Numbers 9

Ilonggo (Maayong Balita nga Biblia (2012))

← Chapter 8 Jump to: Chapter 10 →

1Ang Ginoo naghambal kay Moises sa Desierto sang Sinai sa nahauna nga bulan sang ikaduha nga tuig sa tapos makahalin ang mga tawo sang Israel sa Ehipto. Nagsiling sia,

2“Ang mga tawo sang Israel kinahanglan magsaulog sang Pascua sa natalana nga tion

3sa ika-14 nga adlaw sini nga bulan, sugod sa pagtunod sang adlaw suno sa tanan nga mga pagsulondan kag mga tulomanon para sa sini.”

4Gani ginsugo ni Moises ang mga tawo sa pagsaulog sang Pascua,

5kag gintuman nila ini, sa gab-i sang ika-14 nga adlaw sang nahauna nga bulan sa Desierto sang Sinai. Ang mga tawo nagtuman sang tanan suno sa ginsugo sang Ginoo kay Moises.

6Pero may yara nga mga tawo nga di-matinlo, tungod kay nakatandog sila sing bangkay, kag wala sila makasaulog sang Pascua sa sadto nga adlaw. Nagkadto sila kay Moises kag kay Aaron

7kag nagsiling, “Di-matinlo kami tungod kay nakatandog kami sing bangkay, pero ngaa bala indi kami pagtugotan sa pagdulot sing halad sa Ginoo sa natalana nga tion upod sa iban nga mga Israelinhon?”

8Si Moises nagsabat, “Maghulat kamo tubtob makabaton ako sang itudlo sang Ginoo nahanungod sa inyo.”

9Ang Ginoo nagsugo kay Moises,

10“Singgana ang mga tawo sang Israel, kon di-matinlo ang bisan sin-o sa inyo ukon ang inyo mga kaliwat paagi sa pagtandog sang isa ka bangkay, ukon malayo kamo nga nagapanglakaton, pero luyag kamo magsaulog sang Pascua,

11ginatugotan kamo sa pagsaulog sini sa tapos sang isa ka bulan, sa gab-i sang ika-14 nga adlaw sang ikaduha nga bulan. Sauloga ninyo ini nga may tinapay nga wala sing lebadora kag may mapait nga mga tanom.

12Indi kamo magbilin sang bisan ano nga kalan-on tubtob sa madason nga aga kag indi ninyo pagbalia ang bisan ano nga mga tul-an sang sapat. Sauloga ang Pascua suno sa tanan nga mga pagsulondan.

13Pero ang bisan sin-o nga matinlo kag wala man sia nagpanglakaton kag wala nagasaulog sang Pascua, indi na pagkabigon nga isa sang akon mga katawhan, tungod kay wala sia magdulot sing halad sa akon sa natalana nga tion. Kinahanglan mag-antos sia tungod sang iya sala.

14“Kon ang isa ka dumoluong nga nagaestar upod sa inyo luyag magsaulog sang Pascua, kinahanglan saulogon niya ini suno sa tanan nga mga kasugoan kag mga pagsulondan. Amo man ini nga kasugoan ang pagatumanon sang tagsatagsa, tumandok man ukon dumoluong.”

15Sa adlaw nga ginpatindog ang Tolda sang presensya sang Ginoo, ginlikupan ini sang isa ka panganod. Kon gab-i ang panganod daw kalayo kon tan-awon.

17Kon mag-alsa ang panganod, ang mga tawo sang Israel nagahalin sing kampo, kag nagahimo sila liwat sing kampo sa diin nagapaidalom ang panganod.

18Ang mga tawo nagahalin sing kampo sa mando sang Ginoo, kag subong man nagahimo sila sing kampo suno sa iya sugo. Tubtob nagapabilin sa ibabaw sang Tolda ang panganod, nagapabilin man sila sa amo gihapon nga kampo.

19Kon ang panganod nagapabilin sa ibabaw sang Tolda sa malawig nga panahon, ginatuman nila ang Ginoo kag wala sila nagahalin.

20Kon kaisa ang panganod nagapabilin sa ibabaw sang Tolda sa sulod sing pila lamang ka adlaw; sa bisan ano nga kahimtangan nagapabilin sila sa kampo, ukon nagahalin sila suno sa mando sang Ginoo.

21Kon kaisa ang panganod nagapabilin lamang halin sa gab-i tubtob sa aga, kag nagahalin sila sa pag-alsa sang panganod. Kon mag-alsa ang panganod nagalakat sila.

22Bisan ini duha ka adlaw, isa ka bulan, isa ka tuig ukon malawig pa, tubtob nga ang panganod nagapabilin sa ibabaw sang Tolda, wala sila nagahalin, pero kon mag-alsa ini, nagalakat sila.

23Nagahimo sila sing kampo ukon nagahalin sila sing kampo suno sa mga sugo nga ginhatag sang Ginoo paagi kay Moises.

← Chapter 8 Jump to: Chapter 10 →