Numbers 32

Ilonggo (Maayong Balita nga Biblia (2012))

← Chapter 31 Jump to: Chapter 33 →

1Ang mga tribo ni Ruben kag ni Gad may madamo kaayo nga mga kabakahan. Sang makita nila nga ang duta sang Jazer kag Galaad maayo para sa mga kabakahan,

2nagkadto sila kanday Moises, Eleazar, kag sa iban nga mga pangulo sang katilingban kag nagsiling,

3“Ining kadutaan nga ginpang-agaw sang mga Israelinhon sa bulig sang Ginoo —ang mga banwa sang Atarot, Dibon, Jazer, Nimra, Hesbon, Eleale, Sebam, Nebo, kag Beon—maayo nga duta para sa mga kabakahan; kag tungod kay madamo ang amon mga kabakahan,

5kon mahimo, ihatag sa amon ini nga duta subong amon kaugalingon nga pagkabutang, kag indi kami pagpatabuka sa Suba sang Jordan kag didto mag-estar.”

6Nagsabat si Moises, “Luyag bala kamo magpabilin diri samtang ang inyo kapareho nga mga Israelinhon magakadto sa inaway?

7Kon himuan ninyo ina ginapatalaw ninyo ang mga tawo sang Israel sa pagtabok sa Jordan pakadto sa duta nga ginhatag sang Ginoo sa ila.

8Amo ini ang ginhimo sang inyo mga ginikanan sang pagpadala ko sa ila halin sa Kades Barnea sa pag-usisa sang duta.

9Nakalambot sila tubtob sa Kapatagan sang Escol kag nakita nila ang duta, pero sang pagbalik nila, ginpatalaw nila ang mga tawo sa pagsulod sa duta nga ginhatag sang Ginoo sa ila.

10Ang Ginoo naakig sadto nga adlaw, kag nagpanumpa:

11‘Ginasumpa ko nga tungod kay wala sila magpadayon sa pagkamatutom sa akon, wala sing bisan isa sang mga kalalakin-an nga nagaedad sing baynte ka tuig paibabaw nga naggwa sa Ehipto nga makasulod sa duta nga akon ginsaad sa kay Abraham, kay Isaac, kag kay Jacob.’

12Ini nagalakip sang tagsatagsa, wala labot kay Caleb nga anak ni Jefone nga Kenisnon kag kay Josue nga anak ni Nun, kay nagpadayon sila nga matutom sa Ginoo.

13Ang Ginoo naakig sa mga tawo kag nagpadalangdalang sa ila sa desierto sa sulod sang kwarenta ka tuig, tubtob yadtong bug-os nga kaliwatan nga wala magtuman sa Ginoo nagkalamatay.

14Kag karon nagbulos kamo sa inyo mga katigulangan, isa ka bag-o nga kaliwatan sang makasasala nga mga tawo nga handa sa pagdala liwat sang Israel sa nagabalingaso nga kaakig sang Dios.

15Kon kamo nga mga tawo ni Ruben kag ni Gad indi magsunod sa iya karon, iya liwat patumbayaan ini tanan nga mga tawo sa desierto, kag kamo ang manabat sa ila kalaglagan.”

16Nagpalapit sila kay Moises kag nagsiling, “Tugoti kami anay sa paghimo sing mga kudal nga bato sa amon mga karnero, kag mga banwa nga napamakuran para sa amon mga salaguron.

17Dayon manginhanda kami sa pag-upod sa amon kapareho nga mga Israelinhon pakadto sa inaway kag magauna kami sa pagsalakay tubtob mapaestar namon sila sa duta nga mangin-ila kaugalingon. Sa pihak nga bahin, ang amon mga salaguron makaestar diri sa napamakuran nga mga banwa, nga wala sing katalagman sa mga pumoluyo sini nga duta.

18Indi kami magpauli tubtob ang iban nga mga Israelinhon wala pa makapanag-iya sang duta nga ginhatag sa ila.

19Indi kami magpanag-iya sang bisan ano nga pagkabutang upod sa ila sa tabok sang Jordan, tungod kay nabaton na namon ang amon bahin diri sa sidlangan sang Jordan.”

20Nagsabat si Moises, “Kon matuod ang inyo ginasiling, diri sa presensya sang Ginoo maghanda kamo sa pagkadto sa inaway.

21Ang tanan ninyo nga mga hangaway kinahanglan magtabok sa Jordan, kag sa idalom sang pagmando sang Ginoo, salakayon ninyo ang aton mga kaaway tubtob malutos sila sang Ginoo

22kag maagaw ang duta. Sa tapos sini, sarang na kamo makabalik, tungod kay natuman na ninyo ang inyo katungdanan sa Ginoo kag sa inyo kapareho nga mga Israelinhon. Dayon pagakilalahon sang Ginoo nga ining duta sa sidlangan sang Jordan inyo.

23Pero kon indi ninyo pagtumanon ang inyo panaad, ginapaandaman ko kamo nga magapakasala kamo batok sa Ginoo. Indi kamo magsayop nahanungod sini, kay pagasilutan kamo tungod sang inyo sala.

24Gani magpatindog kamo sang inyo mga banwa kag sang mga kudal para sa inyo mga karnero, pero tumana ninyo ang inyo panaad!”

25Ang mga lalaki sang mga tribo ni Gad kag ni Ruben nagsiling, “Tumanon namon ang imo mando!

26Ang amon mga asawa kag mga kabataan, kag ang amon mga kabakahan kag mga karnero magapabilin diri sa mga banwa sang Galaad.

27Pero kami tanan handa sa pagkadto sa inaway sa idalom sang pagmando sang Ginoo. Matabok kami sa Jordan kag magapakig-away suno sa imo ginsiling.”

28Gani ginhatag ni Moises ini nga mga sugo kay Eleazar, kay Josue, kag sa iban nga mga pangulo sang Israel:

29“Kon ang mga kalalakin-an sang mga tribo ni Gad kag ni Ruben magtabok sa Jordan nga handa sa pagpakig-away sa mando sang Ginoo, kag kon sa bulig nila maagaw ninyo ang duta, dayon ihatag sa ila ang duta sang Galaad subong ila ginapanag-iyahan.

30Pero kon indi sila magtabok sa Jordan kag mag-upod sa inyo sa pagkadto sa inaway, magabaton sila sang ila bahin sang pagkabutang sa duta sang Canaan pareho sa inyo.”

31Ang mga kalalakin-an sang mga tribo ni Gad kag ni Ruben nagsabat, “Tumanon namon ang ginsugo sang Ginoo.

32Sa idalom sang iya pagmando, magatabok kami pakadto sa duta sang Canaan kag magakadto kami sa inaway, agod magapabilin nga amon ginapanag-iyahan ining duta sa nasidlangan sang Jordan.”

33Gani ginhatag ni Moises sa mga tribo ni Gad kag ni Ruben kag sa katunga nga tribo ni Manases ang tanan nga kadutaan ni Haring Sihon sang mga Amornon kag ni Haring Og sang Basan, lakip ang mga kabanwahanan kag ang mga kaumhan sa palibot nila.

34Ang tribo ni Gad nagpatindog liwat sang napamakuran nga mga banwa sang Dibon, Atarot, Aroer,

35Atrot-sofan, Jazer, Jagbeha,

36Bet-nimra, kag Bet-haran.

37Ang tribo ni Ruben nagpatindog liwat sang Hesbon, Eleale, ang Kiryataim,

38Nebo, Baal-meon (gin-islan ini nga ngalan), kag Sibma. Ginhatagan nila sing bag-o nga mga ngalan ang mga banwa nga ila ginpatindog liwat.

39Ang barangay ni Maquir nga anak ni Manases naggubat sang duta sang Galaad, gin-agaw ini, kag gintabog ang mga Amornon nga yadto didto.

40Gani ginhatag ni Moises ang Galaad sa barangay ni Maquir, kag nag-estar sila didto.

41Si Jair, gikan sa tribo ni Manases, nagsalakay kag nag-agaw sang iban nga mga kabarangayan kag ginhingalanan ini nga “Mga Barangay ni Jair.”

42Si Noba nagsalakay kag nag-agaw sang Kenat kag sang mga kabarangayan sini, kag ginhingalanan ini liwat nga Noba suno sa iya ngalan.

← Chapter 31 Jump to: Chapter 33 →