2 Kings 2

Mien Bible (Thai Script) © Thailand Bible Society, 2007

← Chapter 1 Jump to: Chapter 3 →

1เถา เฒี่ยง โห่ เฒี้ยว อ๋อย หล่ง หฑยาว-หฒุ่น ต้อ เอลียา ฝาว ลู่ง, เอลียา เหธา เอลีซา เยียม กินกาน ธ้วด เจ๊า มี่ง.

2เอลียา ก๊อง บั๋ว เอลีซา, “เม่ย เยียม น้าย ฒั้ว โอ่. เฒี้ยว พ้าย เยีย มี่ง เบดเอน.” มป่า เอลีซา ก๊อง, “เยีย เฒี้ยง เจี๊ยน เฒี่ยง เจี๊ยน เญย เฒี้ยว หย่า เฒี้ยง เจี๊ยน เม่ย เญย แหม่ง แล์ง, เยีย ไม้ เล่ย ฆอย เม่ย.” นิ่น บัว ฯฒฯ มี่ง เบดเอน.

3ม่าย กวั้น เยียม เบดเอน เญย โต่ว หว่า เมี่ยน ธ้วด ต้าย ปวั้ง เอลีซา หน่าย ก๋า, “เม่ย ฮิ้ว เญย ไฟ? อี้ ฮนอย เฒี้ยว อ๋อย ต้อ เม่ย เญย ไซ-เตี๋ย เล่ย ฆอย เม่ย อ๊ะ.” เอลีซา เตา, “เยีย ฮิ้ว เญย, มป่า ไม้ ตู๋ง ก๊อง.”

4เอลียา ก๊อง บั๋ว เอลีซา, “เม่ย เยียม น้าย ฒั้ว โอ่. เฒี้ยว พ้าย เยีย มี่ง เยลีโค.” มป่า เอลีซา ก๊อง, “เยีย เฒี้ยง เจี๊ยน เฒี่ยง เจี๊ยน เญย เฒี้ยว หย่า เฒี้ยง เจี๊ยน เม่ย แล์ง, เยีย ไม้ เล่ย ฆอย เม่ย.” นิ่น บัว ฯฒฯ มี่ง เยลีโค.

5ม่าย กวั้น เยียม เยลีโค เญย โต่ว หว่า เมี่ยน มี่ง เถา เอลีซา วั้ว หน่าย นิ่น, “เม่ย ฮิ้ว เญย ไฟ? อี้ ฮนอย เฒี้ยว อ๋อย ต้อ เม่ย เญย ไซ-เตี๋ย เล่ย ฆอย เม่ย มี่ง หมี่ อ๊ะ.” เอลีซา เตา, “เยีย ฮิ้ว เญย, มป่า ไม้ ตู๋ง ก๊อง อ๊ะ.”

6เอลียา ก๊อง บั๋ว เอลีซา, “เม่ย เยียม น้าย ฒั้ว โอ่. เฒี้ยว พ้าย เยีย มี่ง จอแดน ด้าย.” มป่า เอลีซา ก๊อง, “เยีย เฒี้ยง เจี๊ยน เฒี่ยง เจี๊ยน เญย เฒี้ยว หย่า เฒี้ยง เจี๊ยน เม่ย เญย แหม่ง แล์ง, เยีย ไม้ เล่ย ฆอย เม่ย.” นิ่น บัว อี เต้า แอ๋ง กัน เจี๊ยน เจ๊า มี่ง อ๊ะ.

7ม่าย ฮม์ เหฒียบ เต้า โต่ว หว่า เมี่ยน กัน เจี๊ยน นิ่น บัว มี่ง หย่า โซ้ว เจี๊ยน โก เต๋ย เญย ฮวิน มี่ง เอลียา เหธา เอลีซา ตี้ง เจี๊ยน จอแดน ด้าย เฮลน วั้ว นอม ต๋อง.

8เอลียา เฒาะ นิ่น เญย ลุย-ด๊าว หฌุ่น ต้าย เบ๊าะ ววม. ววม ฯฒฯ ตั๋ง, ปุน ฆอย หฒาย แหมง บย่าว แหมง. นิ่น บัว อี เต้า ฯฒฯ ยั่ง เดา-ฆาย เจี๋ย.

9เจี๋ย วั้ว หง่าน หฒิ ด้าย ลิ์ว, เอลียา ก๊อง บั๋ว เอลีซา, “ เฒี้ยว ไม้ แก้ง ฒิบ เยีย เล่ย ฆอย เม่ย, เม่ย อ๋อย เยีย เหว่ย เม่ย โหฒว หาย หญู่ง กุ๊น โท้ อ๊ะ.” เอลีซา เตา, “โท้ ปุน เยีย ตุ๊ หฑิบ ซูง-โก๊ว เม่ย เญย ชะ.”

10เอลียา ก๊อง, “เม่ย โท้ เญย เซ อะ ไห่, มป่า เฒี้ยว ฒิบ เยีย เล่ย ฆอย เม่ย มี่ง เญย เฒี่ยง โห่, สี ก๊อง เม่ย ปวัด เยีย, เม่ย ฯฒฯ ตุ๊ อ๊ะ. มป่า สี ก๊อง เม่ย ไม้ ปวัด เยีย, เม่ย ฯฒฯ ไม้ ตุ๊ ฒิบ.”

11นิ่น บัว อี เต้า เหยียด ปิ่น มี่ง เหยียด ปิ่น ก๊อง หว่า วั้ว หฒั่น, เลี่ยม เฒ่ย ม่าย โต์ว เญย เธีย เหธา ม่าย โต์ว เญย ม์า หิ่น ธ้วด ต้าย เฒาะ นิ่น บัว อี เต้า ปุน ฆอย. เอลียา ฯฒฯ เยียม หฑยาว-หฒุ่น ฝาว ลู่ง หมี่ อ๊ะ.

12เอลีซา ปวัด ฯฒฯ เห่ว ธ้วด ก๊อง, “เยีย เญย เตีย อ้า! เยีย เญย เตีย! อิสะลาเอน เญย เบ๊าะ จ๋า เธีย เหธา เก้ ม์า แปง อ้า!” ฆะฮ้า เอลีซา ไม้ ตุ๊ ปวัด เอลียา อ๊ะ. เอลีซา ฯฒฯ เฒาะ นิ่น กั้น เญย ลุย เป๊ด โหฒว อี แหมง.

13เอลีซา เฒาะ เยียม เอลียา ด๊อด เหฌี่ย ต้าย เญย ต้ม ลุย ฯฒฯ หฑวน มี่ง โซ้ว เจี๊ยน จอแดน ด้าย เฮลน.

14นิ่น หล่ง เยียม เอลียา เญย ซิน ด๊อด เหฌี่ย ต้าย เญย ต้ม ลุย-ด๊าว เบ๊าะ ววม หย่า ก๊อง, “ เฒี้ยว, เอลียา เญย ทิน-ฮู่ง, เยียม หาย?” เบ๊าะ ววม วั้ว หฒั่น, ววม ฯฒฯ ปุน ฆอย หฒาย แหมง บย่าว แหมง. เอลีซา ฯฒฯ เจี๋ย ด้าย หมี่ อ๊ะ.

15เยียม เยลีโค ต้าย วั้ว กวั้น โต่ว หว่า เมี่ยน หมั่ง เจี๊ยน ฯฒฯ ก๊อง, “เอลีซา ตุ๊ เอลียา เญย ชะ หมี่ อ๊ะ.” นิ่น บัว ฯฒฯ มี่ง ฒิบ นิ่น หย่า เยียม นิ่น เญย หฑะเฮมียน บ๊าบ เหฌี่ย เถา เดา.

16นิ่น บัว ก๊อง, “หมั่ง ม่าะ! เยีย บัว, เม่ย เญย โปว, ม่าย ฮม์ เหฒียบ เต้า เฮ้น เญย มจั่ง ตอน. โท้ ปุน นิ่น บัว มี่ง ล์อ เม่ย เญย ไซ-เตี๋ย. เหฑีย เฒี้ยว เญย สีง ลี่ง เฒาะ นิ่น มี่ง แอ๋ง ปู๋ง นิ่น เหฌี่ย หาย นอม บง กู้ หงว่าย ไฟ หาย นอม ฮ์อง.” เอลีซา เตา, “ไม้ ตู๋ง พ้าย นิ่น บัว มี่ง.”

17มป่า นิ่น บัว ชะ โท้ ปุน นิ่น บัว มี่ง, เถา เอลีซา เสียง ไญ้ เญย. นิ่น ฯฒฯ ก๊อง, “พ้าย นิ่น บัว มี่ง ม่าะ!” นิ่น บัว ฯฒฯ พ้าย ฮม์ เหฒียบ เต้า เมี่ยน มี่ง ล์อ ปัว ฮนอย หย่า ล์อ ไม้ ปวัด นิ่น.

18เอลีซา หธ่อ เยียม เจี๊ยน เยลีโค วั้ว หฒั่น น้าย เต๋ย เมี่ยน หฑวน เถา นิ่น วั้ว. นิ่น ก๊อง บั๋ว นิ่น บัว, “เยีย มต้าย บั๋ว เม่ย บัว ไม้ ตู๋ง มี่ง นี!”

19ม่าย เต๋ย เยียม ฒี่ง เญย เมี่ยน ก๊อง บั๋ว เอลีซา, “เยีย บัว เญย ต้ม ก๋อ อ่า, เม่ย ปวัด เยีย บัว เญย ฒี่ง เญย ต๋อง-ต้าว หลง เญย, มป่า ววม ไม้ เป๋น. มเซียะ ตอน ขูง หว่าย กู้งว์า ฮนั้ง.”

20เอลีซา ก๊อง, “เฒาะ นอม เซียง-หฑ่อม ต้าย ตั๊บ เจี๊ยน เฑ้า ปุน เยีย.” นิ่น บัว ฯฒฯ ต้อ ต้าย ปุน นิ่น.

21นิ่น ฯฒฯ ธ้วด มี่ง เถา ววม-ฒี้ง วั้ว แอ๋ง เฒาะ น้าย เต๋ย เฑ้า โต๋ เจี๊ยน ววม กะญั์ว หย่า ก๊อง, “ เฒี้ยว ฮนั้ง น้าย นอ ก๊อง, ‘เยีย ปุน น้าย เต๋ย ววม หลง หมี่ อ๊ะ. ยั่ง น้าย เจี๋ย น้าย เต๋ย ววม ไม้ ห่อย เมี่ยน ไต่ ไฟ ปุน เมี่ยน หว่าย กู้งว์า.’”

22เยียม หน่าย ต้าย, ววม ฯฒฯ หลง เถา อี้ จ๋า ฮนอย, หฒิว เอลีซา ก๊อง เญย หว่า.

23เอลีซา เยียม เยลีโค ธ้วด เจ๊า มี่ง เบดเอน. เยียม เจ๊า หฒั่ง วั้ว หฒั่น ม่าย เต๋ย ตอน เยียม ฒี่ง ธ้วด ต้าย จั๊ด นิ่น. นิ่น บัว ก๊อง, “อง-มฆ้อง-ฌัง, ฝาว มี่ง ม่าะ! อง มฆ้อง-ฌัง, ฝาว มี่ง ม่าะ!”

24เอลีซา ฮวิน หฑวน หมั่ง นิ่น บัว หย่า เต๊ง เฒี้ยว เญย บั๋ว เหฒียว นิ่น บัว. ม่าย อี เต้า เจี๊ยบ-เญ์ย เยียม หล่ม ธ้วด ต้าย เป๊ด เฝย เหฒียบ เหญ่ย เต้า น้าย เต๋ย ตอน.

25เอลีซา เยียม หน่าย มี่ง เถา คานเมน บง, ฆะฮ้า แอ๋ง หฑวน เถา สะมาเลีย.

← Chapter 1 Jump to: Chapter 3 →