Acts 14

Ika 2018 Bible

← Chapter 13 Jump to: Chapter 15 →

1Ihiẹn mẹ imẹ Antịọkụ rị Pisidia mẹzikwọ imẹ Ikoniọm. Pọlụ lẹ Banabasị banye imẹ ụlọ-ofufe ndị Ju rị ebẹhụ, ku oku-Chuku, nke wụ nị ndị bu ọda nọ kwerini Jesu, kẹ ndị Ju kẹ ndị wụlẹni ndị Ju.

2Kanị ndị Ju kwerilẹni nọ kpasu ndị wụlẹni ndị Ju, wiwi obi wẹ, wẹ nọ bunụmanị ndị kwerini.

3Wẹ nọbie ebẹhụ, e zini Di-nwọnni-ẹnyi ozi e zishi ẹ ikẹn. Di-nwọnni-ẹnyi hụ e gi wẹ a rụn ihiẹn-nghọsị lẹ ọrụn-atụmẹnya bu ọda o gi kwadọn ozi ẹfọma a.

4Kanị ndị obodo hụ kebe ekebe: ndịnị a nọyeni ndị Ju, ndịnị a nọyeni ndị-ozi hụ pụ-ichẹn wụ Banabasị lẹ Pọlụ.

5Ogẹn ndị Ju lẹ ndị wụlẹni ndị Ju lẹ ndị-isi alị gi chọ nị wẹ mẹshi ndị-ozi hụ pụ-ichẹn ikẹn, gi ọmụma magbu wẹ,

6ndị-ozi ahụn a nụ a, ya wẹ nọ gbashi Likonịa. Wẹ nọ jẹnsọnmẹ obodo ndị rị ebẹhụ, kẹ Listra kẹ Debẹ kẹ alị ndị nọhunmẹ ni wẹ,

7zikọ oziọma jẹnkọ.

8Imẹ Listra, o nwọn okẹnnyẹ ohu nọdị alị, ngụrọ k'ọ wụ kete wẹ mụl'a; o jẹntuni ijẹn.

9Ọ hụ e gọn ntịn ebe Pọlụ rị e ku oku-Chuku. Pọlụ nkẹ e bu ẹnya zinmẹ ẹ, hụn a n'o nwọnghọ okukwe o gi dịnhịn,

10ya ọ nọ yi, “Gi ụkụ ị ẹbụbụọ wuzo ọtọ!” Ya kẹ okẹnnyẹ nwẹn nọ tụshi elu, jẹnmẹ ijẹn.

11Ogẹn ndị hụ jun ebẹhụ gi hụn ihiẹn Pọlụ mẹ, wẹ nọ gi asụsụ Likonịa wẹ yimẹ, “Ndị mmọn e họnringụọ ịhịan hidan d'e kunrun ẹnyi-oo!”

12Wẹ nọ kpọ Banabasị Zeusu, kpọ Pọlụ Hẹmisi makẹni ya wụ hụn e kuni.

13Ụlọ-mmọn Zeusu rịhụ ọnụ obodo hụ. Ya ohẹn-mmọn Zeusu nọ wẹhẹ okẹn-efin bu ọda lẹ obobo ọnụ-mgbọn obodo hụ, ya lẹ igunrun hụ, ọ chọkọ n'ọ chụnyeni ndị-ozi hụ pụ-ichẹn ẹjan.

14Kanị ogẹn ndị-ozi hụ pụ-ichẹn wụ Banabasị lẹ Pọlụ gi nụ ihiẹnni, wẹ nọ dọka ẹwuru ye enwẹn wẹ olu, gbaban imẹ igunrun hụ, e yi,

15“Ibe ẹnyi, kị ụnụ rị e mẹ ihiẹnni?! Ẹnyi wụhụ ịhịan mmaka nọ kẹ ụnụ!! Ẹnyi wẹhẹni ụnụ oziọma, kẹni ụnụ hụn ụzọ gbehutọ, la ihiẹn ndịnị nwọnlẹni-isi tọ, pụha d'e kunrun Osolobuẹ rị ndụn, onyẹ hụn ke elu-igwee lẹ ụwa lẹ ohimin lẹ ihiẹn ile rị imẹ wẹ.

16Ogẹn mbụ, ọ nị alị ile rị ichẹn-ichẹn bi k'ọ sụọ wẹ.

17Kanị, onwọnni ogẹn o gi latọ ịshịanị enwẹn ẹ ẹri ghahanị mma ọ rị e mẹ. Ọ gha elu-igwee e mẹ mirin e zueni ụnụ, e ye ụnụ mkpụrụ a ghọrị udu wẹ, e ye ụnụ ihiẹn-oriri ụnụ gi e rijun ẹfọ, e mẹ ịghọghọ e jun ụnụ obi.”

18Ihiẹnni ile Pọlụ lẹ Banabasị e ku, ọ fụkwọ wẹ ọrụn nị wẹ d'a s'ẹka gbọndọn igunrun hụ achụnyelẹni wẹ ẹjan.

19Kanị o nwọn ndị Ju gha Antịọkụ lẹ Ikoniọm bịa Listra. A dọrịgụ wẹ igunrun hụ ye azụụn nke wẹ, ya wẹ nọ weri Pọlụ mama ọmụma, dọkpụnpụ a imẹ obodo hụ, e ro n'ọ nwụnhụngụọ.

20Kanị, ogẹn ndị kwerini gi fihunmẹ ẹ, ọ nọ lihi ọtọ, banye imẹ obodo hụ. Eki e fọn, ya lẹ Banabasị nọ shi Debẹ.

21Ogẹn wẹ gi zigụ oziọma imẹ Debẹ, kpọhagụnị Jesu ndị bu ọda, wẹ nọ kin azụụn, shizi obodo Listra, gha ebẹhụ shizi Ikoniọm, gha Ikoniọm shizi Antịọkụ rị Pisidia:

22wẹ hụ e jẹn, wẹ hụ a gba ndị nke Jesu rị imẹ obodo ndịnị umẹ; a gwa wẹ kwọnkẹnmẹ okukwe wẹ kwerini Kraịstị, nị “Ẹnyi k'a tarịrị afụnfụn bu ọda omẹni ẹnyi jẹnkọ d'a banye Alị-eze Osolobuẹ.”

23Ogẹn wẹ gi ghagbarịgụ ụka ndị rị ẹgbẹrẹ hụ, tumẹsọnmẹgụni wẹ ndị-isi, wẹ nọ gi ekpere lẹ ibu-ọnụ ha wẹ ye ẹka Di-nwọnni-ẹnyi hụn wẹ kwerini.

24Ya wẹ nọ ghashi Pisidia lụapụhazị Pamfilia.

25Ogẹn wẹ gi zigụ oziọma imẹ Pẹga rị Pamfilia, wẹ nọ jẹnmẹ Atalịa hụn wụ isi-obodo Pamfilia.

26Ya wẹ nọ nwan gi ụgbọ-mirin gha Atalịa lakin Antịọkụ rị Siria ebe wẹ nọ bu wẹ che ẹka Osolobuẹ nị wẹ d'a rụnma ọrụnnị wẹ rụngụ nwan.

27Ogẹn wẹ gi ru Antịọkụ rị Siria, wẹ nọ kpọgbama ndị ụka, gwa wẹ ihiẹn ile Osolobuẹ gi wẹ rụn lẹ k'o dọn kpọpụnị ndị alị ọzọ ụzọ okukwe.

28Ya wẹ nọ sọn ndị kwerini nọbie ebẹhụ.

← Chapter 13 Jump to: Chapter 15 →