagpangita sang labing maayo nga paagi sa pagsalakay sang siudad sang Jazer. Gin-agaw ini sang mga Israelinhon kag ang iya palibot nga mga banwa kag gintabog pa gwa ang mga Amornon nga nagaestar didto.

33Dayon nagliso ang mga Israelinhon kag nag-agi sa dalan pakadto sa Basan, kag si Haring Og sang Basan naggwa upod sa iya mga hangaway sa pagsalakay sa ila sa Edrei.

34Ang Ginoo nagsiling kay Moises, “Indi ka magkahadlok sa iya. Padag-on ko ikaw batok sa iya, kag sa iya mga tawo, kag sa iya duta. Himua sa iya ang imo ginhimo kay Sihon, ang Amornon nga hari nga naggahom sa Hesbon.”

35Gani ginpatay sang mga Israelinhon si Og, ang iya mga anak nga lalaki, ang tanan niya nga mga tawo, nga wala sing ginbilin nga buhi, kag ila dayon gin-estaran ang iya duta.

← Chapter 20 Jump to: Chapter 22 →