2 Kings 13

Mien Bible (Thai Script) © Thailand Bible Society, 2007

← Chapter 12 Jump to: Chapter 14 →

1อาหัดยา เญย ตอน, โยอาด, โหฒว ยูดา เญย ฮู่ง หญี่ เหฒียบ ฟาม หฮญัง วั้ว หฮญัง, เยฮู เญย ตอน, เยโฮอาหาด, เยียม สะมาเลีย ฝาว เหว่ย โหฒว อิสะลาเอน เญย ฮู่ง หย่า กุ๊น เหฒียบ เธี้ยด หฮญัง.

2หฒิว เฒี้ยว หมั่ง, เยโฮอาหาด โหฒว หว่าย สี่, เหว่ย หฒุ นิ่น กัน เนบัด เญย ตอน, เยโลโบอัม, ป์าม เญย ฒุ์ย, ต้ง นิ่น ปุน อิสะลาเอน เมี่ยน ป์าม เญย ฒุ์ย. เยโฮอาหาด นิ่น หย่า ไม้ กวั่ง.

3เหว่ย น้าย เฒี้ยว โน์ว ไห่ อิสะลาเอน เมี่ยน ฯฒฯ เฒาะ นิ่น บัว จิว ปุน เยียม ซีเลีย เญย ฮู่ง, ฮาซาเอน, เหธา นิ่น เญย ตอน, เบนฮาดัด, เญย ปั์ว-เดี๊ย เล่า เญย.

4เยโฮอาหาด เหฌี่ย ชะ โท้ เฒี้ยว. เฒี้ยว หย่า หมวัง นิ่น เญย หว่า, เหว่ย หฒุ เฒี้ยว ปวัด ซีเลีย เญย ฮู่ง เหฒย อิสะลาเอน เมี่ยน โค้ว ไห่.

5เฒี้ยว ปุน อิสะลาเอน เมี่ยน ม่าย เต้า เมี่ยน เหฌียว นิ่น บัว, นิ่น บัว ฯฒฯ เล่ย ดุ๊ด ซีเลีย เญย ปั์ว-เดี๊ย. อิสะลาเอน เมี่ยน ฯฒฯ เยียม นิ่น บัว กั้น เญย เปย๊า ฮนั้ง ฒิ่น ด่าง นอ.

6มป่า นิ่น บัว ไม้ กวั่ง เยโลโบอัม เญย โต้ว ฒง ป์าม เญย ฒุ์ย, ต้ง นิ่น ต้อ อิสะลาเอน เมี่ยน ป์าม เญย ฒุ์ย. นิ่น บัว หธ่อ ป์าม เจี๊ยน ฒุ์ย เยียม. หย่า ม่าย อาเซลา เฒี่ยน เญ์ย เญย ฝัง หธ่อ เยียม วั้ว สะมาเลีย.

7เยโฮอาหาด เหฒ่ง เหฌี่ย เญย แปง ขูง ม่าย ฮม์ เหฒียบ เต้า เก้ ม์า เญย แปง เหธา เหฒียบ นอม เบ๊าะ จ๋า เญย ม์า-เธีย, เหธา เหยียด หว่าน เต้า ยั่ง เจ๊า เญย แปง ฮนั้ง, เหว่ย หฒุ ซีเลีย เญย ฮู่ง เหมียด นิ่น บัว, ปุน นิ่น บัว ฮนั้ง เบ๊าะ เบย้า เญย เฒี่ยง โห่ เญย กะน้าย-บูง นอ.

8เยโฮอาหาด โหฒว เหฒ่ง เหฌี่ย เญย สี่, ตะฟ่าน นิ่น โหฒว เญย เหยียด ฒู้ง, เหธา นิ่น เญย ชะ, เฟี้ย เจี๊ยน เยียม อิสะลาเอน ฮู่ง เญย ฮู่ง โต้ว ตาน.

9เยโฮอาหาด ฯฒฯ เกวย เสย หมี่ อ๊ะ, หย่า หฒัง เจี๊ยน เยียม สะมาเลีย. นิ่น เญย ตอน, เยโฮอาด, หฑิบ เจี๊ยน นิ่น โหฒว ฮู่ง.

10โยอาด, โหฒว ยูดา เญย ฮู่ง ฟ่า เหฒียบ เธี้ยด หฮญัง วั้ว หฮญัง, เยโฮอาหาด เญย ตอน, เยโฮอาด, เยียม สะมาเลีย ฝาว เหว่ย โหฒว อิสะลาเอน เญย ฮู่ง กุ๊น เหฒียบ หลัวะ หฮญัง.

11หฒิว เฒี้ยว หมั่ง, เยโฮอาด โหฒว หว่าย สี่, เหว่ย หฒุ นิ่น ไม้ กวั่ง เนบัด เญย ตอน, เยโลโบอัม, ป์าม เญย เหยียด ฒู้ง ฒุ์ย, ต้ง นิ่น ต้อ อิสะลาเอน เมี่ยน ป์าม เญย ฒุ์ย. เยโฮอาด หธ่อ ป์าม เจี๊ยน วั้ว เต๋ย ฒุ์ย เญย.

12เยโฮอาด โหฒว เหฒ่ง เหฌี่ย เญย สี่, ตะฟ่าน นิ่น โหฒว เญย เหธา โหฒว ธ้วด เญย, เลี่ยม นิ่น หล่ง ชะ เหธา ยูดา เญย ฮู่ง, อามาซิยา, เบ๊าะ เญย จ๋า, เฟี้ย เจี๊ยน อิสะลาเอน ฮู่ง เญย ฮู่ง โต้ว ตาน.

13เยโฮอาด ฯฒฯ เกวย เสย หมี่ อ๊ะ. เยโลโบอัม หย่า หฑิบ เจี๊ยน นิ่น ฝาว เหว่ย โหฒว ฮู่ง. เยโฮอาด เหธา อิสะลาเอน เญย ฮู่ง หฒัง เจี๊ยน เยียม สะมาเลีย.

14เอลีซา ปุ๊ด ต้ง อ๋อย ปุน นิ่น หฒุ ไต่ เญย แป่ง วั้ว หฒั่น, อิสะลาเอน เญย ฮู่ง, เยโฮอาด, เหฌี่ย มี่ง หมั่ง นิ่น, เยียม นิ่น เญย หฑะเฮมียน เญี้ยม เจี๊ยน ก๊อง, “เยีย เญย เตีย อ้า! เยีย เญย เตีย! อิสะลาเอน เญย เบ๊าะ จ๋า เญย ม์า-เธีย เหธา เก้ ม์า แปง อ้า!”

15เอลีซา ก๊อง บั๋ว อิสะลาเอน เญย ฮู่ง, “เฒาะ จวัง-หฒิน เหธา ฟอง ต้าย ม่าะ!” ฮู่ง เตี๋ย ฯฒฯ เฒาะ ต้าย.

16เอลีซา แอ๋ง ก๊อง บั๋ว อิสะลาเอน เญย ฮู่ง, “นั้น เจี๊ยน จวัง-หฒิน.” เอลีซา ฯฒฯ หล่ง นิ่น กั้น เญย ปั์ว อัน เจี๊ยน ฮู่ง เตี๋ย เญย ปั์ว กู้ หงว่าย.

17เอลีซา ก๊อง, “คอย ตง ปูง เญย ฟง ม่วน.” นิ่น แอ๋ง ก๊อง, “ปู๋ง ฟอง ม่าะ!” เอลีซา ก๊อง, “น้าย เซ เฒี้ยว ฮี่ง เจี๋ย เญย ฟอง, ฮี่ง เจี๋ย ซีเลีย เมี่ยน เญย ฟอง. เม่ย เยียม อาเฟ้ก ฒู้ง อ๋อย เหมียด เหฑ่ง ซีเลีย เมี่ยน.”

18เอลีซา แอ๋ง ก๊อง, “เฒาะ ฟอง ต้าย ม่าะ!” ฮู่ง เตี๋ย ฯฒฯ เฒาะ ต้าย. เอลีซา ก๊อง, “หล่ง เบ๊าะ เดา ม่าะ!” นิ่น ฯฒฯ เบ๊าะ ปัว หฑุ่น ลิ์ว, ตี้ง หมี่ อ๊ะ.

19ทิน-ฮู่ง เญย เมี่ยน, เอลีซา, เฉีย เจี์ย ไห่ นิ่น ฯฒฯ ก๊อง, “เม่ย หอบ หฒุ เบ๊าะ เดา ปยา จุ๊ หฑุ่น. ฮนั้ง หน่าย เม่ย ตุ๊ เบ๊าะ ฮี่ง ซีเลีย เมี่ยน หย่า เหมียด เหฑ่ง นิ่น บัว. มป่า อี้ หฒั่น เม่ย ขูง อ๋อย ฮี่ง เจี๋ย ปัว หฑุ่น ฮนั้ง.”

20เอลีซา เกวย เสย หย่า หฒัง เจี๊ยน อ๊ะ. หฮญังๆ เถา ธุน-เกน ฮนอย ม่าย โมอับ เมี่ยน เป๋น เหยียด กวั้น เหยียด กวั้น ต้าย ลู้ วั้ว นอม เต่ย-ปูง.

21ม่าย หฑุ่น ต๋อย อิสะลาเอน เมี่ยน ปย๊บ เต้า จั๋น-ไต่, นิ่น บัว เลี่ยม เฒ่ย ปวัด กวั้น หฒะ แปง ต้าย. นิ่น บัว ฯฒฯ เฒาะ จั๋น-ไต่ ฒอย เปียะ เอลีซา เญย โฒ้ว กะญั์ว. จั๋น-ไต่ เยี้ยด ควัด หฒุ เอลีซา เญย บู๊ง, จั๋น-ไต่ ฯฒฯ นั่ง ต้าย โซ้ว เจี๊ยน.

22เยโฮอาหาด โหฒว ฮู่ง เญย เฒี่ยง โห่, ซีเลีย เญย ฮู่ง, ฮาซาเอน, หฒั่นๆ ห่อย อิสะลาเอน เมี่ยน.

23มป่า เฒี้ยว เหธย เอน ปุน อิสะลาเอน เมี่ยน. นิ่น ค้อ-เลี่ยน นิ่น บัว, หย่า ฮวิน หฑวน ต้าย เถง นิ่น บัว เหว่ย หฒุ นิ่น เหธา อับลาฮัม, อีสัก เหธา ยาโค้บ แล์ง เจี๋ย แหง่ง หว่า. เถา อี้ จ๋า ฮนอย นิ่น ไม้ คั้ง เหมียด นิ่น บัว หย่า ไม้ หฒุ่น นิ่น บัว เล่ย ฆอย นิ่น กั้น เญย หฑะเฮมียน.

24ซีเลีย เญย ฮู่ง, ฮาซาเอน, ไต่ หมี่ อ๊ะ. นิ่น เญย ตอน, เบนฮาดัด หฑิบ เจี๊ยน นิ่น โหฒว ฮู่ง.

25ฒิ่น ด่าง ฮาซาเอน เหธา เยโฮอาหาด เบ๊าะ จ๋า, ฮาซาเอน ธ้าง ตุ๊ เหฒีย นอม มู้ง หมี่ อ๊ะ. เยโฮอาหาด เญย ตอน, เยโฮอาด, ฯฒฯ เหธา ฮาซาเอน เญย ตอน, เบนฮาดัด, เบ๊าะ จ๋า แอ๋ง ธ้าง ตุ๊ วั้ว เต๋ย มู้ง หฑวน. เยโฮอาด เบ๊าะ ฮี่ง เบนฮาดัด ปัว หฑุ่น ฯฒฯ ธ้าง ตุ๊ วั้ว เต๋ย มู้ง หฑวน ต้าย อ๊ะ.

← Chapter 12 Jump to: Chapter 14 →