Acts 3

Ika 2018 Bible

← Chapter 2 Jump to: Chapter 4 →

1Ụhụọhịn ohu, Pita lẹ Jọnụ jẹn Ụlọ-nsọ ogẹn ekpere ọkụrọkụ ẹtọ efinnaị.

2O nwọn okẹnnyẹ ohu dan ngụrọ kete wẹ mụl'a hụn w'e buhẹ ebẹhụ. Ụhụọhịn ile kẹ wẹ gi e butọ a ọnụ-mgbọn rị Ụlọ-nsọ hụn w'a kpọ “Ọnụ-mgbọn Ma mma,” kẹni ọ hụn ụzọ a rịọ ndị rị a banye imẹ Ụlọ-nsọ ihiẹn.

3Ogẹn okẹnnyẹ hụ gi hụn Pita lẹ Jọnụ kẹ wẹ banyekọ Ụlọ-nsọ, ọ nọ rịọma wẹ ihiẹn.

4Pita nọ bu ẹnya zinmẹ ẹ, Jọnụ nkẹ e buzi ẹnya zinmẹ ẹ. Ya Pita nọ sị a, “Bu ẹnya zinmẹ ẹnyi!”

5Okẹnnyẹ hụ nọ bu ẹnya zinmẹ wẹ, a tụ ẹnya nị wẹ ye ẹ ihiẹn.

6Kanị Pita nọ sị a, “Egi m egho, kanị, m jẹnkọ d'e ye i ihiẹn m nwọn: ghahanị ẹfan Jesu Kristi onyẹ Nazarẹtị lihi ọtọ n'i jẹnmẹ ijẹn!”

7O kwọndọn okẹnnyẹ hụ ẹka-nni, weli ẹ. Ozigbo, ụkụ-alị okẹnnyẹ ahụn lẹ olu-ụkụ a nọ kẹnrẹn.

8Okẹnnyẹ hụ nọ felihi ọtọ, jẹnmẹ ijẹn; o sọn wẹ banye Ụlọ-nsọ, e jẹn ijẹn, a wụshi elu, a ja Osolobuẹ mma.

9Ịhịan ile hụn a k'ọ rị e jẹnhunmẹ, a ja Osolobuẹ mma,

10wẹ nọ hụn nị ịya wụ onyẹ hụn te a nọdị alị Ọnụ-mgbọn Ma Mma a rịọ ụrịọ. Ihiẹnni mẹn'ẹ tụ wẹ ẹnya, gba wẹ ngharị-ẹnya.

11Hụn ahụn ọ nyankụnma Pita lẹ Jọnụ ebẹhụ w'a kpọ Ẹtu-ụlọ Solomọnụ, ịhịan ile nọ gbaha d'e fihunmẹ wẹ makẹni ihiẹnni mẹni tụ wẹ ile ẹnya ọda-ọda.

12Ogẹn Pita gi hụn ihiẹnni, ọ nọ sị ndị ahụn, “Ndị Izrẹlụ, kị ihiẹnni rị a tụnị ụnụ ẹnya? Kị ụnụ gbanị ẹnyi ilee nọkẹ sị ikẹn ẹnyi mọbụ ezi-omumẹ ẹnyi kẹ ẹnyi gi mẹ okẹnnyẹni jẹnmẹ ijẹn?

13Osolobuẹ Ebraham lẹ Aziki lẹ Jekọpụ, Osolobuẹ ndị nẹdi ẹnyi wẹ kanị, e yegụọ odibo ẹ wụ Jizọsị ọghọ — Jizọsị, hụn ụnụ we ye wẹ gbu, hụn ụnụ jụ idẹnya Paịleti — ọsụọn'a nị Paịleti e te sịgụọ n'ọ hapụ a.

14Ụnụ a jụ Onyẹ-nsọ hụ, Onyẹ ahụn nwọnlẹni ihiẹn o mẹ, sị wẹ hapụnị ụnụ izighẹ.

15Ụnụ nọ gbu onyẹ hụn e ye ndụn, kanị Osolobuẹ nọ gha ọnwụn weli ẹ. Ihiẹnni mẹye ẹnyi ile ẹnya.

16Ghahanị okukwe, ẹfan a e mẹgụọ okẹnnyẹni kẹnrẹn, okẹnnyẹni ụnụ a hụn, okẹnnyẹni ụnụ marịn. Ẹghẹẹ, ịtụkwasị Jesu obi kẹ okẹnnyẹni gi nwan dịnhịn idẹnya ụnụ ile.

17“Umunẹ m, a marịnghọ m nị ụnụ amarịn haịn ụnụ gi mẹ ihiẹnni, kẹ ụnụ kẹ ndị-isi ụnụ.

18Kanị ẹnịna kẹ Osolobuẹ dọn nwan mẹzu ihiẹn o gi ndị-amụma ile ku mbụ-mbụ, nị Onyẹ-nzụọpụha hụ o tumẹ k'a ta afụnfụn.

19Rogharị nị nwan ụnụ e kinhẹn n'o finchanpụ ụnụ njọ,

20kẹni ogẹn ru, Di-nwọnni-ẹnyi a gha elu igwee mẹ ndụn banzị ụnụ, o zihẹni ụnụ Onyẹ Nzụọpụha hụ o tumẹni ụnụ, hụn wụ Jizọsị,

21hụn k'a rịgụdẹ elu-igwee d'e ru ogẹn Osolobuẹ k'e gi dọnzichanrịn ihiẹn ile, nọkẹ kẹ Osolobuẹ dọn ku mbụ-mbụ ghahanị ọnụ ndị-amụma a rị nsọ.

22“Nke Mozizi, Mozizi sị, ‘Di-nwọnni-ẹnyi wụ Chuku ụnụ jẹnkọ d'a gha imẹ ndị nke ụnụ wepụhanị ụnụ onyẹ-amụma k'o dọn wepụha m. Ụnụ k'e gọnrịrị ntịn ihiẹn ile onyẹ-amụma hụ k'a gwa ụnụ.

23Onyẹ gilẹni ihiẹn onyẹ amụma hụ ku dọn, e gbupụ w'a imẹ ndị Izrẹlụ.’

24“Ndị-amụma ndị ọzọ ile zi ozi e kuzighọ oku ihiẹn ndịnị rị e mẹ ogẹnni, ghakwọrị Samuẹlụ d'e ru ndị amụma ndị ọzọ ile.

25Ụnụ kẹ ozi ndị-amụma jẹnni, ya lẹ nkwa Osolobuẹ kwe ndị nẹdi ụnụ kanị: ọ sị Ebraham nẹdi ụnụ, ‘Ẹka onyẹ hụ k'a gha ị ẹhụ pụha kẹ ndị alị ile rị elu-ụwa k'a gha nwọn ngọzi.’

26Ogẹn Osolobuẹ gi wepụha odibo ẹ, ọ nọ bu ụzọ zihẹni ụnụ ya, n'ọ gọzi ụnụ, ghahanị imẹ onyẹ-onyẹ imẹ ụnụ pụha imẹ njọ a.”

← Chapter 2 Jump to: Chapter 4 →