Acts 18

Ika 2018 Bible

← Chapter 17 Jump to: Chapter 19 →

1Ihiẹnni e mẹgụ, Pọlụ nọ gha Atẹnsi pụ, shi obodo Kọrẹntị.

2Ọ nọ hụn onyẹ Ju w'a kpọ Akwila hụn wẹ mụ Ẹgbẹrẹ Pọntusu, hụn ya lẹ nwunyẹ ẹ wụ Prisilia gba gha alị Itali bịa ebẹhụ nke ọhụn, makẹni eze-kanị wụ Klọdiọsụ Siza sị ndị Ju ile gha Rom pụ. Ya Pọlụ nọ jẹn d'a hụn wẹ.

3Makẹni ya nwẹn a kwazị ọdụ w'a kpụkpọrị kẹ wẹ, ọ nọ du wẹ nọdị, wẹ hụ a rụngbama ọrụn.

4Ụhụọhịn Ezumikẹn ile, ọ hụ e jẹn ụlọ-ofufe ndị Ju d'a gwa wẹ oku, a lịlịma n'o mẹ wẹ kweri — kẹ ndị Ju kẹ ndị wụlẹni ndị Ju.

5Ogẹn Saịlasị lẹ Timoti gi gha Masẹdonia bịa, Pọlụ nọ gi ogẹn ẹ ile e ku oku-Chuku, a kọwanị ndị Ju nị Jesu wụ Kraịstị.

6Ogẹn ndị Ju gi bunụman'a, kparimẹ ẹ, ya kẹ ọ nọ zinzinpụ uzunzun rị a ẹkwa tọnị wẹ gi gwa wẹ n'e mẹọlẹ wẹ eje-ihiẹn, ọ sị wẹ, “Ẹdeke ụnụ rị ụnụ isi! Ẹka m rị ọchan! Gha kikẹnni jẹnmẹ, e buru m ndị wụlẹni ndị Ju.”

7Ọ nọ gha ebẹhụ pụ, shi iwe okẹnnyẹ ohu w'a kpọ Taịtiọsụ Jọstusu, hụn wụlẹni onyẹ Ju kanị o fe Chuku kẹ ndị Ju dọn e fe. Iwe Taịtiọsụ rị e sọn ụlọ-ofufe hụ.

8Krispọsụ onyẹ-isi ụlọ-ofufe hụ nọ kwerini Di-nwọnni-ẹnyi, ya lẹ ezi-lẹ-ụlọ a ile; ndị Kọrẹntị bu ọda hụn nụ oziọma Pọlụ rị e zi e kwerizighọ, wẹ nọ mẹ wẹ mirin-Chuku.

9Imẹ uhinhin, Pọlụ nọ hụn ọhụn ebe Onyẹ-nwọnni-ẹnyi nọ sị a, “Atụlẹ egun; ka kumẹ; agbakwọlẹ nkịtịn,

10makẹni m rị ị azụụn. Onwọnni onyẹ k'e mẹtụ ị ẹka, mẹ i ihiẹn ọwụlẹ, makẹni m nwọn ndị bu ọda imẹ obodoni.”

11Ya ọ nọ nọdị ebẹhụ ahụa ohu lẹ ifọn isin, a kuzi wẹ oku Osolobuẹ.

12Kanị ogẹn Galio gi wụ Gọvanọ rị a kịnị ndị Rom Ẹgbẹrẹ Akaya, ndị Ju nọ kpọngbama, maye Pọlụ, w'ẹ jẹn ọgwa Gọvanọ.

13Wẹ nọ sị Gọvanọ, “Okẹnnyẹni rị a sị ịhịan gi ụzọ ọzọ wụlẹni hụn Iwu ku femẹ Osolobuẹ.”

14Pọlụ a chọhụ n'o kumẹ, Galio nọ sị ndị Ju, “Omẹni oku ịdan-iwu obodo rọ mọbụ nị ịhịan mẹ ihiẹn wụ eje-ihiẹn nke-esi, nkẹ m'e gọn ụnụ ndị Ju ntịn!

15Ebe o mẹ nwan ni oku ihiẹn onyẹ ku lẹ ẹfan ịhịan lẹ oku iwu ụnụ rọ, gi ni ẹka ụnụ leban a ẹnya; ekinkọ m ụdị ikpe ndịnị!”

16Ya ọ nọ chụpụ wẹ imẹ ọgwa.

17Ya wẹ ile nọ kwọndọn Sọstẹnẹsi onyẹ-isi ụlọ-ofufe ndị Ju, gbu ẹ ili ihun-ezi ọgwa hụ, kanị Galio efeyedẹni wẹ ẹnya.

18Ogẹn Pọlụ gi nọbiegụ Kọrẹntị, ọ nọ sị ndị kwerini Jesu rị ebẹhụ nọdị ọhụnma, ọ nọ banye ụgbọ-mirin, shi alị Siria. Ịya lẹ Prisilia lẹ Akwila wị. E ru wẹ obodo Sẹnkrẹ, ọ nọ kọ ntutu makẹni o nwọn nkwa o kwe.

19E ru wẹ Ẹfẹsọsụ, ọ nọ la wẹ tọ ebẹhụ, ya sụọ nọ jẹn ụlọ-ofufe ndị Ju d'a gwa wẹ oku.

20Ogẹn wẹ gi sị a nọyezi, ọ jụ;

21kanị ogẹn o gi pụkọ, ọ nọ sị, “M k'e kinhẹn, omẹni uche Osolobuẹ rọ.” Ọ nọ gi ụgbọ-mirin gha Ẹfẹsọsụ jẹnmẹ.

22Ogẹn o gi ru Sizaria, ọ nọ kụye Jerusalẹm d'e kelegụ ndị ụka, ọ nọ nwan lashi Antịọkụ ọ lakọ.

23Ogẹn o gi nọbe Antịọkụ, ọ nọzị pụ, jẹnsọnmẹ ebe rị ichẹn-ichẹn Ẹgbẹrẹ Galeshịa lẹ Frigia, a gba ndị ile kwerini Jesu umẹ.

24O nwọn onyẹ Ju ohu wẹ nọ Alẹzandrịa mụ w'a kpọ Apolọsụ hụn bịa Ẹfẹsọsụ. Okẹnnyẹni ma ku oku ọhụnma-ọhụnma, marịnzị Ẹkụkwọ-nsọ ọda-ọda.

25A kuzigụọ w'a Ụzọ Di-nwọnni ẹnyi; o nwọnkẹnmẹkẹ adụdụ iku oku-Chuku; ọ kuzi banyeni Jesu ọhụnma. Kanị mirin-Chuku Jọnụ sụọ k'ọ marịn.

26Ọ nọ kushimẹ oku-Chuku ikẹn imẹ ụlọ-ofufe ndị Ju. Kanị, ogẹn Prisilia lẹ Akwila gi nụ nkuzi ẹ, wẹ nọ weri ẹ shi ụsụọ d'a kọwan'a Ụzọ Osolobuẹ ọhụnma.

27Ogẹn Apolọsụ gi chọ n'o fetu shi Ẹgbẹrẹ Akaya, ndị kwerini Jesu nọ kwadọn ẹ, de ẹkụkwọ jẹnni ndị kwerini rị Akaya, sị wẹ nabanhan a. Ogẹn o gi ru Akaya, o yekẹnmẹkẹni ndị rị ebẹhụ ẹka, ndị Osolobuẹ yeni ẹka kwerini Jesu.

28Makẹni, ọ nọ idẹnya ịhịan ile a zachanrịn ihiẹn ile ndị Ju rị a dọ, e gi Ẹkụkwọ-nsọ a ghọsịchanrịn nị Kraịstị hụ Ẹkụkwọ-nsọ rị e ku oku ẹ wụ Jizọsị.

← Chapter 17 Jump to: Chapter 19 →