Acts 12

Ika 2018 Bible

← Chapter 11 Jump to: Chapter 13 →

1Ogẹn hụ, eze wụ Hẹrọdụ Agripa nọ mẹshimẹ ụfọdụ ndị-ụka ikẹn.

2O gigụọ ọpịa-agha gbu Jemisi nwẹnẹ Jọnụ;

3ọ hụn a nị ihiẹnni sụọ ndị Ju ụsụọ, ya ọ nọ nwụnrụn Pita. Ogẹn Mmẹmmẹ Brẹdi nwọnlẹni yisti kẹ ihiẹnni gi mẹ.

4Ọ nwụnrụn Pita, ọ nọ kpọkin ẹ ye imẹ ụlọ-ngan, bu ẹ che ẹka ndị-agha mmisin: itu-agha ẹnọ nwọnsọnmẹ ndị-agha ẹnọ-ẹnọ, kẹni, wẹ mẹgụ Mmẹmmẹ-Nghafe ya lẹ Mmẹmmẹ Brẹdi nwọnlẹni yisti a wị, o kin ẹ ikpe idẹnya ndị alị.

5E bu wẹ nwan Pita tọ ụlọ-ngan, kanị ndị-ụka nọ wepụha obi wẹ mẹmẹn'ẹ ekpere, a kpọku Osolobuẹ banyen'ẹ.

6W'a kpọ a eki kẹ Hẹrọdụ k'e wepụha Pita mẹ ẹ ihiẹn rị a obi. O ru imẹ uhinhin; Pita rị ụran ẹgbata ndị-agha ẹbụọ, wẹ gi ẹgan ẹbụọ kpọma a; ndị-agha hụzị ihun ọnụmụzọ ụlọ-ngan ahụn e che nche.

7Idẹnmizi, mmọn-ozi Di-nwọnni-ẹnyi nọ pụha; ukpẹ nọ nwun imẹ ụlọ-ngan hụ. Mmọn-ozi nọ kpa Pita ẹka ẹkụnkụn kpọtiẹn ẹ, sị a, “Lihi ọtọ ozigbo!” Ẹgan ndị ahụn nọ gha Pita olu ẹka danpụ.

8Mmọn-ozi hụ nọ sị Pita, “Kẹnmẹ akpụkpọ-ukun i, y'e yiri akpụkụ ị.” Pita nọ mẹ ihiẹn o ku. Ọ nọzị sị Pita, “Yiri ẹkwa y'e yiye elu ẹ, n'i sọnmẹ m.”

9Pita nọ sọn ẹ pụ. Pita rọ nị ọ rị a hụn ọhụn, ọ marịn nị ihiẹn ahụn rị e mẹni ẹlẹ ọhụn.

10A ghafegụ wẹ itu ibuzọ lẹ nke ẹbụọ rị e che nche, wẹ nọ ru ọnụ-mgbọn igwe wẹ gha a pụha imẹ obodo. Ọnụ-mgbọn nọ gụnpụnị wẹ ihiẹn-ẹka a, wẹ nọ ghafe, pụha ọgbara-ogbe ohu. E jẹnzụkazị wẹ, idẹnmizi mmọn-ozi hụ nọ la Pita tọ.

11Ogẹnni kẹ ẹnya gi fọn Pita, ọ nọ sị, “Kikẹnni k'o we m ẹnya: Di-nwọnni-ẹnyi zi mmọn-ozi ẹ d'a zụọpụha m ẹka Hẹrọdụ lẹ ihiẹn ile ndị Ju te rị a tụ ẹnya a.”

12Ọ ghọta ihiẹn mẹni, ọ nọ shi iwe Meri nnẹ Jọnụ — Jọnụ hụn ẹfan a wụzị Makị — ebe ndị bu ọda gbakikomẹ e mẹ ekpere. Ẹfan Jọnụ wụzị Makị.

13Ogẹn o gi dụ ẹka ọnụ-mgbọn, odibo ohu wụ okpoho w'a kpọ Roda nọ pụha d'a za.

14Ọ nụ olu Pita, ịghọghọ anịn'a gụnpụgụn'a ọnụ-mgbọn, ọ gbakin mmụlọ d'a gwa wẹ nị Pita turu ọnụ-mgbọn.

15Wẹ nọ sị a, “Ẹra rị a pụ ị!” Kanị ọ tọ a sị nị ezioku rọ. Wẹ nwẹn hụ a sị, “Mmọn-ozi Pita rọ.”

16Pita nkẹ hụkwọ a dụ ẹka. Ogẹn wẹ gi nwan gụnpụ ọnụ-mgbọn, hụn a, ọ nọ tụ wẹ ẹnya.

17Ọ nọ gi ẹka sị wẹ gba nkịtịn. Ọ nọ kọwanị wẹ kẹ Di-nwọnni-ẹnyi dọn wepụha a imẹ ụlọ-ngan; ọ sị wẹ, “Gwa nị Jemisi lẹ ndị ụka họdụnị.” Ya ọ nọ pụ, shi ụzọ ọzọ.

18Eki e fọn, okẹn isusu nọ rị imẹ ndị-agha hụ te rị e che Pita nche, wẹ gi rị a chọ ihiẹn mẹ Pita.

19Eze wụ Hẹrọdụ a chọgụ a, ọ hụnn'a, ọ nọ kpọnị ndị-agha hụ che ẹ nche ọgwa jụ wẹ kẹ wẹ jẹn, ya ọ nọ sị wẹ gbu wẹ. Ya nwẹn nọ gha Judia pụ, shi Sizaria d'a nọdị ẹkẹrẹ.

20Hẹrọdụ rị e buni ndị Taya lẹ Sidọnụ olulu ọda-ọda. Ya wẹ nọ zu d'a hụn a. A rịọtọgụọ wẹ Blastusu hụn e lepụ ọgwa Hẹrọdụ ẹnya n'o yeni wẹ ẹka. Ya wẹ nọ nwan jẹn d'e kunrun Hẹrọdụ d'a rịọ a nị wẹ dọn, makẹni alị Hẹrọdụ rị a kị kẹ alị wẹ gha e nwọnhẹn ihiẹn-oriri.

21Ụhụọhịn wẹ kaye e ru, Hẹrọdụ nọ yiri ẹwuru-nze ẹ, nọdị alị ukpo ẹ, gwama ndị hụ oku.

22Ndị ahụn e yimẹ, “Olu mmọn rọ, ẹlẹkwọ ịhịan-mmaka!!”

23Ozigbo, mmọn-ozi Osolobuẹ nọ titu Hẹrọdụ, makẹni o yeni Osolobuẹ ọghọ. Ọhọrị nọ bu ẹ ri, ọ nọ nwụnhụn.

24Kanị oku Osolobuẹ hụ a gha ihun, ndị bu ọda hụ e kweri.

25Ogẹn Banabasị lẹ Sọlụ gi rụngụ ihiẹn ahụn wẹ bịa Jerusalẹm d'a rụn, wẹ nọ kinhẹn Antịọkụ. Wẹ kinkọ, wẹ nọ weri Jọnụ hụn w'a kpọzị Makị.

← Chapter 11 Jump to: Chapter 13 →