Numbers 23

Ilonggo (Maayong Balita nga Biblia (2012))

← Chapter 22 Jump to: Chapter 24 →

1Ginsingganan niya si Balak, “Patindugi ako diri sing pito ka mga altar, kag dalhi ako sing pito ka toro nga mga baka kag pito ka mga karnero nga lalaki.”

2Ginhimo ni Balak ang ginsiling sa iya, kag sia kag si Balaam naghalad sing toro nga baka kag karnero nga lalaki sa tagsa ka altar.

3Dayon ginsingganan ni Balaam si Balak, “Magtindog ka diri sa tupad sang imo halad nga sinunog, samtang malakat ako sa paghibalo kon bala ang Ginoo magapakigkita sa akon ukon indi. Sugiran ko ikaw sang bisan ano nga iya ipahayag sa akon.” Gani nagtaklad sia nga isahanon pakadto sa putokputokan sang bakulod,

4kag ang Dios nagsugata sa iya. Nagsiling si Balaam sa iya, “Nagpatindog ako sing pito ka mga altar kag naghalad sing isa ka toro nga baka kag isa ka karnero nga lalaki sa tagsa ka altar.”

5Ang Ginoo nagsugo kay Balaam kon ano ang isiling kag ginpadala sia pabalik kay Balak sa pagsugid sang luyag ihambal sang Ginoo.

6Gani nagbalik sia kag nakita niya si Balak nga nagatindog pa didto sa tupad sang iya halad nga sinunog, upod sa tanan nga mga pangulo sang Moab.

7Si Balaam naghambal sang sini nga mensahe halin sa Ginoo: “Si Balak nga hari sang Moab nagdala sa akon halin sa Siria, halin sa nasidlangan nga mga kabukiran. Siling niya, ‘Dali kag maghambal ka para sa akon, pakamalauta ang mga tawo sang Israel.’

8Ano ang pagpakamalaut ko sang wala ginapakamalaut sang Dios, ukon ano bala ang pagkondenar ko sang wala ginkondenar sang Dios?

9Halin sa mataas nga mga igang sa bukid makita ko sila, matan-aw ko sila halin sa mga kabakuloran. Sila isa ka pungsod nga nagaestar sing isahanon, nahibal-an nila nga mas bulahan sila sang sa iban nga mga pungsod.

10Ang mga kaliwat ni Israel kaangay sang yab-ok— kadamo sa ila nga indi sarang maisip. But-a nga matapos ang akon mga inadlaw kaangay sang isa sang mga tawo sang Dios, but-a nga mapatay ako nga may kalinong kaangay sang isa ka tawo nga matarong.”

11Dayon si Balak nagsiling kay Balaam, “Ano bala ining ginhimo mo sa akon? Gindala ko ikaw diri sa pagpakamalaut sang akon mga kaaway, pero ang imo lamang ginhimo amo ang pagbendisyon sa ila.”

12Nagsabat sia, “Ang akon lamang mahambal amo ang ginasiling sang Ginoo sa akon nga ihambal.”

13Dayon si Balak nagsiling kay Balaam, “Mag-upod ka sa akon sa isa pa ka lugar sa diin makita mo ang bahin lamang sang mga Israelinhon. Halin didto pakamalauta sila para sa akon.”

14Gindala niya si Balaam sa latagon sang Zofim sa putokputokan sang Bukid sang Pisga. Nagpatindog man sia didto sing pito ka mga altar kag naghalad sing isa ka toro nga baka kag isa ka karnero nga lalaki sa tagsa ka altar.

15Ginsingganan ni Balaam si Balak, “Magtindog ka diri sa tupad sang imo halad nga sinunog, kag magakadto ako sa unhan sa pagpakigkita sa Dios.”

16Ang Ginoo nagpakigkita kay Balaam, ginsugo sia sang iya inughambal, kag ginpadala sia pabalik kay Balak sa paghambal sang iya mensahe.

17Gani nagbalik sia kag nakita niya si Balak nga nagatindog pa didto sa tupad sang iya halad nga sinunog, upod sa mga pangulo sang Moab. Nagpamangkot si Balak kon ano ang ginsiling sang Ginoo,

18kag si Balaam naghambal sini nga mensahe halin sa Ginoo: “Dali ka, Balak nga anak ni Zipor, kag magpamati ka sa akon ihambal.

19Ang Dios indi kaangay sang mga tawo nga nagabutig, indi sia isa ka tawo nga nagabaylo sang iya hunahuna. Kon ano ang iya ginasaad, iya ginatuman, ang iya ginahambal, iya ginahimo.

20Ginsugo ako sa pagbendisyon, kag kon ang Dios nagabendisyon indi ako makabaliskad sini.

21Makita ko nga ang palaabuton sang Israel indi magdala sa iya sing kalainan ukon kabudlayan. Ang Ginoo nga ila Dios nagaupod sa ila, ginapakilala nila nga sia amo ang ila hari.

22Ang Dios nagdala sa ila pa gwa sa Ehipto, nagapakig-away sia tungod sa ila kaangay sang isa ka simaron nga baka.

23Wala sing manugpakot ukon manugbabaylan, nga sarang magamit batok sa pungsod sang Israel. Karon ang mga tawo magasiling nahanungod sa Israel, ‘Tan-awa ninyo ang ginhimo sang Dios!’

24Ang pungsod sang Israel kaangay sang isa ka leon nga makusog: indi sia mag-untat tubtob makusnit niya kag matukob kag mainom ang dugo sang iya mga ginpamatay.”

25Dayon si Balak nagsiling kay Balaam, “Indi ka magpakamalaut sang mga tawo sang Israel, pero indi man sila pagbendisyuni!”

26Nagsabat si Balaam, “Wala bala ako magsiling sa imo nga himuon ko ang tanan nga ginsugo sang Ginoo sa akon?”

27Si Balak nagsiling, “Mag-upod ka sa akon, kag dalhon ko ikaw sa isa pa gid ka lugar. Ayhan didto tugotan ka sang Dios sa pagpakamalaut sa ila para sa akon.”

28Gani, gindala niya si Balaam sa putokputokan sang Bukid sang Peor, nga nagatamod sa desierto.

29Ginsingganan sia ni Balaam, “Magpatindog ka diri sing pito ka mga altar para sa akon kag dalhi ako sing pito ka toro nga mga baka kag pito ka mga karnero nga lalaki.”

30Gintuman ni Balak ang ginsiling sa iya, kag naghalad sia sing isa ka toro nga baka kag isa ka karnero nga lalaki sa tagsa ka altar.

← Chapter 22 Jump to: Chapter 24 →