Numbers 36

Ilonggo (Maayong Balita nga Biblia (2012))

← Chapter 35 Jump to:

1Ang mga pangulo sang mga panimalay sa kabarangayan ni Galaad, nga anak ni Maquir kag apo ni Manases nga anak ni Jose, nagkadto kay Moises kag sa iban nga mga pangulo.

2Nagsiling sila, “Ang Ginoo nagsugo sa imo sa pagpamartida sang duta sa mga tawo sang Israel paagi sa pagabutgabot. Nagsugo man sia sa imo sa paghatag sang pagkabutang sang amon pariente nga si Zelofehad sa iya mga anak nga babayi.

3Pero dumdoma, nga kon magpamana sila sang mga lalaki sa iban nga tribo, ang ila pagkabutang mangin-iya sadto nga tribo, kag ang bahin nga ginhatag sa amon magadiutay.

4Sa Tuig sang Pag-uli, kon ang tanan nga pagkabutang nga ginbaligya iuli sa nahauna nga mga tag-iya, ang pagkabutang sang mga anak nga babayi ni Zelofehad pagaidugang sang permanente sa tribo sa diin sila nakapamana kag madulaan sini ang amon tribo.”

5Gani ginhatag ni Moises sa mga tawo sang Israel ang masunod nga sugo halin sa Ginoo. Nagsiling sia, “Husto ang ginsiling sang tribo ni Manases,

6gani ang Ginoo nagasiling nga ang mga anak nga babayi ni Zelofehad hilway sa pagpamana sang bisan sin-o nga luyag nila, pero sa ila lamang kaugalingon nga tribo.

7Ang pagkabutang sang tagsa ka Israelinhon magapabilin sa iya kaugalingon nga tribo.

8Ang tagsa ka babayi nga nakapanubli sing pagkabutang sa isa ka tribo sang Israel kinahanglan magpamana sang isa ka lalaki nga katapo sina nga tribo. Sa sini nga paagi ang tagsa ka Israelinhon magapanubli sang pagkabutang sang iya mga katigulangan,

9kag ang pagkabutang indi magsaylo halin sa isa ka tribo pakadto sa isa. Ang tagsa ka tribo magapadayon sa pagpanag-iya sang iya kaugalingon nga pagkabutang.”

10Gani, sanday Maala, Tirsa, Hogla, Milca, kag Noa, ang mga anak nga babayi ni Zelofehad, nagtuman suno sa ginsugo sang Ginoo kay Moises kag nagpamana sila sang ila mga pakaisa.

12Nagpamana sila sa mga kabarangayan sang tribo ni Manases nga anak ni Jose, kag ang ila pagkabutang nagpabilin sa tribo sang ila ginikanan.

13Amo ini ang mga kasugoan kag mga pagsulondan nga ginhatag sang Ginoo sa mga Israelinhon paagi kay Moises sa mga kapatagan sang Moab sa tabok sang Suba sang Jordan halin sa Jerico.

← Chapter 35 Jump to: